پایسكلڤانێن دهۆكێ هه‌مبه‌ری ده‌لیڤا زێرینن بۆ ناسناڤێ ئیراقێ
ئه‌ڤرۆ،
د هێته چاڤه‌رێ كرن ئه‌ڤرۆ تیما یانا دهۆك ب ئارمانجا پاراستنا رێزێن پێشیێ پشكداری هه‌ڤڕكیێن قۆناغا دویێ یا قاره‌مانیا ئیراقێ بۆ یاریا پایسكلان ل سه‌ر ئاستێ لاوان بیت، ئه‌وا دێ یاریێن وێ ب پشكداریا 30 یانێن كوردستانی و ئیراقی ل باژێرێ سلێمانیێ هێنه ئه‌نجامدان.
د قۆناغا ئێكێ دا ئه‌وا هه‌ڤڕكیێن وێ ل مه‌ها نیسانا بوری ل باژێرێ دیوانیه هاتیه كرن بۆ به‌ریكانێن جودا یاریزانێن دهۆكێ شیابوون ل سه‌رجه‌مێ گشتی یێن هه‌ردو به‌ریكانێن 80كم و 40 رێزا سێیێ بهێن كو بتنێ چه‌ند چڕكه‌كێن كێم مابوون بۆ رێزێن ئێكێ و دویێ.
بۆ قۆناغا دویێ تارق سه‌عید راهێنه‌رێ تیما یانا دهۆكێ بۆ رۆژناما ئه‌ڤرۆ گوت: لاوێن یانا دهۆكێ وه‌كو نوونه‌رێن پارێزگه‌هێ پشكداری ئێك ژ مه‌زنترین قاره‌مانیێن سه‌ر ئاستێ ئیراقێ یه و ده‌لیڤه‌كا مه‌زن هه‌یه بۆ ب ده‌ستڤه‌ئینانا ناسناڤی ژبه‌ركو بتنێ چه‌ند چڕكه یێن كێم دناڤبه‌را هه‌ڤڕكێن خوه دا هه‌یه، هه‌ر پێنچ یاریزانێن مه سیداد سه‌لام به‌دران، وه‌هبی سلێمان، دلدار حه‌سه‌ن، دیركه‌ت نه‌وزاد و دلشاد فه‌رحان ب باشترین شێوه خوه به‌رهه‌ڤكرینه و رژدین رێزێن پێشیێ پارێزین و هه‌ڤركیێ بۆ ناسناڤێ قۆناغا دویێ بكه‌ین ژبه‌ركو دێ پێنگاڤه‌كا باش بیت به‌ره ب ده‌ستڤه‌ئینانا ناسناڤی، لێ ئه‌ركێ مه ژی ب سانه‌هی نابیت ژبه‌ركو یانێن دی ژی باشترین شێوه خوه به‌رهه‌ڤكرینه.
ژلایێ خوه‌ڤه هشیار فه‌ریق سه‌رپه‌رشتێ تیما دهۆكێ گوت: یانا مه نوونه‌را پارێزگه‌هێ یه د قاره‌مانیا ئیراقێ دا له‌ورا دڤێت باشترین ئاست و ئه‌نجام ب ده‌ستڤه بینن، وه‌كو كارگێری هه‌ر تشته‌كێ پێدڤی بۆ تیمێ هاتیه دابینكرن لدویڤ شیانێن خوه، مه باوه‌ری ب یاریزانێن خوه هه‌یه ده‌لیڤا زێرین یا رێزێن ئێكێ ژ ده‌ست ناده‌ن، راهێنه‌ری خودان شاره‌زاهیه‌كا درێژه و پلانێن باش هه‌نه بۆ چاوانیا سه‌ركه‌فتنا تیما دهۆكێ، گه‌شبینم لاوێن دهۆكێ ژی ئه‌و هێزا هه‌یی بشێن دوباره ناسناڤێ قاره‌مانیێ بۆ پارێزگه‌ها دهۆكێ بینن.
