عیسا مێرگه‌سۆری: مه نه‌ڤێت چاڤێ هونه‌رمه‌ندێ مه ل هاریكاریێ بیت
ئه‌ڤرۆ، سالار محه‌مه‌د دۆسكی:
رێڤه‌به‌رێ كۆمپانیا هێلی ده‌نگ بۆ میدیا به‌لاڤكرنا مۆزیكا كوردی، ئاشكرا كر كو ده‌مێ دو سالانه كار ل سه‌ر ئه‌رشیفكرنا به‌رهه‌مێن سترانبێژێن كورد دكه‌ن ل هه‌ر چار پارچێن كوردستانێ و هونه‌رمه‌ند ب ڤی كاری دبیته خودانێ مادی و مه‌عنه‌ویێ به‌رهه‌مێ خوه.
عیسا مێرگه‌سۆری، رێڤه‌به‌رێ كۆمپانیا هێلی ده‌نگ بۆ میدیا به‌لاڤه‌كرنا مۆزیكا كوردی دناڤا جیهانا دیجیتال مۆزیكێ دا بۆ به‌رپه‌رێ هونه‌ری ل رۆژناما ئه‌ڤرۆ گۆت: كومپانیا هێلی ده‌نگ یا دیتجال مۆزیكێ ل ده‌سپێكا سالا 2019 هاتیه دامه‌زراندن، بنگه‌هێ سه‌ره‌كی ل هه‌ولێرێ یه و نوونه‌ر ل سلێمانیێ و دهۆكێ و پارچێن دی یێن كوردستانێ هه‌نه و مه‌ره‌م ژ دامه‌زراندنێ ئه‌وه به‌رهه‌مێ سترانبێژێن كورد بكه‌ڤیته سه‌ر پلاتفۆرم و سیسته‌مێن دیجتال مۆزیكێ وه‌ك هه‌موو گه‌لێن زیندی و وه‌لاتێن پێشكه‌فتیێن جیهانی.
مێرگه‌سوری گۆت ژی: ل وه‌لاتێن جیهانێ گه‌له‌ك مفا ژ ته‌كنه‌لوژیایێ هاتیه وه‌رگرتن و یا بوویه ڕێكه‌ك ژ بۆ پێشكه‌فتنا وان د گه‌له‌ك بیاڤان دا لێ بمخابنی ڤه هێشتا ل كوردستانێ ب وی ره‌نگی نینه نه‌خاسمه د بیاڤێ موزیك و هونه‌ری دا، هونه‌رێ كوردی گه‌له‌كێ ده‌وله‌مه‌نده و كه‌لتوورێ مه ژ گه‌له‌ك وه‌لاتێن جیهانێ زه‌نگین تر و پێشكه‌فتی تره، چونكو كه‌لتورێ كوردی یێ ده‌وله‌مه‌نده ب مۆزیك و كه‌لتور و فولكلورێ فره ڕه‌نگا خوه، مه دیت گه‌له‌ك كێماسی هه‌یه ل شێوازێ ئه‌رشیفكرن و به‌لاڤكرنا به‌رهه‌می و گه‌له‌ك و گه‌له‌ك ئه‌م چاڤه‌ڕێ بووین داكو ل په‌رلمانێ كوردستانێ و عیراقێ رۆژه‌كێ كه‌سه‌ك به‌حسێ ماف و ده‌رد و ئێشێت هونه‌ر و هونه‌رمه‌ندێن كوردستانێ بكه‌ت لێ مخابن ئه‌و رۆژ هه‌ر نه‌هات و ئه‌م یێن دبینین كو مافێ هونه‌رمه‌ندا گه‌له‌ك یێ دهێته بن پێ كرن و كه‌لتوره‌كێ خراب یا چێ بووی داكو هونه‌رمه‌ند بۆ پێشڤه‌برنا ئه‌رك و كار و هونه‌رێ خوه چاڤێ وی ل هاریكاریا حزب و حوكمه‌ت كۆمپانیا و كه‌سێن جۆر ب جۆر بیت كو ئه‌ڤه ڕێیه‌كا دروست نینه و هونه‌ر زانێت ژ هه‌ژی نه‌شێن هه‌ر جار چاڤێ وان ل ده‌ستێ كه‌سه‌كی بیت ئه‌و بی گه‌له‌ك دیڤچوون من كرن داكو ڕێكه‌كێ ڤه‌بینین كو مفایێ ل ته‌كنۆلۆژیایا پێشكه‌فتی ببینین و ئه‌ڤ ڕێكا نه‌دروست دروست بكه‌ین، ژ لایه‌كێ دی ڤه وێ ئێكی ئه‌م د ئێشاندین كو مۆزیكا كوردی یا دهێته تالانكرن ژ ئالیێ ده‌ردۆرا و نه‌یارا و ل سه‌ر ناڤێ خوه تۆمار دكه‌ن و دكه‌نه ئه‌رشیفێ كه‌لتورێ وه‌لاتێ خوه د ره‌وشه‌كێ دا كو ئه‌سل و ئه‌ساسی وێ كوردیه و كوردستانیه، ئه‌و بوو مه شێوێ پاراستنا ئه‌ڤان به‌رهه‌مان ڤه‌دیت و مه ده‌ست پێ كر ب زه‌حمه‌تی لێ سپاس بۆ خودێ پشتگیریا هونه‌رمه‌ندا ئه‌م سه‌ركه‌فتین و