ميليشياتێن شيعان: د دو رۆژێن بهێت دا دێ ل ناڤ كه‌ركووك دا بين
ئه‌ڤرۆ نيوز:
سه‌رۆكێ رێكخراوا به‌در گه‌فێن چوونا ناڤ كه‌ركووك دكه‌ت و دده‌ته دياركرن ئه‌و دێ ل دو رۆژێن داهاتى ل ناڤ كه‌ركووك بيت و هيڤى دكه‌ت قاسم سلێمانى فه‌رماندێ فه‌يله‌قا قودس ژى ل وێرێ ئاماده بيت.
هادى عامرى سه‌رۆكێ رێكخراوا به‌در و سه‌رپه‌رشتيارێ مه‌يدانى يێ ميليشياتێن حه‌شه‌د شه‌عبى گه‌فان دكه‌ت ب چوونا هێزێن خوه ڤه بۆ ناڤ كه‌ركووك بۆ ئاگه‌هدار بوون ژ ره‌وشا باژێرى، ژ به‌ر ئه‌و هێرشێن به‌رى دو حه‌فتيان ژ لاىێ چه‌كدارێن داعش ڤه كريه سه‌ر كه‌ركووك ل وێ پارێزگه‌هێ.
ژێده‌ره‌كى ب ئاژانسا فرانس پرێس راگه‌هاند كو د چه‌ند رۆژێن داهاتى دا هێزێن حه‌شه‌د شه‌عبى دێ چنه ناڤ كه‌ركووكێ و هيڤى دكه‌ت قاسم سلێمانى ژى فه‌رماندێ فه‌يله‌قا قودس يا ئيرانى ژى ل وێرێ ئاماده بيت بۆ ئاگه‌هدار بوون ل سه‌ر پرۆسا حه‌شه‌د شه‌عبى ل وێ ده‌ڤه‌رێ.
ئاماژه ب وێ چه‌ندێ ژى كر كو هێزێن حه‌شه‌ند شه‌عبى پشتى گازيا عه‌لى سيستانى مه‌رجه‌عێ شيعان ل عيراقێ پێكهاتيه و فه‌توا پێدڤى يا خوه‌به‌خشىن و شه‌ركرنێ دژى داعش ده‌رخستيه بۆ ده‌رچوون و پاراستنا مه‌زارگه‌هێن ئاينى و پاراستنا ئه‌ردێ پيرۆز يێ شيعان ل عيراقێ.
ژ لايێ خوه ڤه محه‌مه‌د عوبێدى ئه‌ندامێ جڤاتا نوونه‌رێن عيراقێ راگه‌هاند كو هه‌بوونا كۆمه‌كا چه‌كدارێن شيعه ل كه‌ركووك دێ زێده‌تر بيته ئه‌گه‌رێ به‌لاڤبوونا تايفه‌گه‌ريێ د ناڤبه‌را نه‌ته‌وه‌يێن كه‌ركووكا زه‌نگين ب پترۆلێ دا.
تۆمه‌تێن مه‌زن ژ لايێ لايه‌نێن سونى يێن عيراقێ ئاراسته‌يى هێزێن حه‌شه‌د شه‌هبى دهێنه كرن ب ئه‌نجامدانا تاوانێن شه‌رى دژى وه‌لاتيێن سونه ل ديالا پشتى ئازادكرنا ده‌ڤه‌رێ ژ ده‌ستێ داعش و ئه‌ڤه‌يه ئه‌ڤرۆ رێكخراوا چاڤدێريا مافێن مرۆڤى هيومه‌ن رايتس وچ راگه‌هاندى كو ميليشياتێن هه‌ڤپه‌يمان ل گه‌ل ده‌زگه‌هێن ئه‌منى يێن عيراقێ تاوانێن شه‌رى ل ديالا ئه‌نجام داينه.
پێشتر د. كه‌مال كه‌ركووكى ژى ئه‌ندامێ مه‌كته‌با سياسى يا پارتى ديموكراتى كوردستان و به‌رپرسێ ميحوه‌رێ رۆژئاڤايێ كه‌ركووك “كه‌ركووك – دوبز” بۆ مالپه‌رێ فه‌رمى يێ پارتى ديموكراتى كوردستان راگه‌هاند بوو كو كه‌ركووك پێدڤى ب حه‌شه‌د شه‌عبى نينه.
گۆتژى: “د كۆمبوونا لايه‌نێن سياسى يا كه‌ركووك دا ئه‌ڤ چه‌نده يا هاتيه پشتراستكرن و ئه‌و حه‌شه‌د شه‌عبى ره‌ت دكه‌ن”.
دابوو زانين ژى كو پێشمه‌رگه‌يى يا سه‌لماندى كو ئه‌و ب تنێ به‌سن بۆ به‌ره‌ڤانيكرن ژ كه‌ركووكێ و ئه‌و دێ جوداهى هه‌موو وه‌لاتيێن كه‌ركووك وه‌كو ئێك د پارێزن و ل دووڤ داخوازيا هه‌موو لايه‌كى نه.
