سترانێن خوه ب ر ێیا سۆشیال میدیایێ به‌لاڤ دكه‌ن
دهۆك، زنار تۆڤی:
سترانبێژ ئه‌مراه ئوغۆر، كو خه‌لكێ باژێرێ سه‌رحه‌دێ یه ل باكۆرێ كوردستانێ و نوكه ل باژێرێ ئاگری دژیت، د دیداره‌كێ دا بۆ رۆژناما ئه‌ڤرۆ دیاركر كو ئه‌و دناڤ مالباته‌كا هونه‌ری دا مه‌زن بوویه، بابێ وی حوسێن ئوغۆری ل كۆچكو دیوانان ستران دگۆتن و دایكا وی ژی سترانبێژ بوو، ڤێ چه‌ندێ وه‌كریه كو ئه‌و ژی سترانان بێژیت، هه‌روه‌سا خووشكه‌كا وی ژی سترانان دبێژیت.
ناڤهاتی گۆت: هه‌تا نوكه من چه‌ندین سترانێن سینگل گۆتینه و ل سالا 2014 من كلیپا خوه یا ئێكێ ب ناڤێ (تۆ به‌لا سه‌رێ منی) به‌لاڤكریه، هه‌روه‌سا من ل به‌ره د هه‌یڤا بهێت دا دو سترانێن نوو به‌لاڤكه‌م، هه‌ردو ستران ژ په‌یڤ و ئاوازێن منن، د ئه‌ڤ ساله دا ئه‌ز چو ئه‌لبۆمان به‌لاڤ ناكه‌م، به‌لێ دێ هنده‌ك سترانێن سینگل به‌لاڤكه‌م، و ئه‌ز دبینم سترانا كوردی ل باكۆرێ كوردستانێ د ره‌وشه‌كا نه‌باش باش دایه، چنكو ژ ئالیێ ده‌وله‌تا تورك ڤه سانسۆر ل سه‌ر سترانان شۆره‌شگێری یا كوردی هه‌یه، دیسان هه‌موو سازیێن راگه‌هاندنێ یێن كوردی هاتینه گرتن، ڤێ چه‌ندێ زیان گه‌هاندییه مه و ئه‌م نه‌شێین سترانێن خوه ل چو رادیۆ و ته‌له‌ڤزیۆنێن كوردی به‌لاڤ بكه‌ین، ب تنێ ئه‌م دشێین ب ریێا سۆشیال میدیایێ سترانێن خوه به‌لاڤ بكه‌ین، دیسان هه‌تا نوكه د وارێ هونه‌ری دا كه‌سێ هاریكاریا من نه‌كریه، لێ خزمه‌تكرنا هونه‌رێ كوردی ئێكه ژ ئارمانجێن سه‌ره‌كی د ژیانا من دا.
