مه‌حمود محه‌مه‌د: رێكخستنا هۆلێن وه‌رزشی و پێشخستنا ئاستێ راهێنه‌ران ژ ئارمانجێن خولێ یه
ئه‌ڤرۆ،
ب پشكداریا زێده‌تری 70 راهێنه‌رێن كوڕ و كچ ل سنۆرێ پارێزگه‌ها دهۆكێ خولا راهێنانێ یا باوه‌رناما سی بۆ یاریا له‌شجوانیێ ل هۆلا گرتیا نوونه‌راتیا دهۆك یا لژنا ئۆلۆمپی هاته ئه‌نجامدان ئه‌وا دێ بۆ ماوێ پێنچ رۆژان ب شێوێ تیۆری و پراكتیكی ژلایێ ژماره‌كا مامۆستا و راهێنه‌رێن شاره‌زا به‌رده‌وام بیت.
مه‌حمود محه‌مه‌د سه‌رۆكێ ئێكه‌تیا له‌شجوانیێ ل پارێزگه‌ها دهۆكێ بۆ رۆژناما ئه‌ڤرۆ گوت: لدویڤ پرۆگرام و به‌رنامێ ئێكه‌تیا مه خولا دویێ یا راهێنه‌رێن له‌شجوانیێ كو زێده‌تری 70 راهێنه‌رێن پرانیا باژێر و ناوچه‌یێن سه‌ر ب پارێزگه‌ها دهۆكێ ڤه پشكداری كرینه و دێ لدویڤ نه‌خشه‌كێ رێكوپێك ژلایێ ژماره‌كا ماموستا و شاره‌زایێن پسپۆر د بوارێ وه‌رزشێ و زانستێن چه‌سته‌یی و رێكخستنێ دا ل پارێزگه‌ها دهۆكێ بۆ راهێنه‌رێن هۆلێن وه‌رزشی ب شێوه‌یێ تیۆری و پراكتیكی رۆژانه هه‌تا سێ وانه دێ هێنه شرۆڤه‌كرن پێخه‌مه‌ت وه‌رگرتنا هه‌موو پێزانینا و ببیته جهێ مفایێ ئه‌ڤچه‌نده ژی ب مه‌ره‌م بوویه.
ژلایه‌كێ دیڤه ناڤهاتی دیاركر كو ئه‌ڤ خوله پێنگاڤا دویێ یه پشتی یا ئێكێ ل شوباتا بوری زێده‌تری 100 راهێنه‌رێن هۆلێن وه‌رزشی پشكداری كری و مه‌ره‌ما مه ژی هه‌ر ئه‌وه رێكخستنا هۆلێن وه‌رزشی یه كو هه‌موو راهێنه‌رێن ئه‌وان لدیڤ سیسته‌مه‌كێ درست و زانستی كارێ خوه ئه‌نجامبده‌ن و مفایی ب گه‌هینه هه‌موو پشكدارێن خوه د ده‌مێ راهێنانان دا و هه‌روه‌سان خودان باوه‌رنامه ببنه جهێ باوه‌ریێ و گوت: ل ده‌ستپێكا هه‌یڤا بهێت دێ تاقیكرنێن تیۆری و پراكتیكی بۆ هه‌موو پشكدارێن خولێ هێنه كرن و لدویڤ نمرا دێ باوه‌رناما سێ بۆ هێته دان ئه‌وا ژلایێ ئێكه‌تیا له‌شجوانیا ئیراقێ هاتیه په‌سه‌ندكرن كو دێ ژلایێ مه ڤه راهێنه‌ری ماف هه‌بیت كارێ خوه ل هه‌ر هوله‌كا وه‌رزشی بكه‌ت و مه‌ره‌ما مه ژی بۆ پێشخستنا وه‌رزشا له‌شجوانیێ یه و زێده‌تر پووته‌دان و بلندكرنا ئاستێ وان و خزمه‌تا وه‌رزشا پارێزگه‌ها دهۆكێ یه.
