خالد موشیر: بڕیارا دووماهیێ یه و به‌رهه‌ڤم خزمه‌تا یانا دهۆكێ بكه‌م
ئه‌ڤرۆ،
ستێرا ته‌پا پێی یا یانا دهۆكێ خالد موشیر سنوره‌ك بۆ كاروانێ خوه د ناڤ یاریگه‌هێن ته‌پاپێی دانا پشتی بۆ ماوێ 21 سالان ژ یاریكرنێ بۆ یانێن كوردستانێ و ئیراقێ ئه‌وا ب پری ده‌ستكه‌فت و ژێهه‌لی و ژووردانی د مێژوویا خوه دا هه‌ر ژ سالا 2004 و هه‌تا وه‌رزێ ئه‌ڤ ساله دا تۆماركری.
د داخویانیه‌كێدا ناڤهاتی بۆ رۆژناما ئه‌ڤرۆ گوت: بڕیاره‌كا ب زه‌حمه‌ته لێ ئه‌ڤه ته‌پاپێی یه و هه‌ر ده‌ستپێكه‌كێ دووماهی ژی بوو هه‌یه، سۆپاس بۆ هه‌ر لایه‌نه‌ك و یانه‌كا من یاری بوو كری و هه‌ر جه‌ماوه‌ره‌كێ پشته‌ڤانیێن من بووین، د كۆپیتكا ئاستێ خوه دا بووم لێ دڤێت پاشه‌رۆژا خوه ژی به‌رچاڤ وه‌ربگرم ژبه‌ركو من خه‌ونێن مه‌زنتر هه‌نه، د مێژوویا ته‌پاپێی دا یاری بۆ یانێن مووسل، دهۆك، هه‌ولێر، زاخۆ و زێره‌ڤانی و هه‌لبژارتیێ ئیراقێ كرینه و ب شانازی ڤه كاپیتنێ هه‌لبژارتیێ كوردستانێ بوویمه و دیسان خودانێ گۆلا ب ده‌ستڤه‌ئینانا ناسناڤێ ئیراقێ بۆ یانا دهۆكێ بوویمه ل 2010ێ كو ئێك ژ مه‌زنترین دیرووكه بۆ خوه و یانێ تۆماركرینه.
ژلایه‌كێ دیڤه خالد موشیر ئه‌وچه‌نده ژی دیاركر كو ئه‌گه‌رێ ب دووماهی ئینانا كاروانێ خوه ب خاله‌كا دی ژی ڤه‌دگه‌ڕێنیت ئه‌وژی ب سه‌رفه‌رازی و ئاست بلندی بڕیارا خوه دایه و دڤێت رێكێ بوو یایزانێن گه‌نج ژی بهێلیت و گوت: وه‌رزش قۆناغن دڤێت سه‌ره‌ده‌ریی ب شێوه‌كێ باش ل گه‌ل بكه‌ین، من خه‌ونێن مه‌زن هه‌نه كو خزمه‌تا وه‌رزشا پارێزگه‌ها دهۆكێ و كوردستانێ بكه‌م ژوانا كارێ راهێنه‌راتیێ ژبه‌ركو وه‌رزش یا دناڤ خوینا من دا چێگیربووی له‌ورا هه‌موو بزاڤا دكه‌م بۆ پێشئێخستنا وه‌رزشا ته‌پاپێی شێوه‌كێ دی خزمه‌تێ بكه‌م.
بۆ زانین خالد موشیر ژ دایكبوویێ 1981ێ خه‌لكێ پارێزگه‌ها دهۆكێ یه، د ماوێ 21 سالان دا وه‌كو یاریزانێ هێلا به‌ره‌ڤانیێ بۆ یانێن مووسل، دهۆك، هه‌ولێر، زاخۆ، زێره‌ڤانی، هه‌لبژارتیێ كوردستانێ و دیسان 24 یاری بۆ هه‌لبژارتیێ ئیراقێ كریه.
