هنگڤین
به‌ده‌ل ره‌ڤۆ
د به‌رمایێن شارستانیه‌تان دا…
د قولاچێن تۆزا چه‌رخێن كه‌ڤنار گرتی دا..
د بیرهاتنێن سه‌د سالێن بۆری دا…
ل هنگڤینی دگه‌ریێم!!
***
د ده‌م و قۆناغێن شۆره‌شان دا…
د دیرۆك و رۆژێن خانمان دا…
د له‌یزین گرنژینێن زارۆكێن كوردان دا..
د عشقا سۆفیا و سه‌رفرازیا گه‌لان دا…
ل هنگڤینی دگوریێم!!
***
د كولان و شه‌قامێن باژێرێن كه‌ڤن دا..
د سروشتێ گوندێن كوردستانێ دا..
د دلسۆژیا زارۆكێن هندستانێ دا..
د شعر و غه‌ریبی و غوربه‌تا هۆزانڤانان دا..
ل هنگڤینی دگه‌ریێم
***
د رووبارێن جوانیا هۆزانێن ئه‌ڤینێ دا..
د ئاگرێ خه‌ریبیێ دا…
د ئازادی و خوناڤا وه‌لاتی دا..
دكه‌نی و رۆندك و پاییزا ژانێن دلان دا..
د چل و چیان دا..
د ره‌نگێ شینێ باژێرێ شیفشاون دا..
ل هنگڤینی دگه‌ریێم!!
***
ژیێ من وێ دبۆریتن و
ل هنگڤینی دگه‌ریێم
كانێ هنگڤین..؟
كانێ وه‌لات..؟
كانێ تو..؟
