ناجی حه‌سه‌ن: ئێكه‌تیا ته‌پا پێی شكه‌ستن د بوارێ پێشئێخستنا دادڤانان دا ئینایه
ئه‌ڤرۆ، زنار زوبێر:
دادڤانێ به‌رێ یێ پارێزگه‌هێ ره‌خنه‌یێن توند ئاراسته‌ی ئێكه‌تیا ته‌پا پێی یا پارێزگه‌هێ كرن و دیاركر ده‌ستنیشانكرنا لژنا دادڤانان سه‌ر بنیاتێ هه‌ڤالینی و رازیكرنێ یه و چه‌ندین ساله شكه‌ستن د بوارێ پێشئێخستنا دادڤانێن پارێزگه‌هێ دا ئینایه.
زێده‌تر سه‌رپه‌رشت و هه‌ڵسه‌نگێنه‌رێ دادڤانان ناجی حه‌سه‌ن د دیداره‌كا تایبه‌ت دا بۆ رۆژناما ئه‌ڤرۆ گۆت: چه‌ند كه‌سان زێده‌تری بیست ساله سه‌رپه‌رشتیا ئێكه‌تیا ته‌پا پێی یا پارێزگه‌ها دهۆكێ دكه‌ن بێی كو بشێن پێنگاڤه‌كێ د پێشئێخستنا دادڤانه‌كێ ل ئاستێ بلند دروستبكه‌ن تنێ مژوولی ڤه‌كرنا خولێن (c) یێن راهێنه‌رانه پێخه‌مه‌ت مفا و به‌رژه‌وه‌ندیه‌كا دارایی و وه‌لێهاتیه نوكه راهێنه‌ر زێده‌ترن ژ یاریزانان ل پارێزگه‌ها دهۆكێ.
نافهاتی ئه‌وچه‌نده ژی دیاركر ده‌ستنیشانكرنا لژنه‌یا دادڤانان ل ئێكه‌تیا پارێزگه‌هێ سه‌ر بنیاتێ هه‌ڤالینی و رازیكرنا چه‌ند كه‌سانه و ده‌لیڤێ ناده‌نه چو كه‌سێن گه‌نج بهێن خزمه‌تێ و كاره‌كێ باشتر بكه‌ن و ماوێ چه‌ندین سالانه ئه‌ڤ ئێكه‌تیه دگه‌ل هه‌موو لژنێن دادڤانێن پارێزگه‌هێ نه‌شیاینه خوله‌كێ بۆ پێشئێخستنا شیانێن دادڤانان ڤه‌كه‌ن و بێی هه‌لویستن بۆ كێشه‌یێن وان زێده‌ترباری ڤێ چه‌ندێ راهێنانێن بكوم یێن دادڤانان نینن كه‌مپه‌كێ راهێنانێ ژی بۆ ناهێته دانان هه‌ر چو نه‌بیت لژنه‌یه‌كا رێكاری بۆ رێكخستنا كارێ دادڤانان د قاره‌مانیێن مللی دروست نه‌كریه یان به‌ره‌ڤانیێ ژ دادڤانه‌كێ خوه بكه‌ت د ده‌مێ په‌یدابوونا كێشه‌یه‌كێ دا.
ل دووماهیێ ناجی حه‌سه‌ن گۆت: ئه‌ز كورێ دهوكێ مه و ناسنامه و كارتا زانیاری و یا ئازوقه‌یی دهۆكه لێ نوكه ئێكه‌تیا ته‌پا پێی یا پارێزگه‌هێ دبێژیته من تۆ سه‌ر ب پارێزگه‌ها نه‌ینه‌وا ڤه‌ی ئه‌ڤه ژی بۆ وێ چه‌ندێ ڤه‌دگه‌ریت كو ئه‌ز دژی كارێ وان یێ خه‌له‌تم و هه‌رده‌م ره‌خنێ دكه‌م بۆ باشتركرنا كارێ وان.
