سابوونا سروشتی یا كوردستانێ ل ده‌مه‌كێ نێزیك دێ كه‌ڤیته بازاری
هه‌له‌بجه، عه‌زیز هه‌ورامی:
شه‌یدا هه‌له‌بچه‌یی، كچه‌كا گه‌نجا خه‌لكا پارێزگه‌ها هه‌له‌بچه‌یه، ل ڤێ دووماهیێ شیایه ب مفاوه‌رگرتن ژ گژ و گیایێ چیایێن كوردستانێ هنده‌ك جۆرێن سابینا سروشتی چێكه‌ت و ئه‌و دبێژیت هه‌كه هاریكاریا وێ بهێته كرن دێ كارێ خوه به‌رفره‌هتر لێ كه‌ت.
ناڤهاتیێ، د دیداره‌كێ دا بۆ رۆژناما ئه‌ڤرۆ گۆت: گه‌له‌گ جاران ب رێیا ئه‌نترنێتێ من به‌رێ خوه ددا هنده‌ك به‌رنامان ئه‌وێن ل دۆر چاوانیا چێكرنا سابینێ هه‌ین، پشتی ده‌مه‌كی هنده‌ك گژ و گیایێ چیای من ئینا و ل ده‌ستپێكێ من سابین بۆ مالا خوه چێكر و پشتی دو سالان من ئه‌ز گه‌هشتمه وێ باوه‌ریێ كو دچێكرنا ڤێ سابینێ دا یا سه‌ركه‌فتی بوویمه، له‌ورا من هزر دوێ چه‌ندێ دا كر كو بۆ فرۆتنێ ژی چێكه‌م، له‌ورا من فه‌یسبووكه‌ك چێكر و ریكلام بۆ وێ سابینێ كر، من دیت خه‌لكه‌كێ زۆر پێشوازی لێكر و داخوزا كڕینێ دكرن، له‌ورا ل فیسته‌ڤالا هناران كو سالانه ل هه‌له‌بچه دهێته كرن من سابینا خوه نیشادا و خه‌لكه‌كێ زۆر كڕین و ئه‌ڤێ چه‌ندێ ئه‌ز هاندام كو پتر ل سه‌ر چێكرنا سابینێ یا به‌رده‌وام بم، هه‌ر دوێ فیسته‌ڤالێ دا دو رێكخراو هاتن كو هاریكاریا وان كه‌سان دكرن یێن كو پرۆژه هه‌ین و دناڤ كومه‌كا زۆرا داخوازیان ب پرۆژێ من رازی بوون و پشته‌ڤانیا خوه دیاركرن بۆ دانانا كارگه‌هه‌كا چێكرنا سابینا سروشتی و پارێ پێدڤی بۆ هاته ته‌رخانكرن، نوكه دایك و باب و خووشك و برایێن من ل گه‌ل من كاردكه‌ن، من ل به‌ره ل وه‌رزێ بهارێ پتر گژ و گیایێ چیایێن هه‌له‌بچه و هه‌ورامان ل خوه خرڤه‌كه‌م و كارگه‌ها خوه به‌رفره‌هتر لێ بكه‌م، هه‌روه‌سا درێیا رۆژناما ئه‌ڤرۆ دا رادگه‌هینم كو ل ده‌مه‌كێ نێزیك دێ سابینا من گه‌هیته هه‌موو بازارێن كوردستانی و بهایێ هه‌ر قالبه‌كی چار هزار دینارن، دووڤدا من ل به‌ره شامپۆیه‌كا تایبه‌ت ب برچێ ڤه چێكه‌م.