كارێ مه بوری، ئارمانجا مه ئه‌و بوویه خزمه‌تا كه‌لتور هونه‌رێ كوردی بكه‌ین. رێڤه‌به‌رێ كۆمپانیا ناڤهاتی گۆت: كارێ مه ب گشتی ل سه‌ر بنه‌مایێ گرێبه‌ستایه و ده‌مێ رێكه‌فتنێ ل گه‌ل سترانبێژی دكه‌ین به‌رهه‌مێ وی دچیته د ناڤ سیسته‌مێ دیجتال دا كو پتری بیست پلاتفۆرمێن سیسته‌مێ به‌لاڤكرنا مۆزیكێ نه ل دونیایێ كو خه‌لكێ وان وه‌لاتا مفایێ ژێ وه‌ردگرن و د ڕێیا وان سیسته‌ما دا گوهداریا موزیكه‌كا پاقژ دكه‌ن، هه‌ر وه‌كو یا ئاشكرایه هێدی هێدی به‌رهه‌م ل سه‌ر سیدی و كاسێتان نامینیت و هه‌ر هه‌موو به‌رهه‌م و موزیك یێن دبیته دجیتالی و ئه‌ز باوه‌رم ڕێكه‌ك باشتره چونكی مه‌ترسیا نه‌مانێ و به‌رزه‌بوونێ یان ژی خراب بینینێ نامینیت، هه‌تا نوكه زێده‌تری 250 گرێبه‌ستێت فه‌رمی مه ل گه‌ل هونه‌رمه‌ندێن باشور و رۆژهه‌لات و رۆژئاڤا كوردستانێ و كێمه‌كا باكور ژی گرێداینه و كارێ مه خزمه‌تكرنا هونه‌ر و هونه‌رمه‌ندێت كورد دێبیت.
مێرگه‌سوری ئه‌و ژی ئاشكراكر كو كاری ل سه‌ر هه‌موو مۆزیكا دكه‌ن هه‌م كلاسیك و هه‌م یا نوو ژی، سترانبێژێن وه‌غه‌ركری بخوه ڤه دگریت و هه‌تا هونه‌رمه‌ندێن نوو ده‌ست ب هونه‌ری دكه‌ن و گه‌له‌ك هونه‌رمه‌ند هه‌نه بیانی نه به‌لێ ب زمانێ كوردی ستران گۆتینه ئه‌وان ژی دكه‌ینه دناڤا ئه‌رشیفێ كوردی دا و ده‌رگه‌هێ ڤه‌كریه بۆ هه‌ر كه‌سه‌كێ خوه ب هونه‌رمه‌ند بزانیت و خزمه‌تا هونه‌رێ كوردی بكه‌ت.
ناڤبری گۆت: ل گه‌له‌ك وه‌لاتێن جیهانێ هونه‌رمه‌ندێ ده‌وله‌مه‌ند و هاریكاریا خه‌لكی دكه‌ت و به‌رۆڤاژی ل كوردستانێ ره‌وشا ژیانا پرانیا هونه‌رمه‌ندێن كوردستانی یا باش نینه ئه‌ڤه ژی ڤه‌دگه‌ریت بۆ نه‌بوونا یاسایا كۆپی رایت و مافێ هونه‌ری ، هونه‌رمه‌ندێن بیانی ل ده‌رڤه به‌رهه‌مێن وی كوپی رایت دبیت و مفایه‌كێ مادی بۆ پێڤه دهێت و مافی وی یێ پاراستیه، بۆ نمونه ل ئه‌مریكا چه‌ندین سالا پشتی مرنا مایكل جاكسۆن تا نها ژی سالانه ملیونان دۆلار دچن سه‌ر حسابا وی یان كه‌س و كارێن وی بۆ چونكی یاسایا هاتیه دانان و ماف د پاراستینه، هه‌مان سیسته‌م و هه‌مان ته‌كنۆلۆژیا نها مه یا خستیه كار ل كوردستانی و ئه‌م وه‌كو ئێكه‌م كۆمپانیا دڤی بیاڤی دا كار دكه‌ین ل سه‌ر بنه‌مایێ پیڤه‌رێن نێڤده‌وله‌تی.
ناڤهاتی خویا كر كو وان كێشه و گرفت هه‌نه چونكو پێشتر ئه‌ڤ كاره نه‌هاتیه‌كرن ژ ڕوویێ ته‌كنیكی به‌رهه‌مێت كه‌ڤن گه‌له‌ك ئالۆزییت تێدا و كوالێتیا نه‌یا باشه و خودان په‌یڤ و ئاواز دیار نینن تۆمارا وان یا سست و لاوازه لێ ئه‌ڤه بنه‌مایێ موزیكا مه‌نه و ب هه‌ر شیوه‌یه‌كێ بیت ئه‌م وانا سه‌ر راست دكه‌ین و بناڤێ وان هونه‌رمه‌ندان ل سیسته‌ما كۆپی رایتا جیهانێ تۆمارت كه‌ین و دبنه ملكێ كوردستانی كو بۆ جارا ئێكێ یه ئه‌م ڤی كاری دكه‌ین وه‌كو تایبه‌تمه‌ندی و بسپۆری.
