كه‌سێن ئه‌كادیمی د هونه‌ری دا دێ شێن گه‌له‌ك رێیان ڤه‌كه‌ن
زاخۆ، عه‌لی حاجی:
هه‌كار موسته‌فا، گه‌نجه‌كێ باژێرێ ئاكرێ یه، د بۆارێ هونه‌ری دا كار دكه‌ت، د دیداره‌كێ دا بۆ رۆژناما ئه‌ڤرۆ دیاركر كو وان خوه كری یه قوربانی وێ چه‌ندێ كو خه‌لكه‌ك زێده‌تر نێزیكی هونه‌ری بكه‌ت ژبه‌ركو هونه‌ر ل كوردستانێ نانێ ژیانێ ناده‌ته وان و كه‌سێ ئه‌كادیمی د هونه‌ری
دا كار بكه‌ت دێ شێت گه‌له‌ك رێیان بۆ خه‌لكی ڤه‌كه‌ت.
زێده‌تر گۆت : ئه‌ز ده‌رچوویێ په‌یمانگه‌ها هونه‌رێن جوان پشكا په‌یكه‌رسازیێ مه و ل كولیژا هونه‌ری ل پشكا ره‌نگان من ته‌مام كری یه، هه‌ر چه‌نده ل ده‌ستپێكێ ل دووف حه‌زا خوه من پشكا په‌یكه‌رسازیێ هه‌لبژارت بوو ژبه‌ركو ئه‌ز داخباری په‌یكه‌رێ رۆمانی و یونانیان بووم، ل كولیژا هونه‌ری ژی من دڤیا هنده‌ك گوهۆرینان بكه‌م ژبه‌ر وێ چه‌ندێ من پشكا ره‌نگان هه‌لبژارت و بۆ ئه‌گه‌ر ئه‌ز فێری گه‌له‌ك تشتێن دی ببم، كه‌سێ ئه‌كادیمی دشێت كه‌ڤالان شلوڤه بكه‌ت و خه‌لكه‌كێ فێری هونه‌ری بكه‌ت و به‌لێ هه‌كه یێ ئه‌كادیمی نه‌بیت نه‌شێت خه‌لكی فێربكه‌ت و بتنێ دێ د چارچوڤه‌كێ دا بیت و كه‌سانێن نه ئه‌كادیمی هه‌نه به‌لێ هه‌ر رێكێن ئه‌كادیمی دگرنه به‌ر و ب شێوه‌یه‌كێ گشتی هه‌موو ده‌مان هونه‌ر وه‌كو ده‌ستپێكێ یه بۆ مروڤی هه‌كه مروڤ چه‌ندێ باش ژی بیت و ئه‌م ل دووف هونه‌ری دگه‌رین كا دێ شێین ب چو ره‌نگی كه‌ڤاله‌كی چێكه‌ین كو گرنگ نینه وێنێ سه‌روچاڤه‌كێ یان سروشتی یا گرنگ ئه‌وه بشێن چه‌ند ره‌نگان و بابه‌تان تێكه‌ل بكه‌ین هه‌تا كو بابه‌ته‌ك ده‌ر بكه‌ڤیت و چو كه‌س ب نانێ هونه‌ری ده‌وله‌مه‌ند نه‌بوویه و مه گه‌له‌ریه‌ك ل دهوكێ چێكریه و ب رێیا وێ گه‌له‌ریێ ژی كه‌ڤالێن شێوه‌كاران د فروشین و د پلان دایه وێ گه‌له‌ریێ ل گه‌له‌ك ده‌ڤه‌رێن دی ڤه‌كه‌م .
