شڤان حاجی: هه‌لبژارتیێ مه ژ پرانیا یانێن پارێزگه‌هێ یه
ئه‌ڤرۆ،
دهێته چاڤه‌رێكرن ئه‌ڤرۆ تیما ته‌پا پێی یا هه‌لبژارتیێ پارێزگه‌ها دهۆكێ یاریا خوه یا ئێكێ ژ قاره‌مانیا هه‌رێما كوردستانێ بۆ ئاستێ لاوان ل گه‌ل هه‌لبژارتیێ هه‌ولێرێ ئه‌نجامبده‌ت ئه‌وا دێ ل ده‌مژمێر چارێ ئێڤاری ل باژێرێ سلێمانیێ ب پشكداریا هه‌لبژارتیێن، دهۆك، هه‌ولێر،سلێمانی، كه‌ركوك و هه‌لبچه هێته ئه‌نجامدان و یاریێن وان دێ بشێوه‌یێ كه‌تنا دو جاركی ئانكو دو خوساره‌تیا لدویڤ ئێك دێ دووركه‌ڤیت و هه‌ر یاریه‌كا وه‌كهه‌ڤیێ ئێكسه‌ر دێ بۆ لێدانێن په‌نه‌لتیا هێته ئێكلاكرن ئه‌وا دێ بۆ ماوێ شه‌ش رۆژا به‌رده‌وامبیت.
د داخویانیه‌كێدا شڤان حاجی راهێنه‌رێ تیما لاوێن هه‌لبژارتیێ پارێزگه‌هێ بۆ رۆژناما ئه‌ڤرۆ گوت: پشتی ئه‌م هاتینه راسپاردن بۆ پێكئینانا هه‌لبژارتیێ پارێزگه‌ها دهۆكێ هه‌ر زوو مه یاریزانێن یانێن پارێزگه‌هێ ژ دهۆكێ، زاخۆ، سێمێل و ئاكرێ داخوازكربوون و ل دووماهیێ شیاین تیمه‌كێ دروستبكه‌ین، هه‌رچه‌نده سه‌روسیمایێ قاره‌مانیێ دیارنینه ئانكۆ ئاست و هێزا تیمێن پشكدار لێ یا گرنگ بوو مه یاریزانێن یانێن پارێزگه‌هێ مفایی ژێ وه‌ربگرین و هه‌روه‌سا دێ بزاڤێ كه‌ین ب هه‌موو شیانێن خوه هه‌ڤڕكیێ بۆ ناسناڤی ب كه‌ین وه‌كو هیڤییه‌ك، ئه‌ركێ مه ب سانه‌هی نابیت لێ یا د ژیان دابیت دێ به‌رده‌وامیێ ده‌ینه هه‌ڤڕكیێ بۆ ناڤێ پارێزگه‌هێ.
