د هه‌موو ژیانا خوه دا ئه‌م فێر بووینه كو خزمه‌تا پێشمه‌رگه‌ی بكه‌ین
دهۆك، شاكر ئه‌تروشی:
خانمه‌كا خه‌لكا دهۆكێ، د دیداره‌كێ دا بۆ رۆژناما ئه‌ڤرۆ دیاركر كو ل گه‌ل ده‌ستپێكرنا شه‌ڕێ داعش وان وه‌كو گرۆپه‌كێ خۆیه‌خش كاركریه و هه‌تا نوكه (675) جاران سه‌ره‌دانا میحوه‌رێن شه‌ڕی كرینه و هه‌ر جاره‌كێ خوارن بۆ پتر ژ (500) پێشمه‌رگان ل گه‌ل خوه برینه.
وه‌حیدا خانم ئاده‌م، كو هه‌ڤژینا ئه‌فسه‌ره‌كێ پێشمه‌رگه‌ی یێ خانه‌نشین كری یه، گۆت: د هه‌موو ژیانا خوه دا ئه‌م فێری وی چه‌ندێ بووینه كو خزمه‌تا دۆزا ره‌وایا ملله‌تێ خوه و بكه‌ین، له‌ورا وه‌ك بنه‌مال هه‌ر ل سالێن شێستان ئه‌م رابووینه ب ئاماده‌كرنا خوارنان بۆ پێشمه‌رگه‌ی و هه‌رده‌م ده‌رگه‌هێ مه بۆ وان یێ ڤه‌كری بوو، له‌ورا ل ده‌مێ ده‌ستپێكرنا شه‌ڕێ داعش مه ب ئه‌رك زانی دوباره خوارنێ ل مالێن خوه چێكه‌ین و بۆ باب و برایێن خوه یێن پێشمه‌رگه‌ی ببه‌ینه به‌رۆكێن شه‌ڕی، ئه‌و بوو هه‌ر ل حه‌فتیا ئێكێ من ژ مالا خوه ده‌ستپێكر و هنده‌ك شه‌ڤان هه‌تا (500) كوتلكان مه چێدكرن و رۆژا دووڤدا بۆ پێشمه‌رگه‌ی دبرن و چو میحوه‌ر نه‌ماینه ئه‌م نه‌چووینێ و گه‌له‌ك جاران ژیانا مه كه‌فتیه د مه‌ترسیێ و بۆمبه و ( ) د رێیا مه‌دا په‌قینه لێ مه خوه نه‌ترساندینه و ئه‌م هه‌رچووینه، چنكو گیانێ مه ژ یێ پێشمه‌رگه‌ی عه‌زیزتر نینه، بۆ زانین هه‌ڤالا مه (فائیزا سه‌لیم) كو ئه‌و به‌رپرسا گرۆپێ مه یێ خوه به‌خشه هه‌رده‌م دگۆتنه من بلا خوارنێن ب زه‌حمه‌ت وه‌ك (كوتل ده‌وك) بۆته بن، چنكو تۆ خۆش چێدكه‌ی و ئه‌م بڤێ چه‌ندێ دسه‌رفرازین و ئه‌وا مه كری ئه‌م ب ئه‌ركێ خوه دزانین و چو منه‌تان ل پێشمه‌رگه‌ی ناكه‌ین، چنكو چاڤێ وان نه ل هیڤیا وێ خوارنێ بوو یا كو ئه‌م بۆ دبه‌ین، به‌لكو چوونا مه بۆ به‌رۆكێن شه‌ڕی بتنێ مه دڤیا مۆرالا پێشمه‌رگه‌ی بلند بكه‌ین و بتنێ یا مه دڤێت مه ژبیرنه‌كه‌ن.
