هه‌لبژارتیێن پارێزگه‌ها دهۆكێ پێدڤی ب پشته‌ڤانیێ نه
ئه‌ڤرۆ،
ئێكه‌تیا ته‌پاپێی یا هه‌رێما كوردستانێ پشككێشانا دو قاره‌مانیێن سه‌ر ئاستێ پارێزگه‌هێن هه‌رێما كوردستانێ كر ئه‌وا دێ هه‌ڤڕكیێن وێ ل باژێرێن دهۆك و سلێمانیێ هێنه ئه‌نجامدان ب پشكداریا پێنچ هه‌لبژارتیێن پارێزگه‌هان ئه‌وژی دهۆك، هه‌ولێر، سلێمانی، كه‌ركووك و هه‌له‌بچه.
یاریا ئێكێ یا هه‌لبژارتیێ لاوێن پارێزگه‌ها دهۆكێ هه‌مبه‌ری هه‌ولێرا پایته‌خت بیت ئه‌وا دێ ل 21ێ ڤێ هه‌یڤێ باژێرێ دۆكان مێڤانداریا وێ كه‌ت، هه‌ردیسان تازه‌پێگه‌هشتیێن پارێزگه‌هێ دێ مێڤانداریا هه‌ولێرێ كه‌ن ل 28ێ هه‌یڤێ، بۆ زانین قاره‌مانی دێ لدویڤ سیسته‌مێ كۆمڤه‌بوون و كه‌تنا دوچاركی ئانكۆ دو خوساره‌تیان دێ ژ قاره‌مانیێ دووركه‌ڤیت.
فه‌رزاد محه‌مه‌د عه‌لی چێگرێ سه‌رۆكێ ئێكه‌تیا ته‌پاپێی یا پارێزگه‌ها دهۆكێ بۆ رۆژناما ئه‌ڤرۆ گوت: ژبۆ پووته‌دان ب شیانێن گه‌نجێن پارێزگه‌هێ مه به‌رهه‌ڤیا خوه دیاركر پێخه‌مه‌ت پشكداریێ د قاره‌مانیا هه‌رێمێ دا بۆ هه‌ردو ئاستێن تازه‌پێگه‌هشتی و لاوان بكه‌ین و بۆ ڤێ یه‌كێ كادرێن راهێنانێ هاتینه ده‌ستنیشانكرن و دێ بزاڤێ كه‌ن باشترین یاریزانێن هه‌موو یانێن پارێزگه‌هێ خرڤه‌كه‌ن ژبۆ پێكئینانا تیمێن خوه و ئارمانجا هه‌ڤڕكیێ بۆ ناسناڤێ كوردستانێ.
هه‌روه‌سا ناڤهاتی گوت: ئاسته‌نگا ئێكانه یا به‌رهه‌ڤیێن هه‌ردو هه‌لبژارتیێن دهۆكێ لاوازیا دارایی یه كو د شیان دا نینه هاتنۆچوونا یاریزانه‌كی ژ ئاكرێ یان زاخۆ یا هه‌ر باژێره‌كێ دی بهێته دهۆكێ له‌ورا داخازێ ژ جهێن په‌یوه‌ندیدار و پارێزگارێ دهۆكێ دكه‌ین پشته‌ڤانیا ئه‌ڤان گه‌نجان بكه‌ن ژبۆ پێشئێخستنا ئاستێ یاریا ته‌پاپێی ل پارێزگه‌هێ و پووته‌دان ب شیانێن وان.
