سالح كه‌كۆ: ب ده‌ستڤه‌ئینانا دان شه‌ش ده‌رگه‌هێ خولێن نێڤده‌وله‌تی ڤه‌كریه
ئه‌ڤرۆ،
د داخویانیه‌كێدا راهێنه‌رێ یانا دهۆك و هه‌لبژارتیێ ئیراقێ بۆ یاریا كیك بۆكسینگێ دیاركر پشتی شیایی كه‌مه‌را ره‌ش یا دان شه‌ش ب ده‌ستڤه بینت دێ بیته ده‌رگه‌ه بۆ ڤه‌كرنا خولێن نێڤده‌وله‌تی كو ژلایێ ئێكه‌تیێن عه‌ره‌بی و جیهانی ڤه په‌سه‌ندكر بیت.
زێده‌تر سالح كه‌كو بۆ رۆژناما ئه‌ڤرۆ گوت: هه‌رچه‌نده دڤیابا به‌ری چارده سالان من كه‌مه‌را ره‌ش یا دان شه‌ش وه‌رگرتبا لێ ژبه‌ر كاودانێن دارایی و كورونایی نه‌شیاین پشكداری خول و تاقیكرنێن ده‌وله‌تی بم، لێ ب سۆپاسی ڤه پشتی قاره‌مانیا عه‌ره‌بی هاتیه پارێزگه‌ها دهۆكێ ل گه‌ل چه‌ند یاریزان و راهێنه‌رێن یانێن دهۆك و زاخۆ ب ده‌لیڤه دیت كو ب به‌رهه‌ڤبوونا سكرتێرێ گشتی یێ ئێكه‌تیا نێڤده‌وله‌تی و سه‌رۆكێ ئێكه‌تیا عه‌ره‌بی پشكداری تاقیكرنێن كه‌مه‌رێن ره‌نگین بین ئه‌وێن پله بلندكرنا یاریزانا و ب سه‌ركه‌فتیانه باوه‌رنامێن خوه وه‌ربگرین.
هه‌روه‌سا ناڤهاتی گۆت: وه‌كو راهێنه‌ر ل سه‌ر ئاستێ یاریا كیك بۆكسینێ ل ئیراقێ و كوردستانێ ئێكه‌م كه‌س ژبلی ئه‌ندامه‌كێ لژنا تاقیكرنان ب گه‌همه ڤێ پلێ لێ یا گرنگ و مفایێ ڤێ باوه‌رنامێ ژلایێ ئێكه‌تیێن ده‌وله‌تی و عه‌ره‌بی باوه‌رپێكری یه بۆ ڤه‌كرنا خول و تاقیكرێن نێڤده‌وله‌تی و بلندكرنا كه‌مه‌ران ئه‌ڤچه‌نده ژی دێ بیته پالده‌ر بۆ خزمه‌تا یاریزان و وه‌رزشا پارێزگه‌هێ ب تایبه‌تی و كوردستانێ ب گشتی له‌ورا دێ بزاڤێ كه‌م ده‌مه‌كێ نێزیك باشترین شێوه خزمه‌تا ڤێ یاریێ بهێته كرن ب دانانا خولێن بهێزكرنێ و بلندكرنا كه‌مه‌رێن یاریزانێن مه و دیسا ببمه پره‌ك بۆ پشكداریێن نێڤده‌وله‌تی.
بۆ زانین ل پارێزگه‌ها دهۆكێ سێ یاریزانێن زاخۆ و دو یێن دهۆكێ بۆ دان دو هه‌تا سێ پشكداری تاقیكرنێن ئێكه‌تیا عه‌ره‌بی بوون ئه‌وا ل ڤێ دووماهیێ ب هه‌ڤپشكی ل گه‌ل ئه‌نجامدانا قاره‌مانیا عه‌ره‌بی ل سه‌ر ئاستێ هه‌لبژارتیان و یانا هه‌ر ژ 27ێ هه‌تا 31ێ ته‌باخا بۆری بۆ ماوێ پێنچ رۆژان پارێزگه‌ها دهۆكێ مێڤانداریا وێ كری كو تێدا یانا دهۆك سه‌ر ئاستێ لاوان بوو قاره‌مانا یانێن عه‌ره‌بی.
