ئه‌مریكا به‌حسێ هاریكاریێن خوه بۆ هێزێن سووریا دیموكرات دكه‌ت
جێگرا وه‌زیرێ ده‌رڤه یێ ئه‌مریكا راگه‌هاند كو هاریكاریێن وان بۆ هێزێن سووریا دیموكرات و یه‌په‌گێ ل سووریێ د چارچۆڤێ شه‌رێ ل دژی تیرۆرێ دا بوویه و هه‌تا داعش و هێزێن دی یێن تیرۆرستی ل سووریێ بن و مه‌ترسیا وان ل سه‌ر خه‌لكی هه‌بیت دێ هاریكاریێن وان بۆ یه‌په‌گێ و هێزێن سووریا دیموكرات د به‌رده‌وام بن.
وێندی شێرمان ئه‌و یه‌ك ژی دیار كر كو مه‌ترسیا داعشێ ل رۆژهه‌لاتا ناڤین ب تایبه‌تی ژی ل سووریێ به‌رده‌وامه، داعشێ دڤێت ب ره‌نگێن جودا جودا ده‌ست ب كریارێن نوو یێن تیرۆرستی بكه‌ت، ئه‌و یه‌ك ژی مه‌ترسیه‌كا خوه یا مه‌زن بۆ ئه‌مریكا و هه‌ڤپه‌یمانێن وێ هه‌یه، ئه‌مریكا نه‌چاره ل هه‌مبه‌ر تیرۆرێ و تیرۆرستان به‌ره‌ڤانیێ ژ به‌رژه‌وه‌ندیێن خوه بكه‌ت، ژ به‌ر هندێ ژی هه‌تا رێكخراوێن تیرۆرستی ل سووریێ هه‌بن دێ هاریكاریێن بۆ هێزێن سووریا دیموكرات و یه‌په‌گێ د به‌رده‌وام بن.
ناڤهاتیێ ئه‌و یه‌ك ژی نه‌ڤه‌شارت كو ژ بلی شه‌رێ ل دژی داعشێ چو ستراتیژیه‌كا دی یا ئه‌مریكا ل سووریێ نینه، ئه‌مریكا نه‌ڤێت كار بۆ ئاڤاكرنا چو ده‌وله‌ت ئانكۆ كیانه‌كێ دی ل سه‌ر ئاخا سووریێ بكه‌ت، ئارمانجا سه‌ره‌كی یا ئه‌مریكا ژ هاریكاریێن بۆ هێزێن سووریا دیموكرات شه‌رێ ل دژی داعشێ یه.
