دلۆڤان سالح: سه‌رباری ئاسته‌نگان رژدین چو خالان ژ ده‌ست نه‌ده‌ین
چاڤه‌ڕێ یه ل ئه‌ینیا بهێت ده‌مژمێر 4:45 ئێڤاری تیما ته‌پا پێی یا یانا دهۆك ژ ده‌رڤه‌یی یاریگه‌ها خوه ببیته مێڤانا یانا ئه‌كه‌د ل باژێرێ ناسریه ژ چارچووڤێن هه‌ڤڕكیێن گه‌ڕا10 ێ ژ خولا پلا ئێكا عیراقێ.
نوونه‌را پارێزگه‌هێ ئه‌وا ب 15 خالان رێزا پێنچێ دهێت ب هیڤیێن لاواز یێن ده‌ربازبوونێ بۆ پلا نایاب دێ بزاڤێ كه‌ت سێ خالێن دی لسه‌ر داهاتێ خوه یێ رێزبه‌ندیێ زێده‌بكه‌ت پشتی د یاریا بوری دا ل یاریگه‌ها خوه شیابوو ب دو گۆلان بێی به‌رامبه‌ر سه‌ركه‌فتنێ ل سه‌ر یانا مرور یا به‌غدایی بینت، ژلایێ خوه یانا ئه‌كه‌د بتنێ پێنچ خال هه‌نه و رێزا 13ێ و به‌ری دووماهیێ دهێت دێ ب هه‌موو هێزا خوه هێته دناڤ یاریگه‌هێ دا ژبۆ خوه قۆرتالكرنا داكه‌فتنێ بۆ پلا دو، له‌ورا یاری بۆ كوڕێن دهۆكێ ب سانه‌هی نابیت.
داخویانیه‌كێدا دلۆڤان سالح یاریزانێ هێلا ناڤین یێ یانا دهۆكێ بۆ رۆژناما ئه‌ڤرۆ دیاركر كو ئه‌و كێماتیێ بۆ چو تیما نا دانن و بتنێ هزرا سێ خالان دكه‌ن و گوت: سه‌رباری ئه‌وان ئاسته‌نگێن ده‌ستپێكا خولێ كه‌فتینه د رێكا مه دا و هه‌رچار یاریێن بهێز ژ ده‌رڤه‌یی یاریگه‌ها مه بوون، لێ رژدین چو خالان ژ ده‌ست نه‌ده‌ین و به‌رده‌وامین لسه‌ر سه‌ركه‌فتنا پێخه‌مه‌ت ڤه‌گه‌ڕاندنا هیڤیێن ده‌ربازبوونێ.
ژ یاریێن دی یێن رۆژا ئه‌ینی، پێشمه‌رگا سلێمانی- سامرا، به‌حری- سیناعه، روومادی- ئتیفاق، سلیخ- ناسریه، مرور- بابل، میسان- دیالا.
بۆ زانین یانا سیناعه ب23 خالان سه‌رێ لیستێ دهێت، سامرا ب 21خال، ناسریه 16 خال، روومادی و دهۆك 15 خال، به‌حری 14 خالان ل رێزێن دویێ هه‌تا شه‌شێ دهێن، سلیخ ب12 خالان رێزا حه‌فتێ، دیسان هه‌ر ئێك ژ یانێن مرور 10 خال، دیالا و پێشمه‌رگا سلێمانی نه‌ه خال، بابل حه‌فت خال، ئتیفاق شه‌ش و ئه‌كاد و میسان هه‌ر ئێك پێنچ خال كۆمكرینه و رێزێن هه‌شتێ هه‌تا 14ێ و دووماهیێ دهێن.
