سازگار ئه‌حمه‌د،: پێدڤیه كارێ راگه‌هاندنێ ل هه‌رێما كوردستانێ بهێته رێكخستن
سلێمانیێ، عه‌زیز هه‌ورامی:
سازگار ئه‌حمه‌د، رۆژنامه‌ڤانا به‌رنیاسا پارێزگه‌ها سلێمانیێ، د دیداره‌كێ دا بۆ رۆژناما ئه‌ڤرۆ دیاركر كو وێ ب خواستا خوه كارێ رۆژنامه‌ڤانیێ هه‌لبژارتیه و نوكه گه‌له‌كا دلخۆش و ئارامه ب وی كاری.
سازگارێ گۆت: ئه‌وا جهێ دلخۆشیێ یه بۆ من نوكه ل پرانیا كه‌نالێن راگه‌هاندنێ هژماره‌كا باشا كچ و ژنان لێ كاردكه‌ن و پرانیا وان خودان شیانن و د ئاسته‌كێ باشدانه، هه‌روه‌سا ئه‌وا ئه‌ز پێ دئێشم ژی هه‌بوونا هژماره‌كا زۆرا كه‌نالێن بێ سه‌رو به‌ره، له‌ورا پێدڤیه سنوره‌ك بۆ بهێته دانان و نه هه‌ر كه‌سه‌ك یان لایه‌نه‌ك بهێت ب كه‌یفا خوه بۆ خوه كه‌ناله‌كی ڤه‌كه‌ت، له‌ورا گه‌له‌كا گرنگه یاسایه‌ك بۆ كارێ میدیایێ بهێته دانان ژبۆ هندێ به‌ره‌لایی نه‌مینیت و گه‌له‌كا گرنگ و پێدڤیه كارێ راگه‌هاندنێ ل هه‌رێما كوردستانێ بهێته رێكخستن.
ناڤهاتی، كو بێژه‌ره، هه‌روه‌سا ئاماده‌كار و پێشكێشكارا به‌رنامه‌كی یه ل مالپه‌رێ (مه‌ودا میدیا) ل دووماهیێ گۆت: جهێ داخێ یه ل هنده‌ك كه‌نالان جوداهی د ناڤبه‌را رۆژنامه‌ڤانێن ژن و زه‌لام دا هه‌یه، هیڤی دارم ئه‌ڤ چه‌نده نه مینیت، و بتنێ ئاریشا من ئه‌وه ده‌مێ بۆ چێكرنا راپورته‌كێ په‌یوه‌ندیێ ب به‌رپرسه‌كی دده‌م یان به‌رسڤا ته‌له‌فونا من ناده‌ت، یانژی ب نه‌شرینی به‌رسڤێ دده‌ن.
