نۆشدارێن ئه‌مریكی دێ هژماره‌كا نشته‌رگه‌ریان بۆ زارۆكان ل دهۆكێ كه‌ن
دهۆك، له‌زگین جوقی:
رێڤه‌به‌رێ نه‌خۆشخانا هیڤی یا زارۆكان ل پارێزگه‌ها دهۆكێ دیار كر، شانده‌كێ نۆشدارێن ئه‌مریكی بۆ ئه‌نجامدانا نشته‌رگه‌ریان قه‌ستا پارێزگه‌ها دهۆكێ كریه و هژماره‌كا پێدڤیێن نشته‌رگه‌ریان ژی دگه‌ل خوه دا ئیناینه بۆ خزمه‌تكرنا زارۆكێن نه‌خۆش.
د. نزار به‌كر، رێڤه‌به‌رێ نه‌خۆشخانا هیڤی یا زارۆكان ل پارێزگه‌ها دهۆكێ بۆ رۆژناما ئه‌ڤرۆ دیار كر، 16 نه‌خۆش یێن هاتینه به‌رهه‌ڤكرن و دێ ژلایێ نۆشدارێن ئه‌مریكی ڤه نشته‌رگه‌ری بۆ وان هێنه ئه‌نجامدان و گۆت: “ئه‌و نۆشدارێن ئه‌مریكی بۆ ده‌مێ حه‌فت رۆژان دێ هه‌ڤكاریا رێڤه‌به‌ریا گشتی یاساخله‌میا پارێزگه‌ها دهۆكێ كه‌ن”.
گۆتژی: “هه‌ر نشته‌رگه‌ریه‌كا د شیان دا نه‌بیت ل دهۆكێ بهێته كرن، ژلایێ وی شاندێ نۆشدارێن ئه‌مریكی ڤه دێ هێته كرن، هه‌روه‌سا نۆشدارێن ئه‌مریكی دێ خوله‌كێ بۆ نۆشدارێن دهۆكێ ڤه‌كه‌ت بۆ وی چه‌ندێ نشته‌رگه‌ریێن نوو بۆ زارۆكێن نه‌خۆش ل دهۆكێ بهێنه كرن”.
ئاشكرا ژی كر، ئه‌و شاندێ نۆشدارێن ئه‌مریكی ب هه‌ماهه‌نگی دگه‌ل نۆشدارێن زارۆكان ل دهۆكێ هه‌تا دووماهیا ڤێ حه‌فتیێ نشته‌رگه‌ریان بۆ زارۆكان دێ ئه‌نجام ده‌ن، رۆژانه پێنج زارۆكێن نه‌خۆش دێ هێنه دیتن و نشته‌رگه‌ری بۆ هێته كرن.
د. نزار زێده‌تر گۆت: “هه‌موو نشته‌رگه‌ری ب رێیا نازۆرێ دێ هێنه كرن و زكێ زارۆكێن نه‌خۆش ناهێته ڤه‌كرن، به‌لكو بێ ڤه‌كرنا زكی نشته‌رگه‌ری دێ هێنه كرن”.
