نووترین كلیپا خوه دێ د هه‌یڤا ره‌مه‌زانێ دا به‌لاڤ كه‌ت
ئه‌ڤرۆ، رێوار محه‌مه‌د ره‌شید:
سترانبێژ (سامی جه‌لال) ل دۆر نووترین كارێن خوه یێن هونه‌ری بۆ به‌رپه‌رێ هونه‌ری یێ رۆژناما ئه‌ڤرۆ دیار كر كو نوكه ئه‌و مژوولی تۆماركرنا سترانه‌كێ یه بناڤێ (عه‌شقا خودایی) كو نوكه كارێ تۆماركرنا ڤێ سترانێ ل باژێرێ ئیسته‌نبۆلێ یێ وه‌لاتێ توركیا و ستودیۆیا (تون) ل باژێرێ دهۆكێ دهێته‌كرن و ئارانجۆر (محه‌مه‌د زه‌كی) ب كارێ دروستكرنا مۆزیكا وێ رابوویه و گۆت: “ژڤانه ڤێ سترانێ د هه‌یڤا ره‌مه‌زانا پیرۆز دا كلیپ بكه‌م كو (سوهه‌یب سه‌عدوللا) ل كۆمپانیا (فیوچه‌ر پروده‌كشین) دێ ب كارێ ده‌رهێنان و وێنه‌گرتنا ڤێ كلیپێ رابیت”.
ناڤهاتی ئاماژه‌و دا وێ چه‌ندێ كو نوكه گه‌له‌ك پاره ل چێكرنا به‌رهه‌می دهێته مه‌زاختن، ژ به‌ر ڤێ چه‌ندێ چێكرنا سترانان ب شێوه‌یێ سینگل وه‌كو بار سڤكیه‌كێ یه ل سه‌ر سترانبێژی و ب دیتنا من كلیپه‌كا باش جهێ به‌رهه‌مه‌كی دگریت و گۆت: “هه‌كه پشته‌ڤانیا ماددی ژ لایێ جهێن په‌یوه‌ندیدار ڤه ل من بهێته‌كرن دێ بۆ من گه‌له‌ك یا ب سه‌ناهی بیت دده‌مه‌كێ كێم دا سترانان بۆ چێكرنا به‌رهه‌مه‌كێ ئایینی به‌رهه‌ڤ كه‌م، ژ به‌ر كو هه ژ ژیێ زارۆكینیێ و هه‌تا نوكه ئه‌ز ل سه‌ر گۆتنا سترانێن ئایینی یێ به‌رده‌وامم، ئه‌ڤه دده‌مه‌كی دا یه من سترن ب وه‌لاتی و دایكێ و پێشمه‌رگه‌ی و مرۆڤایه‌تیێ ژی گۆتینه، به‌لێ ستایلێ من یێ سه‌ره‌كی یێ ئایینی یه و ئه‌و په‌یاما من ڤیایی ب رێیا سترانگۆتنێ بگه‌هینم من یا گه‌هاندی”.
سامی دیار كر كو جهێ داخێ یه ده‌زگه‌هێن مه یێن راگه‌هاندنێ بتنێ د هه‌یڤا ره‌مه‌زانا پیرۆز دا گرنگیێ دده‌نه په‌خشكرنا سترانێن ئایینی و دخوازن ده‌زگه‌هێن ناڤهاتی د هه‌یڤێن دی ژی دا گرنگیێ ب په‌خشكرنا سترانێن ئایینی بده‌ن و گۆت: “بۆ پشتی به‌لاڤكرنا ڤێ كلیپێ دێ من پرۆژێن باشتر یێن هونه‌ری هه‌بن كو كار ل سه‌ر بكه‌م و پێشكێشی حه‌ز ژێكه‌رێن ده‌نگێ خوه بكه‌م”.
