ژ جوانیا ره‌نگێن سروشتی ره‌نگڤه‌دانه‌كا گرنگ د كه‌ڤالان دا هه‌یه
دهۆك، هه‌رهین محه‌مه‌د:
شێوه‌كار (هادی هونه‌ر) د دیداره‌كێ دا بۆ رۆژناما ئه‌ڤرۆ دبێژت: ب دیتنا من سروشت ژێده‌ره‌كێ سه‌ره‌كی یێ شێوه‌كاری یه و شێوكارێ دروست په‌یوه‌ندیه‌كا مه‌زن ب ڤه‌گوهاستنا سروشتی ڤه هه‌یه كو ئه‌و دیمه‌نێن د سروشتی دا هه‌ین ب دانیته سه‌ر كه‌ڤالی، به‌لێ ئه‌ڤ په‌یوه‌ندیه گه‌له‌ك جاران ژ دۆرهێلی دچیته ده‌رێ ب شێوه‌كێ ئه‌كادیمی و زانستی و د شێوه‌كاری دا دمینت و هونه‌رمه‌ند ب ڤی ره‌نگێ زانستی و ئه‌كادیمی نیشا ده‌ور و به‌رێن خوه دده‌ت، و ژ جوانیا ره‌نگێن سروشتی ره‌نگڤه‌دانه‌كا گرنگ دكه‌ڤالان دا هه‌یه، له‌ورا ئه‌ز گه‌له‌ك كه‌ڤالێن سروشتی چێدكه‌م ل سه‌ر شێوازێ ریالزمی من گه‌له‌ك جاران روودانێن ده‌ور و به‌رێن من وه ل من دكه‌ن كه‌ڤالان ل سه‌ر چێكه‌م.
هه‌روه‌سا گۆت: دیزاینا وێنه‌كێشانێ پشكه‌كه ژ هونه‌رێ شێوه‌كاری، به‌لێ كومه‌كا خالێن هه‌ڤپشك هه‌نه د ناڤبه‌را شێوه‌كاریێ و دیزاینێ دا و د نێزیكی ئێكن و ئه‌ڤ نێزیكیه ژی وه دكه‌ت كو كارێ من ب ساناهی تر بیت بۆ من و د هه‌ر پشكه‌كێ دا هزر بابه‌ت دگرنگن و كاركرنا ب ئامیره‌كێ ته‌كنه‌لۆژی ب ساناهی تره وه‌كو ره‌نگ، به‌لێ كه‌ڤالێن ره‌نگا و ره‌نگ بۆ خه‌لكی سه‌نج راكێشترن و هه‌موو ده‌مان من گۆتیه هونه‌ر ئاره‌زو نینه بتنێ راهێنانن ب تایبه‌تی هونه‌رێ وێنه‌كێشان و دیزاین كومه‌كا یاسا و رێكاران هه‌نه و پێدڤیه هونه‌رمه‌ند یێ شاره‌زابت و ب هشیاری یاسا ل سه‌ر كارێ خوه ب جه بینت و ئه‌ڤه ئه‌گه‌ره‌كه هه‌موو كه‌س دشێن ببنه شێوه‌كار، یان دیزاینه‌ر، به‌لێ هه‌كه ئه‌كادیمی بیت دێ بیته خودانێ شێوازێ كاركرنا وی و دێ چیته دناڤ خه‌لكی و دێ به‌رنیاس بیت.
