ئەمریکا ل دۆر ھێرشێن حوسیان ھۆشداریێ ددەتە ئیرانێ
ئەڤرۆ:
پەیڤدارا کۆچکا سپی یا ئەمریکا راگەھاند کو د ڤان رۆژێن دووماھیێ دا حوسیێن یەمەنێ ب چەکێن ئیرانێ بەردەوام ھێرشی سعوودیێ دکەن و مخابن د ئەنجاما ھێرشێن حوسیان دا وەلاتیێن سڤیل دبنە قوربانی و ھەروەسا مەترسی ل سەر ژیانا وەلاتیێن ئەمریکا ژی دروست دبیت، ھێرشێن حوسیان مەترسیدارن و دڤێت حوسی دەستان ژ ھێرشێن خوە بەردەن، چونکو د دەمەکێ وەسا دا دێ فشارێن نێڤدەولەتی ل سەر حوسیان و ئیرانێ زێدەتر لێ ھێن.
جین پساکی ئەو یەک ژی دیار کر کو ئەمریکا ل گەل ھەڤپەیمانێن خوە ل رۆژھەلاتا ناڤین کار بۆ ئاشتی و ئارامیێ دکەت، لێ مخابن بزاڤێن ئیرانێ ب رێیا گرۆپێن چەکدارێن سەر ب وێ ڤە بۆ تێکدانا رەوشا دەڤەرێ د بەردەوامن و ئەو یەک ژی ب چو رەنگەکێ ناھێتە قەبوولکرن و دڤێت ئیران دەستان ژ پشتەڤانیکرنا حوسیان بەردەت و ھاریکاریا وان نەکەت، چونکو ئالۆزبوونا رەوشا یەمەنێ و دەڤەرێن دی د بەرژەوەندیا چو ئالیەکێ دا نینە و ئەمریکا دێ وان ھێز و ئالیان ژی سزا دەت کو ھاریکاریا حوسیان دکەن دا رەوشا سعوودیێ تێک بدەن.
ل ئالیێ دی چەند رۆژن ھەڤپەیمانا عەرەبی ب سەرپەرشتیا سعوودیێ دەست ب ئۆپەراسیۆنەکا مەزن ل دژی حوسیان کریە و فەرماندارەکێ ھێزێن سەربازی یێن سعوودیێ ژی دوھی راگەھاند کو د ئەنجاما ئۆپەراسیۆنا چەند رۆژێن بۆری دا نێزیکی سەد چەکدارێن حوسی ل دەڤەرێن جودا جودا یێن یەمەنێ ھاتینە کوشتن و گەلەک چەکێن گران یێن حوسیان ژی د ئەنجاما ھێرشێن فرۆکێن شەری یێن وەلاتێن عەرەبی دا ھاتینە ژناڤبرن و ھێرشێن وان ل دژی حوسیان ل یەمەنێ دێ بەردەوام بن.
ژ ئالیێ خوە ڤە وەزارەتا دەرڤە یا سعوودیێ ژی دوھی راگەھاند کو ھەتا ھێرشێن حوسیان ب پشتەڤانیا ئیرانێ ل سەر وان بەردەوام بن ئەو دێ ب توندی بەرسڤا حوسیان دەن و دێ ل ھەموو دەڤەرێن جودا جودا یێن یەمەنێ ھێرشی وان کەن.