عیسی مێرگه‌سۆری كو پێشتر برێڤه‌به‌رێ كوره‌ك موزیك و دامه‌زرێنه‌ری سه‌ته‌لایتا كوره‌كه زێده‌تر گۆت: جوداهی دناڤبه‌را مۆزیكا كوردی دا ل هه‌ر چ پارچا كوردستانێ و چ زاراف بیت ناهێته‌كرن و هه‌ر هه‌موو خزمه‌تا كه‌لتور و فولكلورێ كوردی دهێته‌كرن، ل هه‌ر دو پارێزگه‌هێن هه‌ولێرێ و سلێمانیێ و ڕۆژهه‌لاتێ كوردستانێ زێده‌تر رێكه‌فتن ل گه‌ل هونه‌رمه‌ندان ییت هاتینه‌كرن لێ مخابن ل ده‌ڤه‌را به‌هدینان كێمتر بوویه و ئه‌و ژی هه‌ر بۆ خه‌مساریا مه ڤه‌دگه‌ریت ره‌نگه نه‌شیابین ب دروستی په‌یاما خوه بگه‌هینه هونه‌رمه‌ندان و كارێ خۆ بۆ شڕۆڤه بكه‌ین، لێ نها نوونه‌رێ مه یێ ل دهۆكێ هه‌ی و دێ خوشحال بین سترانبێژێن به‌هدینان ژی رۆلێ خوه بگێرن و رێكه‌فتنا ل گه‌ل كومپانیا مه بكه‌ن چونكو هونه‌رمه‌ندێن باش ل به‌هدینان هه‌نه و پێدڤی ب خزمه‌تێن باش هه‌یه.
ل دووماهیێ عیسی مێرگه‌سوری گۆت: ئه‌ڤ كارێ دهێته‌كرن به‌رهه‌مێ هونه‌رمه‌ندی ناكه‌ینه مولكێ خوه به‌لكو دكه‌ینه مولكێ هونه‌رمه‌ندی و هونه‌رمه‌ند دبیته خودانێ مادی و مه‌عنه‌وی و به‌رهه‌مێ وی دچیته سه‌ر سیسته‌مێ دیجته‌ل مۆزیكێ و ئه‌و هونه‌رمه‌ندێ ئازاده به‌رهه‌مێ خوه ژێ به‌ت و نه‌هێلیت كه‌سه‌ك به‌لاڤ بكه‌ت ئان نه و دشێت هه‌ر گوهورینه‌كێ بكه‌ت، ئان ژی ئه‌گه‌ر كه‌نالا یوتیوبا وێ هه‌بیت ئه‌م دبینه پشته‌ڤان بۆ وی، دیسا هه‌ر سترانبێژه‌كی ئه‌كوانته‌ك بۆ دهێته دروستكرن و ل دووڤ راپورتێ هه‌ر شه‌ش هه‌یڤان جاره‌كێ داهاته‌ك بۆ دچیته سه‌ر هه‌ژمارا وی یا بۆ هاتیه دروستكرن و ئه‌و به‌رهه‌م ب راپورت بۆ هونه‌رمه‌ندی دهێته راده‌ستكرن و هونه‌رمه‌ندێن به‌هدینان حسابا وان دێ چیته دهۆكێ و دێ راده‌ستی وانا هێته‌كرن و ئه‌ڤ كاره ب گشتی ئه‌م بێ به‌رامبه‌ر بۆ هونه‌رمه‌ندا دكه‌ین و ژ داهاتێ وان رێژه‌ك بۆ مه‌یه و یادی ژی بۆ هونه‌رمه‌ند یان كه‌س و كارێت هونه‌رمه‌ندی یان خودانێ‌َ به‌رهه‌می دچیت. هونه‌رمه‌ندێن ده‌ڤه‌رێن دی گه‌له‌ك مفا داربووینه ژ كارێ مه و نێزیكی ٧٠% ێ وان نها گرێبه‌ست دگه‌ل مه ئیمزا كرینه و به‌رهه‌مێن وان هاتینه كوپی رایتكرن. گرێبه‌ست بۆ پێنچ سالان دهێته‌كرن و ب شێوه‌كێ قانوونی ل گه‌ل هونه‌رمه‌ندی دهێته ئیمزاكرن، و پشتێ وێ كارێ پراكتیكی دێهێته كرن و به‌رهه‌مێ هونه‌رمه‌ندی دێ هێته ڕێكخستن و ڤیدیو گرافیك و دیزاین و ئه‌وا پێویست بیت دی بۆ هیته كرن و دێچیته سه‌ر وام كۆگا و ۆلاتفۆرمیت موزیكی ل دیجیتال مۆزیكێ.
