دهۆكێ هیڤیێن خوه بۆ ناسناڤی گه‌شترلێكرن
ئه‌ڤرۆ
تیما پایسكلڤانێن دهۆكێ سه‌ر ئاستێ لاوان هیڤیێن خوه بۆ ب ده‌ستڤه‌ئینانا ناسناڤێ وه‌رزێ ئه‌ڤ ساله گه‌شتر لێكرن پشتی یاریزانێن وێ شیانێن رێزێن پێشییێ د قاره‌مانیا ئیراقێ دا بینن، د هه‌ڤڕكیێن قۆتاغا دویێ دا ئه‌وا به‌ریكانێن وێ ب پشكداریا زێده‌تری 30یانێن هه‌ریمێ و ئیراقێ بۆ ئاستێن پێشكه‌فتی، لاوان، تازه‌پێگه‌هشتی و كچان ل باژێرێ سلێمانیێ هاتیه كرن.
د داخویانیه‌كێدا هشیار فه‌ریق سه‌رپه‌رشتێ تیما دهۆكێ بۆ رۆژناما ئه‌ڤرۆ گوت: تیما مه شیا سه‌ر ئاستێ لاوان بۆ سه‌رجه‌مێ گشتی رێزا سێیێ بهێت و هیڤیێن ب ده‌ستڤه‌ئینانا ناسناڤی گه‌شتر لێبكه‌ن پشتی یاریزانێ مه وه‌هبی سلێمان سه‌ر ئاستێ تاكی بۆ به‌ریكانا 90كم رێزا دویێ بهێت ب دو ده‌مژمێر و 50خوله‌ك و 28 چركه كو بتنێ ئێك چڕكه دناڤبه‌را ئه‌وی و یاریزانێ ئێكێ هه‌بوو، هه‌ڤالێ وی سیداد سه‌لام رێزا چارێ هات ب دو ده‌مژمێر و 51خوله‌ك و23 چركه، لێ هه‌ڤالێ وان یێ سێیێ دلشاد فه‌رحان ژبه‌ر هنگاڤتنێ د ماوێ به‌ریكانا دا تووشی كه‌تنێ بوو، بڤێ چه‌ندێ هیڤیێن مه د قۆناغا سێیێ و چارێ دا بۆ ب ده‌ستڤه‌ئینان و پاراستنا ناسناڤی گه‌شتر ماینه و ئه‌ڤچه‌نده ژی جهێ ده‌ستخووشیێ یه سه‌رباری ئاسته‌نگێن كه‌فتینه د رێكا یاریزانێن مه دا.
هه‌روه‌سا ناڤهاتی دیاركر كو د قۆناغا ئێكێ دا ژی یاریزانێن مه تیما خوه به‌ره ب رێزا سێیێ گه‌هاند بوو ئه‌وا هه‌ڤڕكیێن وێ ل نیسانا بوری باژێرێ دیوانیه مێڤانداریا وێ كریو گوت: بۆ قۆناغا سێیێ دێ هه‌موو بزاڤا كه‌ین بشێوه‌كێ باشتر خوه به‌رهه‌ڤبكه‌ین ژبه‌ركو یانا مه نوونه‌را پارێزگه‌هێ یه د قاره‌مانیا ئیراقێ دا وه‌كو كارگێری هه‌ر تشته‌كێ پێدڤی بۆ تیمێ لدویڤ شیانا دێ هێته دابینكرن، مه كۆمه‌كا یاریزانێن خودان شیان هه‌نه و هه‌بوونا راهێنه‌ری خودان شاره‌زا گه‌شبینین بۆ ب ده‌ستڤه‌ئینانا ئارمانجا خوه.
