تیما كورته‌بالایێن پارێزگه‌هێ ب ئه‌نجامێن باش ژ به‌غدا ڤه‌گه‌ڕیان
ئه‌ڤرۆ،
تیما هه‌لبژارتیێ كورته‌بالایێن پارێزگه‌ها دهۆكێ بۆ یاریا ته‌پا پێی ب ئه‌نجامێن باش ژ باژێرێ به‌غدا ڤه‌گه‌ڕیان پشتی شیاین ب گه‌هنه چارگۆشا زێرینا قاره‌مانیا ئیراقێ و پێنچ یاریزان بۆ هه‌لبژارتیێ ئیراقێ یێ سه‌ره‌كی و یه‌ده‌ك هاتنه ژێگرتن ئه‌وێن دێ خوه به‌رهه‌ڤكه‌ن بۆ قاره‌مانیێن ئه‌ره‌بی و مۆندیالا جیهانی 2022ێ.
وه‌حید سه‌عید چیچۆ سه‌رۆكێ كورته‌بالایێن پارێزگه‌ها دهۆكێ و شاندنێ هه‌لبژارتیێ ته‌پاپێی بۆ رۆژناما ئه‌ڤرۆ گوت: هه‌لبژارتیێ پارێزگه‌هێ لدیڤ داخازا لایه‌نێ ئیراقێ و وه‌زیرێ وه‌رزش و لاوێن ئیراقێ عه‌دنان درجالی پشكداری قاره‌مانیێ كر ئه‌وا هه‌ڤڕكیێن وێ بۆ ماوێ سی رۆژان ل باژێرێ به‌غدا د هاته كرن ژبۆ به‌رهه‌ڤیێن هه‌لبژارتیێ ئیراقێ بۆ قاره‌مانیێن ئه‌ره‌بی ل مسر و مه‌غرب و هه‌روه‌سان پشكداریا مه‌زن بۆ مۆندیالا جیهانی 2022 ئه‌وا دێ ل وه‌لاتێ ئه‌رجه‌نتینێ هێته ئه‌نجامدان و تیما مه شیا ئه‌نجامێن باش ب ده‌ستخوه‌ڤه بینین ئه‌وژی وه‌كو ئێك ژ باشترین چار تیمێن ل سه‌ر ئاستێ ئیراقێ و هه‌روه‌سا دو یاریزانێن مه ئێكسه‌ر وه‌كو یێن سه‌ره‌كی بۆ ناڤ رێزێن هه‌لبژارتیێ ئیراقێ هاتنه ده‌ستنیشانكرن ئه‌وژی عه‌لی حه‌سه‌ن عه‌لی و مێڤان ته‌وفیق ئه‌حمه‌د و دیسان سێ یاریزانێن دی وه‌كو یه‌ده‌ك هاتنه ده‌ستنیشانكرن ئه‌وژی، حه‌بیب خدر فارس، نه‌وزاد و كاوار زیاد كو ئه‌ڤچه‌نده ژی ئێك ژ ئارمانجێن مه بوو هێز و شیانێن كورته‌بالایێن دهۆكێ بۆ گشت خه‌لكێ ئیراقێ و كوردستانێ دیاربكه‌ین سه‌رباری هه‌ڤڕكیه‌كا بهێز هه‌بوو لێ ئه‌وا د شیان دا یێن مه پێشكێشكر.
ژلایه‌كێ دیڤه ناڤهاتی ئه‌وچه‌نده ژی دیاركر كو نه‌بوونا پشته‌ڤانیێ ئێك ژ خالێن نه‌رێنی نه لسه‌ر ئاست و پێشڤه‌چوونا وه‌رزشا كورته‌بالان و گۆت: هیڤییا مه ئه‌وه ژ لایه‌نێن په‌یوه‌ندیدار و پارێزگارێ دهۆكێ پشته‌ڤانیا وه‌رزشڤانێن كورته‌بالا یێن پارێزگه‌هێ بكه‌ت ژبه‌ركو شیان و رژدی و ڤیان یێن هه‌ین د وه‌رزشێ دا لێ نه‌بوونا پشته‌ڤانیێ و جهه‌كێ تایبه‌ت بۆ راهێنانێن وان كو ب هه‌موو چالاكیێن وانڤه گڕێدایی بیت ئێك ژ ئه‌گه‌رێن ده‌ستدانا هیڤییانه، له‌ورا گه‌شبینم دێ د داهاتیه‌كێ نێزك دا پشته‌ڤانی هه‌بیت.
