ئازاد ئه‌حمه‌د: به‌رهه‌ڤی د جودانه و پیشه‌كارێ بێی تاقیكرن ناهیته وه‌رگرتن
ئه‌ڤرۆ،
د داخوانیه‌كێد سه‌رپه‌رشتێ تیما ته‌پاپێی یا یانا دهۆك دیاركر كو بۆ وه‌رزێ نوو یێ خولا پلا ئێكا ئیراقێ كارگێریێ هه‌رزو پلانه‌كا رێكخستی دانایه ژبۆ باشترین به‌رهه‌ڤی و رژدیا ده‌ربازبوونێ بۆ پلا نایاب و هه‌ر تشته‌كێ پێدڤی ل دویڤ شیانا دێ بۆ كادرێ راهێنانێ هێته به‌رهه‌ڤكرن.
زێده‌تر ئازاد ئه‌حمه‌د بۆ رۆژناما ئه‌ڤرۆ گوت: سه‌رباری وه‌رزێ بوری ژی ئارمانجامه ده‌ربازبوون بوو لێ به‌رهه‌ڤیێن ئه‌ڤ ساله د جودان ژ سالێن بوری و ئارمانجێن مه د مه‌زن و رژدین كو وه‌رزێ نوو تیما خوه یا ته‌پا پێی ل پلا نایاب ببینن، له‌ورا به‌ری ده‌ستپێكرنا خولێ ئه‌وا دێ ل ناڤه‌راستا چڕیا ئێكێ یا بهێت ده‌ستپێكه‌ت مه پلانه‌كا رێكخستی دانایه و هه‌رزوو كادرێ راهێنانێ راسپیاردیه بۆ ده‌ستنیشانكرنا یاریزانێن نافخۆ و ده‌رڤه ژبۆ ئیمزاكرنا گرێبه‌ستا ئه‌وان و لدویڤ داخوازیا راهێنه‌ری حه‌فتیا بهێت دێ ده‌ست ب راهێنانا هێته كرن، هه‌روه‌سا نوكه‌دا ئه‌م دانوستاندنێ ل گه‌ل چار یاریزانێن وه‌لاتێن ئه‌فریقی و بولگاریا دكه‌ین و دیسان چه‌ند یاریزان ژ ناڤه‌راست و باكورێ ئیراقێ ل سه‌ر هێلن ژوانا دو گۆلپارێزێن خودان سه‌ربۆر.
ژلایه‌كێ دیڤه ناڤهاتی ئه‌وچه‌نده ژی گوت: هه‌ر یاریزانه‌كێ پیشه‌كار دهێته دناڤ پێكهاتیێ تیمێ دا دێ بۆ ماوه‌كێ لبن تاقیكرنان بیت هه‌رده‌مێ راهێنه‌ر ژ ئاستێ وی رازی بوو و چو هنگافتن نه‌بن ژنو دێ گرێبه‌ستا وی هێته ئیمزاكرن، دیسان ئه‌ڤرۆ هه‌تا سوبه‌هی دو گۆلپارێز ژ یانێن ئیراقێ دێ گه‌هنه دهۆكێ ژبۆ ئیمزاكرنا گرێبه‌ستا خوه پشتی راهێنه‌رێ تیمێ ژ ئاستێ وان رازی بووی، دیسان هه‌تا چار یاریزان ژ یانێن هه‌رێمێ دانوستاندن ل گه‌ل دهێنه‌كرن ئه‌وژی به‌ره ب دووماهیێ ڤه‌نه.
بۆ زانین كادرێ راهێنانێ یێ تیما ته‌پاپێی یا خولا ئیراقێ پێكهاتیه ژ عادل ناسر راهێنه‌ر، محه‌مه‌د یوسف هاریكار، حه‌یده‌ر كازم راهێنه‌رێ گۆلپارێزان، ئازاد ئه‌حمه‌د راهێنه‌رێ له‌ش سڤكیێ و گرێبه‌ستا چه‌ند یاریزانێن خوه یێ وه‌رزێ بوری نووكرنه ژوانا ئه‌حمه‌د سه‌بری،وه‌لید سه‌لمان، عه‌لی نوری، سیابه‌ند عه‌گید، محه‌مه‌د سه‌عید، حه‌سه‌ن ئه‌حمه‌د و دلۆڤان سالح دیسان هه‌تا ئه‌ڤرۆ دێ گرێبه‌ستا پرانیا یێن مایی هێنه ئیمزاكرن.
