خوه‌نیشادان ل باشورێ ئیرانێ به‌رفره‌هتر دبن
ئه‌ڤرۆ:
پتر ژ حه‌فتیه‌كێ یه خوه‌نیشادان ل چه‌ندین باژێرێن ئیرانێ كو پرانیا ئاكنجیێن وان عه‌ره‌بن به‌رده‌وام دكه‌ن و چه‌ند رۆژن خوه‌نیشادان به‌رفره‌هتر لێ هاتینه و دوهی ژی گرۆپه‌ك ژ خوه‌نیشاده‌ران ب چه‌كان هێرشی هێزێن ئێمناهیێ یێ ئیرانێ كرن كو ل گۆر زانیاریان د شه‌رێ چه‌ند رۆژێن بۆری دا نێزیكی بیست وه‌لاتیێن سڤیل هاتینه كوشتن و هه‌روه‌سا دو كه‌س ژ هێزێن ئێمناهیێ یێ ئیرانێ ژی جانێ خوه ژ ده‌ست داینه.
به‌ری دو رۆژان په‌یڤدارێ حوكمه‌تا ئیرانێ راگه‌هاند كو ئه‌مریكا، ئیسرائیل، سعوودی و هنده‌ك وه‌لاتێن دی دخوازن ره‌وشا ناڤخوه‌یی یا ئیرانێ ئالۆز بكه‌ن و نها ژی هاریكاریا هنده‌ك گرۆپان دكه‌ن و دخوازن ره‌وشا باژێرێن باشورێ ئیرانێ پتر ئالۆز بكه‌ن.
یوسف عه‌زیزی چالاكڤانێ ناڤدارێ عه‌ره‌ب یێ ئیرانی كو نها ل ئورۆپا دژیت دوهی د داخۆیانیه‌كێ دا بۆ مالپه‌رێ ئه‌لعه‌ره‌بیه فارسی راگه‌هاند كو رژێما ئیرانێ د ماوه‌یێ چل سالێن بۆری دا هه‌موو ژێده‌رێن ئابووری یێن ده‌ڤه‌رێن عه‌ره‌بی ل باشورێ ئیرانێ ژناڤ برینه و نها ژی ئاڤا ڤه‌خوارنێ نینه و خه‌لك ئێدی سیسته‌مێ نها ل ئیرانێ قه‌بوول ناكه‌ت، خوه‌نیشادانێن نها دێ به‌رده‌وام بن و ره‌نگه خوه‌نیشادانێن ل باشورێ ئیرانێ ل ده‌ڤه‌رێن دی یێن ئیرانێ ژی به‌لاڤ ببن.
