به‌رهه‌ڤیێن دهۆكێ ب كه‌مپه‌كێ راهێنانێ ده‌ستپێكرن
ئه‌ڤرۆ،
تیما ته‌پاپێی یا یانا دهۆك ده‌ست ب به‌رهه‌ڤیێن خوه كرینه ب دانانا كه‌مپه‌كێ راهێنانێ یێ نافخویی و ده‌ستنیشانكرنا چه‌ند یاریێن هه‌ڤالینی ژبۆ باشترین به‌رهه‌ڤی بۆ وه‌رزێ نوو یێ خولا پلا نایابا كوردستانێ.
د داخویانیه‌كێدا هه‌رمان سالح راهێنه‌رێ تیما ته‌پا پێی یا یانا دهۆكێ بۆ رۆژناما ئه‌ڤرۆ گوت، ئه‌ڤه بۆ ماوێ سێ رۆژه مه ده‌ست ب پلانا خوه یا به‌رهه‌ڤیان كریه بۆ وه‌رزێ نوو یێ خولا كوردستانێ كو پێكهاتیه ژ كه‌مپه‌كێ راهێنانێ رۆژانه دو یه‌كێن ل دانێ سپێدێ و ئێڤاری دهێنه كرن ژبۆ ڤه‌گه‌راندنا له‌ش سڤكی و چه‌سته‌یا یاریزانا و نێزكبوونا وان كو دێ بۆ ماوێ حه‌فتیه‌كێ بیت دیڤدا دێ ده‌ست ب قۆناغا دویێ كه‌ین ئه‌وژی راهێنان ب شێوه‌كێ دی بن ل گه‌ل هه‌بوونا هه‌تا چه‌ند یاریێن هه‌ڤالینی ل نافخۆ و ده‌رڤه‌یا باژێرێ دهۆكێ هێنه كرن پێخه‌مه‌ت زانینا ئاست و شیانێن یاریزانێن مه و دروستكرتا پێكهاتیه‌كێ به‌رهه‌ڤ بۆ هه‌ڤڕكیێن خولێ.
ژلایه‌كێ دیڤه ناڤهاتی ئه‌وچه‌نده ژی دیاركر كو ژلایێ كارگێریێ ڤه داخواز ژ وی هاتیه كرن یاریێ بۆ مانا تیمێ د خولێ دا بكه‌ن و نه‌هێلێت داكه‌ڤیت بۆ پلا ئێك و گوت: لێ وه‌كو راهێنه‌ره‌ك هیڤی و ئارمانجێن من نه بتنێ دێ مانا خولێ بیت به‌لكو بزاڤێن هه‌ڤڕكیێ ژی دێ هێنه كرن، سه‌رباری تیما مه ژ پێكهاتیه‌كێ نوویه كو هنده‌ك یاریزان ژ ئاكرێ و یانا زاخۆ و گاره هاتینه و دیسان هه‌تا پێنچ یاریزانێن تیما لاوان هاتینه سه‌رئێخستن، له‌ورا ئه‌ركێ مه ب سانه‌هی نابیت بۆ تیمه‌كا بهێز و هه‌ڤڕكی د خولێ دا بكه‌ین لێ دێ رژدبین باشترین شێوه به‌رهه‌ڤبین ب دو ئارمانجا دروستكرنا تیمه‌كا بهێز بۆ وه‌رزێ دویڤدا و هه‌ڤڕكی بۆ ب ده‌ستڤه‌ئینانا خالێن هه‌ر یاریه‌كا ئه‌م دكه‌ین.
