د چلیا وه‌غه‌ركرنا نڤیسه‌ر و رۆژنامه‌ڤان (ئیسماعیل تاهر جانگیر) دا، داخواز هاته كرن كو ناڤێ وی ل سه‌ر قوتابخانه‌كێ یان جاده‌كا دهۆكێ بهێته دانان
دهۆك، شاكر ئه‌تروشی:
په‌رتووكخانا به‌درخانیان ل دهۆكێ، ب هه‌ڤكاری ل گه‌ل مالباتا نڤیسه‌ر و رۆژنامه‌ڤانێ دێرین (ئیسماعیل تاهر جانگیر) دوهی 22/ 8/ 2021 ئاهه‌نگه‌كا ماته‌مینی ب هه‌لكه‌فتا بۆرینا چل رۆژان ل سه‌ر وه‌غه‌ركرنا وی نڤیسه‌ری كو هه‌تا رۆژا وه‌غه‌ركری رێڤه‌به‌رێ په‌رتوكخانا به‌درخانیان بوو گێڕا و پرتووكا وی یا ئێكێ یا پشتی وه‌غه‌ركرنێ ل بن ناڤێ (دهۆك ژ گونده‌كێ مه‌زن بۆ باژێره‌كێ بچویك) ل سه‌ر به‌رهه‌ڤبوویان هاته به‌لاڤكرن.
بشار عه‌لی، رێڤه‌به‌رێ په‌رتووكخانا به‌درخانیان ب وه‌كاله‌ت، د په‌یڤا ده‌ستپێكرنێ دا گۆت: خودێ ژێ رازی (ئیسماعیل تاهر) ل رۆژا 1/12/ 2015 ببو رێڤه‌به‌رێ په‌رتووكخانا به‌درخیان و دماوێ كاركرنێ دا په‌رتووكخانێ گه‌له‌ك گوهۆرین و پێشڤه‌چوون ب خوه ڤه دیتن، ژوانا كاك ئیسماعیل شیا چار پیرتووكخانێن نوو ل (شێخان، بامه‌رنێ، مانگێشكێ، سێمێلی) ڤه‌كه‌ت، كو ئه‌ڤه ژی ژ ده‌ستكه‌فتێن باش بوون، هه‌روه‌سا پرۆژێ ئیمزاكرنا پرتووكان و گه‌له‌ك چالاكیێن دی، له‌ورا ب وه‌غه‌ركرنا وی زیانه‌كا مه‌زن گه‌هانده په‌رتووكخانێ و ئه‌م هه‌موو گه‌له‌ك پێ ئێشاین و من دیت خه‌لكێ دهۆكێ ب وه‌غه‌ركرنا وی یێ په‌ریشان بوو.
دیاری وه‌ستا عه‌زیز، رێڤه‌به‌رێ گشتی یێ په‌رتووكخانان ل وه‌زاره‌تا ره‌وشه‌نیری، د په‌یڤه‌كێ دا ب ناڤێ وه‌زیرێ ره‌وشه‌نبیری و هه‌موو ستافێ وه‌زاره‌تێ سه‌ره‌خۆشی ل مالباتا خودێ ژێ رازی ئیسماعیل تاهر كرن و ژده‌ست دانا وی ب زیانه‌كا مه‌زن ل قه‌له‌م دا، هه‌روه‌سا داخواز ژ رێڤه‌به‌ریا په‌رتووكخانێ كر كو هولا سه‌ری یا په‌رتووكخانێ ناڤێ وی ل سه‌ر بهێته دانان، هه‌روه‌سا داخواز ژ سه‌رۆكاتیا باژێرڤانیا دهۆكێ و په‌روه‌ردا دهۆكێ كر كو جاده‌ك یان قوتابخانه‌كا دهۆكێ ناڤێ وی ل سه‌ر بهێته دانان.
د. ره‌شید فندی، كو دبیته خالێ رۆژنامه‌ڤانێ خودێ ژێ رازی، د په‌یڤه‌كێ دا بناڤێ بنه‌مالێ ژ ده‌ست دانا كاك ئیسماعیلی ب زیانه‌كا مه‌زن بۆ بنه‌مالێ، هه‌روه‌سا بۆ هه‌موو خه‌لكێ دهۆكێ زانی و گۆت: دناڤ خێزانا مه‌دا كه‌سه‌كێ دیار و ره‌وشه‌نبیره‌كێ ب ره‌وشت و مرۆڤه‌كێ هه‌ڤال خۆش بوو، هه‌روه‌سا ئه‌دیبه‌كێ چالاك و زیره‌ك بوو، و پشتی وه‌غه‌ركرنا وی جهێ وی دناڤ خێزانێ دا مایه ڤالا.
هه‌ر ب وێ هه‌لكه‌فتی هژماره‌كا په‌یڤ و گۆتار و هه‌لبه‌ستان كو ب وه‌غه‌ركرنا وی هاتبوونه نڤیسین هاتنه خواندن.
