پێنگاڤا ئێكێ یا ئافره‌تێن دهۆكێ دێ جودا بیت ژ هه‌ڤڕكیان
ئه‌ڤرۆ، زنار زوبێر:
د داخویانیه‌كێدا سه‌روكا یانا ئافره‌تێن دهۆك یا وه‌رزشی دیاركر تیما وان دێ پشكداری قاره‌مانیا باسكت بۆلا ئیراقێ بیت ئه‌وا بریاره ل دووماهیا ڤێ هه‌یڤێ هه‌ڤركیێن وێ ده‌سپێبكه‌ت.
زێده‌تر چریسك یونس د داخویانیه‌كا تایبه‌ت دا بۆ رۆژناما ئه‌ڤرۆ گۆت: مه بریار دایه پشكداری قاره‌مانیا ئیراقێ با باسكت بۆلا كچان بین ئه‌وا بریاره ل 29 ڤێ هه‌یڤێ ل باژێرێ هه‌ولێری بهێته كرن ب شێوازێ كوم و نوكه تیما مه د به‌رهه‌ڤیان دایه بۆ هه‌ڤركیێن قاره‌مانیێ.
نافهاتی ئه‌وچه‌نده ژی دیاركر بۆ جارا ئێكێ یه تیما وان پشكداری قاره‌مانیا باسكت بۆلێ دبیت و ئه‌وان تیمه‌كا یاریزانێن ته‌مه‌ن بچووك دروستكریه و ئارمانج ژ ڤێ پشكداریێ هه‌ڤركی بۆ ناسناڤی نینه به‌لكو وه‌رگرتنا شاره‌زایێ و به‌رهه‌ڤكرنا یاریزانێن گه‌نجه بۆ پاشه‌رۆژا یانێ ژبه‌ركو تنێ ماوێ دو هه‌یڤایه تیم هاتیه پێك ئینان و هه‌موو ژی یاریزانێن ته‌مه‌ن بچووكن كو كار لسه‌ر دروستكرنا شه‌نگسته‌ی دكه‌ین بۆ یانێ لێ بۆ ڤێ قاره‌مانیێ دێ هه‌ولده‌ین ل ماوێ بهێت سێ یاریزانێن خودان سه‌ربور ژی دگه‌ل تیمێ پشكداركه‌ین و راهێنه‌ر ژی راسپاردیه كو پێكهاته‌كێ ژ هه‌میان باشتر به‌رهه‌ڤ بكه‌ت بۆ ڤێ قاره‌مانیێ كو چو نه‌بیت ب ئه‌نجامه‌كێ گه‌له‌ك خراب ڤێ قاره‌مانیێ ده‌رنه‌كه‌ڤین.
هه‌ژی گوتنێ یه باسكت بۆلا ئافره‌تێن دهۆك ب سه‌رپه‌رشتیا راهێنه‌رێ خودان شیان پاییز مه‌رعان به‌رهه‌ڤیان دكه‌ن و نوكه دا زێده‌تر بیست یاریزانێن بچووك د ڤێ تیمێ دا هه‌نه.
