سه‌رباری نێزیكبوونا هه‌لبژارتنان زاخۆ ده‌ست ژ به‌رهه‌ڤیان به‌رنه‌دایه
زاخۆ،عه‌لی حاجی:
د داخویانیه‌كێ دا سه‌روكێ یانا زاخۆ یا وه‌رزشی بۆ رۆژناما ئه‌ڤرۆ دیاركر سه‌رباری نێزیكبوونا هه‌لبژارتنێن یانێن كوردستانێ و پارێزگه‌هێ لێ ده‌ست ژ به‌رهه‌ڤیێن خوه بۆ چالاكیێن وه‌رزێ نوو به‌رناده‌ین و هه‌تا نوكه چو لایه‌نا پرسیارا مه نه‌كریه ل دور به‌رهه‌ڤكرنا تیما ته‌پاپێی د خولا نایابا عێراقێ دا .
زێده‌تر حه‌مید سه‌لمانی گۆت: وه‌كو ده‌سته‌كا كارگێریا یانا زاخۆ خوه به‌رهه‌ڤ دكه‌ین كو ده‌ما ڤێ حه‌فتیێ دا دێ لدور پلان و چاوانیا پشكداریا تیمێن خوه د خولێن عێراقێ دا كومبوونه‌كێ ئه‌نجام ده‌ین هه‌رچه‌نده ژڤانێ هه‌لبژارتنێن ده‌سته‌كێن یانه‌یان نێزیكبووینه ژبه‌ر كو وه‌سا هاتیه پێشبینیكرن دناڤبه‌را چریا ئێكێ و دویێ یا ئه‌ڤ ساله دا هه‌لبژارتن بهێنه ئه‌نجامدان لێ دێ به‌رده‌وام بین بۆ به‌رهه‌ڤكرنا تیما خوه ژبه‌ركو ناخازم د ماوه‌یێ سه‌روكاتیا من دا جاره‌كا دی تیم داكه‌ڤیته پله ئێكا ئێراقێ و دێ هه‌موو شیانان مه‌زێخم پێخه‌مه‌تی دروستكرنا تیمه‌كا رێك و پێك و به‌رهه‌ڤ .
ل دور ده‌ستنیشانكرنا راهێنه‌ره‌كێ نوو بۆ تیما خوه سه‌روكێ یانێ دیاركر سه‌رباری راهێنه‌ر عه‌بدولوه‌هاب ئه‌بولهێل د ده‌مه‌كێ كێم دا تیم وه‌رگرت بوو و ئه‌نجام ژی د باش نه‌بوون لێ وی راهێنه‌ری دیاركریه هه‌كه ئه‌و گه‌ل تیمێ بمینیت بۆ وه‌زرێ بهێت دێ تیمه‌كا رێكخستی ئاڤا كه‌ت كو ببیته هه‌ڤڕك، هه‌رچه‌نده وه‌كو كارگێریا یانێ مه راهێنه‌رك دڤێت ب دروستی بشێت تیمێ ب خوینیت و سه‌ره‌ده‌ریێ ل گه‌ل بكه‌ت .
ناڤهاتی ئه‌وچه‌نده ژی گۆت: ل وه‌رزێ بوری بتنێ حكومه‌تا هه‌رێمێ نێزیكی 250 ملیون دینارا هاریكاری ل گه‌ل مه كربوو لێ هه‌تا نوكه ژی چو كه‌سه‌كێ پرسیارا تیما مه نه‌كریه و پێدڤی یه پشته‌ڤانی ل مه بهێته كرن و نابیت ب شێوێ سالا بوری بیت، د ماوه‌یێ ده‌ه رۆژێن بهێت دا دێ بابه‌تێ پروژه‌یێ ده‌وروبه‌رێن یاریگه‌ها زاخۆ یا نێڤده‌وله‌تی ب دووماهی هێت و دێ كار ل سه‌ر هێته كرن ژبه‌ركو پروژه‌كێ گرنگه بۆ یانا زاخۆ كو دێ بیته سه‌ر ژێده‌ره‌كێ باش یێ دارایی.
