ناز شكری: ئه‌ڤا من كری خزمه‌ته‌كا بچووكه بۆ پرتووكخانا كوردی
دهۆك، شاكر ئه‌تروشی:
ناز شكری، كچه‌كا خه‌لكا دهۆكێ یه، ل چه‌ند رۆژێن بۆری پرتووكا وێ یا ئێكێ، كو ئه‌و ژی وه‌رگێڕانا رۆمانه‌كێ یه ژ زمانێ ئنگلیزی بۆ كوردی ل بن ناڤێ (دلخۆشی د ئاسته‌نگییاندا) كه‌فته بازاری و ب گۆتنا وێ هه‌ر ژنوكه پلانا وێ چه‌ندێ دانایه كو هژماره‌كا دی یا پرتووكێن بیانی وه‌رگێریته سه‌ر زمانێ كوردی و مه‌ره‌ما وێ ب وێ چه‌ندێ ئه‌وه دا پرتووكخانا كوردی پتر پێ زه‌نگین بكه‌ت،
نازێ، كو نوكه قوتابیه ل كولیژا ئه‌ندازیاری ل زانكۆیا ئه‌مریكی ل دهۆكێ، بۆ ئه‌ڤرۆ دبێژیت: ده‌مێ ئه‌ز قوتابی ل ئاماده‌یا میدیا یا نموونه‌ی، ل سالا (2017) ماموستایێ من (ئاشتی) پرتووكه‌كا رۆمانڤیسێ ناڤدارێ ئوسترالی پێشكێشی من كر و گۆته من هه‌كه بشێی ڤێ رۆمانێ بكه كوردی، هه‌لبه‌ت ئه‌و پرتووك ب زمانێ ئنگلیزی بوو، پشتی چه‌ند جاران من خواندی من ده‌ست ب وه‌رگێڕانا وێ كر، لێ هێدی هێدی ژبه‌ركو ئه‌ز قوتابی بووم و من گه‌له‌ك ده‌م نه‌بوو، لێ پشی هاتنا كۆرۆنایێ و مانا مه هه‌موویان د مالدا، ئانكو ل ده‌مێ كه‌ره‌نتیێ خۆش ده‌لیڤه بوو ب دووماهی بینم و ب سوپاسی ڤه هه‌موو خێزانا من پشته‌ڤان بوون، ب تایبه‌ت بابێ من (شكری جه‌میل رۆستینكی) ل سه‌ر ئه‌ركێ خوه پرتووكا من چاپكر، هه‌ر چه‌نده ئه‌ڤا من كری خزمه‌ته‌كا بچووكه بۆ پرتووكخانا كوردی، لێ دێ یا به‌رده‌وام بم و هه‌ر ژنوكه من پلانه‌ك دانایه بۆ وه‌رگێڕانا هژماره‌كا دی یا پرتووكێن بیانی، ب تایبه‌ت ژی شاكارێن ئه‌ده‌بێ جیهانی.
رۆمانا (دلخۆشی د ئاسته‌نگییاندا) ژ (160) به‌رپه‌ران پێك دهێت، ناڤه‌رۆكا وێ ل دۆر قورتالبوونێ یه، ئانكو مرۆڤێن كه‌یفخۆش كا چاوا هزردكه‌ن و دێ چاوا وه‌كو وان بی، هه‌روه‌سا ل دۆر حه‌ز ژێكرنا خوه‌یی یه، كا چاوا د ئاسته‌نگیان دا دێ وه‌كو خوه مینی و دلخۆشبی، ل گه‌ل هنده‌ك چیرۆكێن وان كه‌سان یێن هه‌موو خێزانا خوه، یانژی هه‌موو مولك و پاره‌یێ خوه ژ ده‌ست داین، هه‌روه‌سا ئه‌وێن روودانێن نه‌خۆش و ئاسته‌نگ ب سه‌رێ وان هاتین.
