ئتیالیا چاڤ ل پلێتا ده‌ربازبوونێ یه و روسیا د مه‌ترسیا دووركه‌فتنێ دایه
چاڤه‌ڕێ یه ئه‌ڤرۆ ده‌ست ب هه‌ڤڕكیێن گه‌ڕا دویێ ژ قۆناغا كۆما یا قاره‌مانیا ئۆرۆپا یۆرۆ 2020 ب ئه‌نجامدانا سێ یاریێن دی یێن پری هه‌ڤڕكی ل سێ وه‌لاتێن جودا بهێنه‌كرن ئه‌وا لدیڤ بڕیارا ئێكه‌تیا ئۆرۆپایی كو قاره‌مانیا ئه‌ڤ ساله ل 11 وه‌لاتان بهێنه كرن.
فنلندا- روسیا
ده‌مژمێر چارێ ئێڤاری یاریگه‌ها گازبرۆم ل سانت پتروس هه‌لبژارتیێ روسیا دێ ب هیڤیێن قه‌ربوویا و هۆژداریا مه‌ترسیێ بۆ دووركه‌فتنێ مێڤانداریا هه‌لبژارتیێ فنلندا ژ چارچووڤێ كۆما دویێ كه‌ت، خودانێن ئه‌ردی د یاریا ئێكێ دا تووشی شكه‌ستنه‌كا مه‌زن بوون هه‌مبه‌ری به‌لجیكا ب سێ گۆلێن پاقژ، ژلایێ خوه‌ڤه هه‌لبژارتیێ مێڤان ب گۆله‌كێ سه‌ركه‌فتن ل سه‌ر دانیمارك ئینابوو هه‌رچه‌نده پێشبینیێن چاڤدێرێن وه‌رزشی بۆ سه‌ركه‌فتنا روسیا دچیت لێ فنله‌ندا ئه‌وا بوویه جهێ سه‌رسۆرمانێ دێ بزاڤێ كه‌ت یاریا ئه‌ڤ شه‌ڤه دا بڕێیا روسیا و بۆ چارا ئێكێ د دیرووكا خوه یا پشكداریێ دا سێ خالێن دی مسۆگه‌ر بكه‌ت و نێزكی ده‌ربازبوونێ بۆ قۆناغا 16ێ بكه‌ت و دێ پشتبه‌ست لسه‌ر گۆلكه‌رێ خوه تیمۆ بۆكی بیت، ئه‌ڤچه‌نده ژی ب سانه‌هی نابیت هه‌مبه‌ری هه‌لبژارتیێ روسیا ئه‌وا دێ بۆ قه‌ربوویا سه‌ركه‌فتنێ و ڤه‌گه‌ڕاندنا هیڤیێن خوه هێته دناڤ یاریگه‌هێ دا ئه‌وا لدویڤ داخویانیا راهێنه‌ر ستانیسلاس چیرچیسۆڤ دیاركری كو دڤێت هه‌موو یاریزان هوژداریێ دابن هه‌ڤڕكا وان ژ سه‌ركه‌فتنێ هاتیه و پێكهاتیه‌كێ ب نهێنی یه لێ گه‌شبینه ئه‌و خه‌له‌تیێن یاریا ل گه‌ل به‌لچیكا چاره‌سه‌ربكه‌ن تایبه‌ت هێلا به‌ره‌ڤانیێ و هێشتا هیڤیێن ده‌ربازبوونێ ماینه و باوه‌ری هه‌یه دێ سه‌ركه‌ڤن.
وێلز- توركیا
پشتی بۆرینا 24 سالان بۆ جارا ئێكێ یه هه‌ردو هه‌لبژارتیێن ته‌پا پێی هه‌مبه‌ری ئێكبن ده‌مێ د یاریا ئه‌ڤ شه‌ڤه دا ل ده‌مژمێر حه‌فتی شه‌ڤ ژ كۆما ئێكێ ئه‌وا دێ یاریگه‌ها باكۆ یا وه‌لاتێ ئازاربێجانێ مێڤانداریا وان كه‌ت، ئامارێن هه‌ردو هه‌لبژارتیان شه‌ش جاران هه‌مبه‌ری ئێك بووینه هه‌لبژارتیێ وێلزێ سێ سه‌ركه‌فتن و توركیا دو سه‌ركه‌فتن ب وه‌كهه‌ڤیه‌كێ یاریێن خوه ب دووماهی ئیناینه، د یاریا ئێكێ یا ڤێ كۆمێ دا هه‌لبژارتیێ وێلزێ شیابوو وه‌كهه‌ڤبیت ب گۆله‌كێ ل گه‌ل سویسرا لێ توركیا خوساره‌تیه‌كا مه‌زن ل سه‌ر ده‌ستێ هه‌لبژارتیێ ئیتالیا دابوو ب سێ گۆلێن پاقژ و دبیت یاریا ئه‌ڤ شه‌ڤه دا بیرهاتنێن یۆرۆیا 2008 ژ ده‌ست بده‌ت ده‌مێ گه‌هشتیه یاریا پێش دووماهیێ، راهێنه‌رێ توركیا سینۆل جیونیس دیاركر كو پلانا یاریا ئه‌ڤرۆ دێ یا سه‌رسۆرمان بیت و توركیا دێ ب دروستاهی یاریا خوه كه‌ت پشتبه‌ستن ب ستێرێن خوه یۆكۆشلۆ، یوسف یازجی گۆلكه‌ر بۆراك یه‌لماز، ژلایێ خوه‌ڤه هه‌لبژارتیێ وێلزێ گه‌شبینه ئاسته‌نگا توركیا ده‌ربازبكه‌ت و به‌رده‌وامیێ بده‌ته هه‌ڤڕكیێ بۆ ده‌ربازبوونێ، وه‌كهه‌ڤیا ل گه‌ل سویسرا هیڤیه‌ك بۆ په‌یداكریه كو كاپتنێ وێ كاریس بێل ئه‌وچه‌نده دیاركری هه‌لبژارتیێن وان شیانێن سه‌ركه‌فتنێ ل به‌رده‌ست هه‌نه.
