ناڵه سوپه‌ر: هه‌كه ره‌وشا وه‌رزشێ ڤی شێوه‌ی بیت یانا ئافره‌تێن دهۆك ل پارێزگه‌هێ نامینت
ئه‌ڤرۆ، زنار زوبێر:
جێگرا سه‌روكا یانا ئافره‌تێن دهۆك چه‌ندین بابه‌تێن گرێدای ره‌وشا یانێ و ئیمزاكرنا گرێبه‌ستا كومپانیا لالاڤ و پلانێن یانێ ئاشكراكرن و دیاركر ئه‌گه‌ر ره‌وشا وه‌رزشێ ڤی شێوه‌ی بیت ل سالێن بهێت تاكه یانا ئافره‌تێن دهۆك نامینت و گونه‌ه د ستویێ به‌رپرسێن پارێزگه‌هێ یه.
زێده‌تر ناڵه سوپه‌ر د دیداره‌كا تایبه‌ت بۆ رۆژناما ئه‌ڤرۆ گۆت: نوكه كارگێریا یانێ پێدڤی ب ئاڤاهیه‌كی یه داكو ژ كرێیا ده‌ركه‌ڤیت و خوجه بیت نه‌شێن كارێن یانێ رێكبێخین ژبه‌ركو ژێر فشارا ده‌ركه‌فتنا ڤی باره‌گایی داینه له‌ورا ژ هه‌ژی یه نوكه یانا ئافره‌تێن دهۆكێ كو تاكه یانا كچانه پێدڤی ب ئاڤاهیه‌كی یه سه‌ره‌رایی ته‌مه‌نێ كورت و ده‌ستكه‌فتێن باش و پێنگاڤا ئێكێ ژهه‌ژی باره‌گایه‌كێ خوجهین بشێن كاروبارێن یانێ باشتربكه‌ین هه‌رچه‌نده ماوێ دو سالانه كارگێریا یانێ خوه‌به‌خش كاردكه‌ن و ئه‌ڤچه‌نده ژی بۆ ره‌وشت و گیانێ مه یێ وه‌رزشی ڤه‌دگه‌ریێت كو هه‌ست ب به‌رپرسیاره‌تیێ دكه‌ین لێ هه‌كه ڤی شێوه‌یی به‌رده‌وام بیت شیانێن خوه‌به‌خشیێ هه‌تا راده‌یه‌كی یه و نه‌شێن هه‌تاهه‌تایێ به‌رده‌وام بین و ئه‌گه‌ر ل سالێن بهێت وه‌رزش وه‌كی نوكه بێی پشته‌ڤانی بیت بێ گومان جاره‌كا یانا ئافره‌تان ل پارێزگه‌هێ نه‌مینت و ده‌رگه‌هێ وێ هێته گرتن كو وی ده‌می گونه‌ها كچێن وه‌رزشڤانێن دهۆكێ د ستودیێ به‌رپرسێن پارێزگه‌هێ یه.
ده‌رباره‌ی پشته‌ڤانیا حكومه‌تا هه‌رێمێ بۆ یانێ ناڵه سوپه‌ر گۆت: بشێوه‌یه‌كێ گشتی چو پشته‌ڤانیه‌ك بۆ هه‌موو یانێن كوردستانێ ل ئاستێ پێدڤی نینه تنێ هاریكاریه‌كا بچووك نه‌بیت ژلایێ كارگێریا پارێزگه‌ها دهۆكێ ڤه ب سوپاسی ڤه دهێته كرن كو ئه‌وژی ده‌رگه‌هێ یانێ نه‌هێته گرتن و ئه‌ڤ هاریكاریه ناچیته دچارچووڤێ پشته‌ڤانیێ دا ژبه‌ركو پێدڤیه حكومه‌ت بوودجه‌یه‌كا تایبه‌ت بۆ وه‌رزشی ده‌ستنیشان بكه‌ت تایبه‌ت وه‌رزشا ئافره‌تان.
