یانا زاخۆ: خه‌له‌تیێن وه‌رزێ بوری دوباره نابنه‌ڤه
زاخۆ،عه‌لی حاجی:
د داخویانیه‌كێدا ئه‌ندامێ ده‌سته‌كا كارگێریا یانا زاخۆ یا وه‌رزشی بۆ رۆژناما ئه‌ڤرۆ دیاركر كو ئه‌و خه‌له‌تیێن وه‌رزێ بوری هاتینه كرن بۆ وه‌رزێ نوو دوباره‌نابنه‌ڤه و دێ پێنگاڤێن باش بۆ رێكخستنا تیما مه یا ته‌پاپێی د خولا ئیراقێ دا هێته هاڤێتن.
زێده‌تر هشیار دوبانكی گوت: ل وه‌رزێ بوری چه‌ند خه‌له‌تی ژلایێ كارگێریێ ڤه هاتبوونه كرن كو بوونه ئه‌گه‌ر ژوانا هنده‌ك یاریزانێن گرنگ تیمێ بجه بهێلن و دێ ل سه‌ر یاریزانی بیته مه‌رج یێ هه‌تا دووماهیا وه‌رزی به‌رده‌وام نه‌بیت گرێبه‌ست ل گه‌ل نا هێته ئیمزاكرن و گه‌شبینین دێ ئه‌نجامێن وه‌رزێ نوو باشتر بین ژبه‌ركو پلانێن باش هاتینه دانان بۆ سه‌ركه‌فتنا كاروانێ تیمێ، ژلایه‌كێ دیڤه مه ئاگه‌ه ژ گازندێن جه‌ماوه‌رێ خوه هه‌یه له‌ورا داخازا بهێنفره‌هیێ ژێ دكه‌ین، مه باوه‌ری 100% ب راهێنه‌ر عه‌بدولوه‌هاب ئه‌بولهێل هه‌یه و هه‌رده‌مێ ئه‌نجام لاواز بوو مه مافێ هه‌یی گرێبیستا وی ب هه‌لوه‌شینین.
لدور بابه‌تێ ئه‌حمه‌د زێرویی ناڤهاتی دیاركر كو هه‌تا سوبه‌هی ده‌لیڤه دایه یاریزانی كو هه‌كه زاخۆ ب جه بهێلیت دڤێت 50 ملیۆن دینارا هه‌مبه‌ری ده‌ستبه‌رداربوونا خوه وه‌ربگریت به‌روڤاژی ئه‌م رێكێ نا ده‌ینێ بۆ چو یانا یارێ بكه‌ت ژبه‌ركو دڤێت پێگیری به‌ندێن گرێبه‌ستا خوه بیت هه‌تا 2022ێ دیسان موئه‌یه‌د عه‌بدولباست بێی مه په‌یوه‌ندی ب یانا كاره‌با كریه سه‌رباری گرێبه‌ستا وی ل گه‌ل یانێ مایه و دڤێت ڤه‌گه‌ریێت و ئه‌ڤرۆ دێ زیاد ئه‌حمه‌د په‌یوه‌ندیێ ب راهێنانێن تیمێ كه‌ت ئه‌وا دوهی ئێكه‌م یه‌كه هاتیه ئه‌نجامدان.
