وەزیرەکێ بەرێ یێ تورکیا: تورکیا د سیاسەتا دەرڤە دا تووشی قەیرانێ ھاتیە
ب، سەرجان مەحمود:
یاشار یاکیش وەزیرێ بەرێ یێ دەرڤە یێ تورکیا د داخۆیانیەکێ دا راگەھاند کو دەستھەلاتا تورکیا د سیاسەتا دەرڤە دا تووشی قەیرانەکا مەزن ھاتیە و نھا پرانیا وەلاتێن جیرانێن تورکیا پەیوەندیێن وێ ل گەل تورکیا گەلەک د خرابن و گۆت: (وەزیرێ دەرڤە یێ تورکیا دبێژیت وان ل گەل مسرێ و ئورۆپا دەست ب قۆناغەکا نوو کرینە لێ نە مسر و نە ژی ئورۆپا بەرھەڤ نینن بێی مەرج پەیوەندیێن خوە ل گەل تورکیا ئاسایی بکەن و ئەو یەک ژی نیشا ددەت کو تورکیا د سیاسەتا خوە یا دەرڤە یا تووشی قەیرانەکا گەلەک مەزن ھاتیە).
یاشار یاکیش ھەروەسا راگەھاند ژی کو نھا چاڤوش ئوگلۆ وەزیرێ دەرڤە یێ تورکیا بەحسێ باشکرنا پەیوەندیان ل گەل مسرێ دکەت لێ دڤێت بەری ھەر تشتەکێ تورکیا دەستان ژ پشتەڤانیا رێکخستنا برایێن موسلمان بەردەت کو ل مسرێ دخوازن دەستھەلاتێ ب گوھۆرن و گۆت: (ل مسرێ رێکخستنا برایێن موسلمان وەک رێکخستنەکا تیرۆرست دھێتە قەبوول کرن و تورکیا پشتەڤانیا ڤێ رێکخستنێ دکەت، ھەکە تورکیا ژ دل دخوازیت سیاسەتا خوە یا ل ھەمبەر مسرێ و وەلاتێن عەرەبی ب گوھۆریت وەک پێنگاڤا دەستپێکێ دڤێت رێزێ ل سەروەریا وان وەلاتان بگریت و دەستێوەردانێ د کاروبارێن وان نەکەت ھەروەسا دڤێت تورکیا ب فەرمی دەستان ژ پشتەڤانیا رێکخستنا ئیخوان موسلمین ژی بەردەت).