ناڤهاتی ل دۆر ئیمزاكرنا گرێبه‌ستا یانێ دگه‌ل كومپانیا لالاڤ دیاركر ئه‌ڤ گرێبه‌سته هه‌تا راده‌یه‌كێ باش دێ پشته‌ڤانیا یانێ كه‌ت تایبه‌ت د ڤان كاودانێن خراب یێن دارایی دا ژبه‌ركو كومپانی دێ هه‌موو پێدڤیێن تیما فوتسالا كچان بۆ خولێن ئیراقێ و كوردستانێ ب ستویێ خوه‌ڤه گریت، ئه‌ڤه ده‌ستپێشخه‌ریه‌كا باشه كارگێریا یانێ شیاینه وه‌به‌رهێنه‌ران بكێشینه د وه‌رزشێ دا.
هه‌روه‌سا نالایێ گۆت: مه پلان دانایه پشكداریێن خوه بۆ سالا نوو به‌رفره‌هبكه‌ین ژبه‌ركو شیانێن یاریزانێن تیما فوتسالا یانێ ئارمانجێن مه مه‌زنتركرینه ژ وه‌رزێ بوری له‌ورا مه پلان دانایه پشكداری هه‌ردو خولێن ئیراقێ و كوردستانێ بین و هه‌ڤركیێ بۆ ناسناڤێ خولێ بكه‌ین راسته ئه‌ڤچه‌نده دێ ئاسته‌نگێن دارایی په‌یداكه‌ت لێ پێخه‌مه‌ت په‌یداكرنا مه‌زاختیێن تیمێ و هاتن و چونێ و مافێن یاریزانا بۆ هه‌ردو خولا دێ هه‌موو بزاڤا كه‌ین به‌ری بكه‌ڤینه د هه‌ڤركیێن خولێ دا ڤان كێشه‌یان چاره‌سه‌ركه‌ین، دیسان تیما باسكت بۆلێ ژی هاتیه دانان و نوكه كار لسه‌ر دروستكرنا یاریزانێن ته‌مه‌ن بچووك دكه‌ین پێخه‌مه‌ت پاشه‌روژا پارێزگه‌هێ و یانێ لێ نه‌شێن د ڤی ماوه‌ی دا گه‌له‌ك تیمێن جودا دروست بكه‌ین ژبه‌ركو یانێ ئه‌و شیانێن دارایی نینن زێده‌باری نه‌بوونا هولێن وه‌رزشی بۆ راهێنانان.
نافهاتی گازنده ژ ئێكه‌تیا ته‌پاپێی یا هه‌رێما كوردستانێ كرن ده‌رباره‌ی ده‌ستنیشان كرنا ژڤانێ هه‌ڤركێن خولا فوتسالا كچێن كوردستانێ كو بریاره ل پێنجی كانوونا ئێكێ یا ئه‌ڤ ساله ده‌سپێبكه‌ت ژبه‌ركو دێ هه‌ڤ ده‌م بیت دگه‌ل ده‌واما قوتابخانه و زانكویان و یاریزانێن مه هه‌موو قوتابی نه و پێدڤی بوو به‌ری ڤێ بریارێ هه‌ردو ئێكه‌تیێن ته‌پا پێی یا كوردستانێ و ئیراقێ رێككه‌فتنه‌ك یان تێگه‌هشتنه‌ك هه‌با ده‌رباره‌ی برێڤه‌برنا خولا فوتسالا كچان ژبه‌ركو دێ كێشه بۆ یاریزانێن كچێن كوردستانێ په‌یداكه‌ت چنكو خولا ئیراقێ دبیت برێڤه‌نه‌چیت بێ كچێن كورد و هێزا خولا ئیراقێ ژی گرێدای یانێن كوردستانێ یه و وه‌رزێ بوری ژی هه‌مان كێشه بۆ یانه و یاریزانان په‌یداكرن، هه‌رچه‌نده خولا كوردستانێ وه‌ك روح و نه‌ته‌وه بۆ یانا ئافره‌تێن دهۆك گرنگتره و بهێزتره ژ خولا ئیراقێ لێ ئه‌گه‌ر مه بڤێت یانا ئافره‌تێن دهۆك ل سه‌ر ئاستێ وه‌لاتێن عه‌ره‌بی و ئاسیا ئاشنا بكه‌ین وی ده‌می دڤێت ب هه‌ر رێكه‌كا هه‌بیت پشكداری یا ئیراقێ ژی بین.
