سه‌رپه‌رشتێ تیما دهۆكێ: چو بژارده نینن ژبلی سه‌ركه‌فتنێ
دهێته چاڤه‌ڕێ كرن سوبه‌هی پێنچ شه‌مبی تیما ته‌پاپێی یا یانا دهۆكێ یاریا خوه یا گه‌ڕا حه‌فتێ ژ هه‌ڤڕكیێن خولا پلا ئێكا ئیراقێ بۆ یانێن كۆما دویێ ب ئارمانجا سه‌ركه‌فتن ب تنێ بژارده‌یه ده‌مێ ل ده‌مژمێر چار و نیڤێ ئێڤاری مێڤانداریا یانا میسان ل یاریگه‌ها سه‌ره‌كی بێی به‌رهه‌ڤبوونا جه‌ماوه‌ری بكه‌ن لدیڤ بڕیارێن ئێكه‌تیا ته‌پاپێی یا ئیراقێ.
یانا دهۆكێ پشتی خوساره‌تیا سێیێ د خولێ دا تۆماركری هیڤیێن ده‌ربازبوونێ بشێوه‌كێ ئێكسه‌ر لاواز بووینه ئه‌وا ژ شه‌ش یاریا سێ سه‌ركه‌فتن و سێ خوساره‌تی تۆماركرین و نه‌ه خال كۆمكرین رێزا شه‌شێ دهێت، یانا سیناعه ب 18 خالان سه‌رێ لیستێ دهێت، سامرا و به‌حری ب 14 خالان رێزێن دویێ و سێیێ لدیڤ ئێك دهێن، روومادی و ناسریه ب نه‌ه خالان رێزێن چارێ و پێجێ دهێن، ژلایه‌كێ دیڤه یانا مێڤانا دهۆكێ میسان ب سێ خالان رێزا 13ێ دهێت.
لدور دووماهی به‌رهه‌ڤیێن دهۆكێ ئازاد ئه‌حمه‌د سه‌رپه‌رشتێ تیمێ بۆ رۆژناما ئه‌ڤرۆ گوت: هه‌رچه‌نده هیڤیێن شێوه‌كێ ئێكسه‌ر بۆ پلا نایاب لاواز بووینه لێ هێشتا هیڤیێن پلا دویێ و پلێتا سێیێ به‌رده‌سته هه‌كه ئه‌م یاریێن مایی ڤه‌گه‌ڕیێنه سه‌ركه‌فتنان، ئه‌ڤچه‌نده ژی ب زه‌حمه‌ت نینه چونكو ژ ده‌ستدانا خالێن یاریێن بوری خه‌له‌تیێن كه‌سۆكی یێن یاریزانان بوون نه‌ك ئاست و شیانێن یانێن هه‌ڤڕك ژبه‌ركو تیما مه د هه‌ردو یاریێن ناسریه و سلیخ گه‌له‌ك باشتربوون و بهێزتر لێ ده‌رئه‌نجامێ خه‌له‌تیێن كه‌سوكی یێن هنده‌ك یاریزانان تووشی خووساره‌تیێ بوون و هه‌روه‌سان نه‌بوونا چه‌نسی ژی ئه‌گه‌ره‌ێ دی یه، هه‌تا دووماهی چڕكه دێ شه‌ڕی بۆ پلێته‌كا ده‌ربازبوونێ یاریێ كه‌ین و لدیڤ یاریان ئاستێ تیما مه باشتر دبیت و رێخستی تره و ژ ده‌ستدانا ژماره‌كا مه‌زن یا ده‌لیڤێن گۆلكرنێ و كونترۆل ل سه‌ر یاریێن بوری به‌لگه‌یه لێ ته‌پاپێی دا یێ گۆلێ بكه‌ت ئه‌و سه‌ركه‌فتیه.
ژلایه‌كێ دیڤه ناڤهاتی دیاركر كو بۆ ڤێ یاریێ چو بژارده نینن و دڤێت سه‌ركه‌فتنێ تۆماربكه‌ن پێخه‌مه‌ت به‌رده‌وامیا هه‌ڤڕكیێ و هه‌كه چو ده‌ستكاری د ئه‌نجامێن یاریێن دی دا نه‌هێته كرن دماوێ خولێ دا گه‌شبینن دێ ئێك ژ تیمێن هه‌ڤڕك بۆ پلێتا ده‌ربازبوونێ بن.
ژ یاریێن دی یێن هه‌مان كۆمێ، ئه‌ڤرۆ روومادی دێ به‌حری مێڤان كه‌ت، سوبه‌هی سیناعه دێ بیته مێڤانا سامرا، مرور ل گه‌ل ئتیفاق، سلیخ و ئه‌كه‌د، ناسریه هه‌مبه‌ری بابل، دیالا دێ بیته مێڤانا پێشمه‌رگا سلێمانیێ.
