ئه‌حمه‌د عه‌دنان: ب زاخا پێشمه‌رگه دێ هه‌مبه‌ری هه‌ڤڕكێن خوه بین
ئه‌ڤرۆ،عه‌لی حاجی :
د دیداره‌كێ دا ئه‌حمه‌د عه‌دنان یاریزانێ تیما خوه‌لێكدانا یانا زاخۆ بۆ رۆژناما ئه‌ڤرۆ دیاركر بۆ ناڤێ زاخۆ دێ گیانێ خوه ئینمه د مه‌ترسیێ دا و ب روحیه‌ت و زاخا وه‌كو پێشمه‌رگه دیِ بزاڤێ بۆ ب ده‌ستڤه‌ئینانا رێزا ئێكێ یا قاره‌مانیێ كه‌م .
زێده‌تر ئه‌حمه‌د عه‌دنان گۆت: بۆ ئێكه‌م جاره ل سه‌ر ئاستێ ئێراقێ قاره‌مانیا پێشكه‌ڤتیان ل 25ێ ڤێ هه‌یڤێ باژێرێ زاخۆ مێڤانداریا وێ بكه‌ت له‌ورا وه‌كو یانا زاخۆ دێ هه‌موو بزاڤا كه‌ین بشێن ئه‌نجامێن باش ب ده‌ستخوه‌ڤه بینن، سه‌رباری هه‌موو تیمێن پشكدار به‌رهه‌ڤیه‌كا باشتر كریه و چه‌ندین یاریزانێن پیشه‌كار یێن وه‌لاتێ ئیرانی ژی كومكرینه، لێ ئه‌م خوه ژ چو تیما كێمتر نابینن و دێ گیانێ خوه ئێخمه د مه‌ترسیێ دا پێخه‌مه‌تی ناڤێ یانا زاخۆ و هه‌ر چو نه‌بیت بشێم رێزا ئێكێ بده‌ستخوه‌ڤه بینم كو دێ هێته هژمارتن ب هێزترین قاره‌مانی ژبه‌ركو ل دویڤ راپۆرتا ئێكه‌تیا ئێراقێ یا یاریا خوه‌لێكدانێ نێزیكی 60 تیمی دێ پشكداربن ئه‌ڤچه‌نده به‌لگه‌یه كو ئه‌ركێ مه ژی ب سانه‌هی نابیت.
ناڤهاتی ئه‌وچه‌نده ژی گۆت: دێ ب كێشا 125كگم پشكداربم كو ئێك ژ ب هێزترین و گرانترین كێشایه كو هه‌ڤڕكی تێدا یا دژواره، سه‌ره‌رایی سێ یاریزانێن مه دێ یاریێ بۆ تیمێن ژبلی زاخۆ كه‌ن هه‌كه ل گه‌ل تیما مه پشكداری كربا بێ گومان پێشبینیا هه‌ڤركیێ بۆ ناسناڤی دهاته كرن.