ئیتالیا- سویسرا
ئێك ژ یاریێن دی یێن بهێز ئه‌وا دێ ئه‌ڤرۆ ل ده‌مژمێر ده‌هی شه‌ڤ هێته كرن كو هه‌لبژارتیێ ئیتالیا دێ مێڤانداریا هه‌لبژارتیێ سویسرا ل یاریگه‌ها ئۆلۆمپیك ل باژێرێ رۆما كه‌ت، هه‌لبژارتیێ ئازۆری ئێك ژ به‌ربژێرێن بهێزه بۆ ب ده‌ستڤه‌ئینانا ناسناڤێ قاره‌مانیێ ژبه‌ر هه‌بوونا كۆمه‌كا خالێن سه‌ركه‌فتنێ، د یاریا بوری دا شیابوو ب سێ گۆلان سه‌ركه‌فتنێ ل سه‌ر توركیا بینیت و هیڤیێن ب ده‌ستڤه‌ئینانا ناسناڤێ دویێ یێ یۆرۆیێ گه‌شتر لێبكه‌ت پشتی ل سالا 1968 بۆ جارا ئێكێ بوویه قاره‌مان سه‌رباری 10 جاران پشكداریێن وێ، كوڕێن رۆبێرتۆ مانشینی ئه‌وێن ب ناڤ وده‌نگ و ب هێزا به‌رگریێ ب سه‌رپه‌رشتیا جورجیۆ كێلینی شیاینه د نه‌ه یاریێن بوری دا تۆرا گۆلا خوه پارێزن و ژلایه‌كێ دیڤه هه‌بوونا هه‌ردو هێرشبه‌رێن گه‌نج شیرۆ ئیمۆبیلی و لۆرێنزۆ ئنیزگی پالده‌ره‌كه كو لڤێ هێلێ پشت گه‌رم بن و سه‌ركه‌فتنێ تۆماربكه‌ن و ده‌ربازبوونا خوه مسوگه‌ر بكه‌ن، لێ هه‌لبژارتیێ سویسرا ئه‌و تیما ب سانه‌هی نابیت وه‌كو توركیا ئه‌وا باشترین ئاست د یاریا بوری ل گه‌ل وێلزێ نیشان دایی لێ دو خال ژ ده‌ستدان و باش دزانن دوباره ژ ده‌ستدانا خالان هیڤیێن ده‌ربازبوونێ بۆ قۆناغا 16ێ ژی نامینن، راهێنه‌رێ وێ فلادیمیۆ بیتكۆڤێچ پێزانین باش ل سه‌ر پێكهاتیێ ئیتالیا هه‌نه ئه‌وێ بۆ رۆژناما لاگازیتا دیلۆ گۆتی من چه‌ندین سالان ل روما كاركریه وه‌كو راهێنه‌رێ لاتسیۆ و دیڤچوونا هێز و كێماتیێن ئیتالیا كریه، تیمه‌كا ب هێزه لێ مه یاریزانێن هه‌ین وه‌كو گرانیت چاكی و جیردان شاكێری، ریمۆ فرۆیله‌ر و بریل ئیمبولۆ، دێ پلانێن خودانێن ئه‌ردی تێكده‌ن و لدیڤ نه‌خشێ مه سه‌ركه‌فتنێ تۆماركه‌ین، هه‌رچه‌نده ئێك ژ به‌ربژێرێن بهێز ئیتالیا یه بۆ ناسناڤی ئه‌م باش ڤێ چه‌ندێ دزانین لێ ته‌پاپێی مفا وه‌رگرتنه ژ هه‌ر هێرشه‌كێ و ده‌لیڤه‌كا گۆلێ.
