هونه‌رێ په‌یكه‌رسازیێ ل كوردستانێ د ئاسته‌كێ باش دایه
زاخۆ، عه‌لی حاجی:
سارا دلشاد، كچه‌كا شێوه‌كار و په‌یكه‌رسازه ل باژێرێ هه‌ولێرێ دژیت، د دیداره‌كێ دا بۆ رۆژناما ئه‌ڤرۆ دگۆت: مه‌رچ نینه كه‌سێن په‌یكه‌رساز كه‌سێن ئه‌كادیمی بن، ژبه‌ركو گه‌له‌ك جاران به‌هره‌یا هونه‌رمه‌ندی كارێن سه‌رنچ راكێشتر ئه‌نجام دده‌ت.
زێده‌تر گۆت: هه‌رچه‌نده نوكه ئه‌و چه‌نده بوویه مه‌رج، به‌لێ پا كه‌سێن خودان به‌هره دشێن ب رێیا هنده‌ك كه‌سان بنه‌مایێن ئه‌كادیمی بوونێ بزان، به‌لێ هه‌كه ئه‌كادیمی بیت باشتره ژبه‌ركو هونه‌رمند دێ زێده‌تر شاره‌زا بیت، ئه‌ز ب خوه ل گه‌ل هندێ مه هونه‌رمه‌ند خودان به‌هره بیت و یێ ئه‌كادیمی بیت ژبه‌ركو ئه‌و كه‌سه دێ شێت پتر شیانێن خوه دیار كه‌ت، هه‌تا راده‌یه‌كێ هونه‌رمه‌ندێن مه د وارێ په‌یكه‌رسازیێ دا شیاینه كارێن باش و مه‌زن بكه‌ن، ژبه‌ر وێ چه‌ندێ دشێم بێژم هونه‌رێ په‌یكه‌رسازیێ ل كوردستانێ د ئاسته‌كێ باش دایه،
ل دووماهیێ گۆت: ئه‌ز به‌رده‌وام دخوازم نوویانیان د كارێ خوه یێ په‌یكه‌رسازیێ دا بكه‌م و ماموستایێن من د ڤێ چه‌ندێ دا رۆله‌كێ باش هه‌نه و په‌یكه‌رسازی پشكه‌كه ژ شێوه‌كاریێ، به‌لێ پتر ل گه‌ل په‌یكه‌رسازیێ یا ئارامم، ژبه‌ركو هونه‌ره‌كێ سێ ره‌هه‌ندی یه و دخوازم ژی وه‌كو ملله‌تێن یونانی و مسریان ب رێیا هونه‌رێ په‌یكه‌رسازیێ پێنگاڤێن باش پاڤێژم و خزمه‌تا ملله‌تێ خوه بكه‌م.
