كلیپا خوه یا ئێكێ دێ به‌لاڤ كه‌ت
زنار تۆڤی:
هونه‌رمه‌ند شیار كیكی، خه‌لكێ باژێرێ سه‌رێ كانیێ یه ل رۆژئاڤایێ كوردستانێ و نوكه ل باژێرێ قامیشلۆ دژیت، د دیداره‌كێ دا بۆ رۆژناما ئه‌ڤرۆ دبێژیت: ئه‌و د ناڤ مالباته‌كا هونه‌ری دا مه‌زن بوویه، كو مامێ وی و برایێن وی هه‌موو هونه‌رمه‌ندن، ئه‌و ژ وان فێری گۆتنا سترانان و مۆزیكێ بوویه، هه‌روه‌سا ئه‌و پتر د وارێ موزیكێ دا كار دكه‌ت و ئه‌و ئامیرێ سازێ و جمبشێ و عۆدێ و باغله‌مێ و كه‌مانێ دژه‌نیت، ئه‌و پتر حه‌ز ژ ئامیرێ باغله‌مێ دكه‌ت و ژ هه‌موو ئامیرێن مۆزیكێ ئه‌و وێ پتر ب كار دئینیت.
ناڤهاتی گۆت ژی: نوكه ئه‌و مژوولی تۆماركرنا سترانه‌كێ یه ب ناڤێ ” كچا سه‌رێ كانیێ “، كو ئه‌ڤ سترانه ژ په‌یڤێن ” ئاناهیتا سینۆ” یه، ئاوازا ڤێ سترانێ یا وی ب خوه‌یه، ل ڤان نێزیكان دێ وێ سترانێ كلیپ كه‌ت و به‌لاڤ كه‌ت، دیسان ب ره‌نگه‌كێ به‌رده‌وام ئه‌و د وارێ مۆزیكێ دا كار دكه‌ت و به‌رهه‌مان بۆ هونه‌رمه‌ندان چێدكه‌ت.
شیار هێشتا دبێژیت ژی: د نوكه دا مۆزیكا كوردی ل رۆژئاڤایێ كوردستانێ یا به‌ر ب پاشڤه دچیت، ئه‌ڤه ژی ڤه‌دگه‌یت بۆ هندێ كو چو پشته‌ڤانی كو مۆزیكژه‌نان و كارێن هونه‌ری نه‌هێته كرن، له‌وما هونه‌رێ مه ژی كه‌فتیه د ڤێ ره‌وشا خراب و نه‌باش دا، هه‌روه‌سا ده‌مێ فیسته‌ڤال و هه‌لكه‌فتێن نه‌ته‌وه‌یی ژی دهێنه ئه‌نجامدان پشته‌ڤانی ل مۆزیكژه‌نان ناهێته كرن، دیسان ئه‌و گه‌نجێن ژنوو سترانان دبێژن، هنده‌ك ژ وان په‌یڤێن نه ژ هه‌ژی دكه‌نه د ناڤ سترانێن خوه دا و دبێژن، ئه‌ڤه ژی وه‌دكه‌ت كو ئاستێ سترانا كوردی ژی به‌ر ب خرابیێ ڤه بچیت، له‌وما دخوازم ئێدی گه‌نجێن مه سترانا ب ره‌نگه‌كێ باش بێژن و پتر خزمه‌تا هونه‌رێ كوردی بكه‌ن.
هه‌روه‌سا ئه‌و ژی گۆت: ئه‌و باش دبینیت كو مۆزیكێن پۆپ و راپ و جۆرێن دیتر ژی یێن مۆزیكا بیانی د ناڤ مۆزیكا كوردی دا هه‌بن، به‌لێ تام و روحیه‌تا مۆزیكا كوردی تێدا هه‌بیت، چونكی هه‌ر ئێك حه‌ز ژ جۆره‌كێ مۆزیكێ دكه‌ت و باشتر ئه‌ڤ جۆره ژی د ناڤ مۆزیكا مه دا هه‌بن.
