ژێكجودابوون د زێده‌بوونێ دایه
ل هه‌مبه‌ر چه‌ند سالێن بوری ژێكجودابوونا هه‌ڤژینان ب ره‌نگه‌كێ به‌رچاڤ د زێده‌بوونێ دایه و جهێن شوله‌ژێ وه‌كو پێدڤی نه‌شیاینه چاره‌سه‌ریا ڤێ یه‌كێ بكه‌ن ب تایبه‌تی ب رێیا پێگه‌هاندنا كچ و كورا به‌ری هه‌ڤژینیێ، شاره‌زایه‌كێ په‌روه‌رده‌یا تایبه‌ت ژی ئه‌گه‌رێن سه‌ره‌كی یێن جودابوونا هه‌ڤژینان به‌رچاڤ دكه‌ت.
ئه‌ڤرۆ، نه‌وزاد هلۆری:
ئیدریس نوری، شاره‌زا د په‌ره‌رده‌یا تایبه‌ت دا بۆ ئه‌ڤرۆ گۆت: (هه‌كه ئه‌م بزڤرین بۆ دیرۆكێ، نه گه‌له‌ك دوور ژی بچین، زێده‌باری كو زانست و سه‌ده‌مێن ژیانا سه‌رده‌م و خوش زور نزم بویه، به‌لێ جودابوونا هه‌ڤژینان زۆر كێم بویه، نوكه زانست و ته‌كنولوژیا و پێشكه‌فتنا ژیانێ ل باشترین ئاسته، به‌لێ جودابوون زۆر زێده بویه و ئامارێن وان مه‌ترسی ل سه‌ر جڤاكی دروست كریه).
ئدریس زێده‌تر گۆت: (ل گوره‌ی ئامارێن جڤاتا دادوه‌ریێ یا هه‌رێما كوردستانێ د ده‌ما هه‌شت سالێن بوری دا، ئانكو ل سالا 2012ێ هه‌تا دووماهیا سالا 2020ێ ل هه‌رێما كوردستانێ 24 هزار و 623 دوسیێن جودابوونا هه‌ڤژینان ل دادگه‌هان هاتینه تومار كرن ئانكو رۆژانه پتری هه‌شت حاله‌تێن جودابوونا هه‌ڤژینان هه‌نه، ئه‌گه‌رێن وان ژی جودا جودانه و ناهێنه هژمارتن، به‌لێ ئه‌م دشێین هنده‌ك ژ وان ئه‌گه‌ران دیار بكه‌ین).
شاره‌زایێ په‌ره‌ردا تایبه‌ت ل بارا وان ئه‌گه‌ران گۆت: (هه‌ڤژینیا به‌ری وه‌خت ئانكو د ژیێ زاروكینیێ یان سنێله‌یێ دا، ئامار وه‌سا دده‌نه دیاركرن كو 24% ژ ئه‌گه‌رێن جودابوونا هه‌ڤژینان بو ڤێ یه‌كێ دزڤریت، دیسان ئه‌گه‌ره‌كا دی دزڤریت بۆ تورێن جڤاكی ب تایبه‌تی د نوكه دا كو جوره به‌رلایی و نه رێكخستن د ب كارئینانا وان دا هه‌یه و چو سانسور ل سه‌ر نینن، دیسان ئه‌گه‌ره‌كێ دی دزڤریت بۆ مایتێكرنا كه‌سێ سێیێ د ژیانا هه‌ڤژینان دا ب تایبه‌تی ژلایێ خزم و كه‌س و كارێن نێزیك، خاله‌كا دی یا ئه‌گه‌رێن جودابوونا هه‌ڤژینان دزڤریت بۆ جوداهیا ئاستێ ره‌وشه‌نبیری و هزر و بیر و ره‌فتارێن هه‌ڤژینان، ژبه‌ركو چه‌ند ئاستێ وان و هزر و بیرێن وان ل هه‌ڤ جودایه، جودابوون پتره و چه‌ند نێزیكه جودابوون ژی كێمتره، دیسان لاوازیا ئیمان و باوه‌ریا هه‌ڤژینان ب بنه‌مایێن ئایینی و جڤاكی هه‌روه‌سا نه‌خوشیێن ده‌روونی و جه‌سه‌دی ژی ئێكه ژ ئه‌گه‌ران و پێدڤیه كچ و كور زور د هشیار بن و ژلایێ كه‌سانێن تایبه‌تمه‌ند بهێنه چاره‌سه‌ر كرن به‌ری پێكئینانا هه‌ڤژینیێ داكو گه‌رنتیه‌ك بۆ هه‌ڤژینا وان دروست بیت).
ماموستا ئدریس د درێژاهیا ئاخفتنێن خوه‌دا ل بارا ئه‌گه‌رێن جودابوونا هه‌ڤژینان گۆت ژی: (خیانه‌ت و ناپاكی ئێكه ژ مه‌زنترین و مه‌ترسیدارترین ئه‌گه‌رێن جودابوونا هه‌ڤژینان هه‌تا خوه كارتێكرنا وێ ل سه‌ر زاروكان ژی هه‌یه و ل سه‌ر وێ یه‌كێ ژی هه‌یه هه‌كه هات و ژێكجودابوون ئه‌و نه‌شێن زوو ب زوو دووباره هه‌ڤژینه‌كا دی پێك بینن، هه‌ردیسان نه ئارامبوون ل ده‌ما دروستبوونا ئاریشه‌یان و گه‌له‌ك چونه دناڤ ئاریشه‌یێ دا و ئینانه بیرا هه‌ڤدوو یا ئاریشێن كه‌ڤن و ره‌خنه و كێماسیان، دیسان هنده‌ك جاران ژی جودابوون ل سه‌را هندێ یه كو جوداكاریه‌كا زۆر ل گه‌ل زارویان دهێته كرن یان ژی ل گه‌ل خزم و كه‌سوكار و دایك و باب و هه‌تا دووماهیێ، جوداهیا ژیێ هه‌ڤژینان ب تایبه‌تی هه‌كه چه‌ندین سال دناڤبه‌را وان دا هه‌بن، خاله‌كا دی یا جودابوونا هه‌ڤژینان دزڤریت بۆ ره‌وشا دارایی و ئابووریا هه‌ڤژینان ب تایبه‌تی یا زه‌لامی هه‌كه نه یا پێدڤی بیت، خاله‌كا دن ژی هه‌یه كو كێم جاران دهێته به‌حسكرن ئه‌و ژی ئه‌وه كو په‌یوه‌ندی ب لاوازیا سێكسی ڤه هه‌یه، دیسان نه‌بوونا چو رومانسیه‌ت و ئه‌شق و ئه‌ڤین دناڤبه‌را هه‌ڤژینان و ره‌خنه و به‌راوردكرن و تومه‌تبار كرنا هه‌ڤدوو ب هنده‌ك كه‌سانێن دی).
ل دوماهیێ ئدریس گۆت: (هه‌ر ئاریشه‌كا جڤاكی و ده‌روونی بێگومان چاره‌سه‌ریا خوه هه‌یه، به‌لێ چاوا گرنگه ئه‌م بو نه‌خوشیان په‌یوه‌ندیێ ب نه‌خۆشخانه و كه‌سانێن تایبه‌تمه‌ند و نوژداران بكه‌ین، دڤێت وه‌سا بۆ ئاریشا خێزانی و جڤاكی ژی راوێژێ ل گه‌ل كه‌سانێن شاره‌زا و تایبه‌تمه‌ند و كه‌سانێن بسپور و خودان سه‌ربور بكه‌ین).
