په‌روه‌ر حسێن: ده‌ربازبوونا سێمێلێ بۆ پلا نایاب ب زه‌حمه‌ته
ئه‌ڤرۆ،
د داخویانیه‌كێدا چێگرێ سه‌رۆكێ یانا سێمێل بۆ رۆژناما ئه‌ڤرۆ دیاركر كو كه‌یفخووشین ب بڕیاره‌كا دادپه‌روه‌رانه یا ئێكه‌تیا ته‌پا پێی یا كوردستانێ دوباره تیما مه ڤه‌گه‌ڕاندیه پلا ئێك و ئه‌ڤچه‌نده ب مافێ خوه دبینن و دێ بزاڤێ كه‌ین باشترین شێوه خوه به‌رهه‌ڤبكه‌ین سه‌رباری لدووڤ شیانێن مه ده‌ربازبوون بۆ پلا نایاب ب زه‌حمه‌ته.
زێده‌تر په‌روه‌ر حسێن گۆت: پشتی كو ب فه‌رمی بڕیارا سه‌رئێخستنا تیما مه هاتیه دان هه‌رزوو كارگێریا یانێ ده‌ست ب ئاماده‌كاریا كریه و ل گه‌ل چه‌ندین یاریزانان كۆمبووینه پێخه‌مه‌ت دروستكرنا تیما خوه بۆ وه‌رزێ نوو یێ خولا پلا ئێك ژبۆ پشكداریه‌كا سه‌رفه‌راز و ئارمانجێن مه‌زن سه‌رباری لدووڤ شیانێن به‌رده‌ست كو تێرا وێ چه‌ندێ ناكه‌ن ئه‌م پلانا بۆ هه‌ڤڕكیا ده‌ربازبوونێ بكه‌ین لێ ده‌ستان ژێ به‌رناده‌ین و دێ بۆ سه‌ركه‌فتنان یاریان ئه‌نجامده‌ین، له‌ورا مه په‌یوه‌ندی ب چه‌ندین یاریزانێن باژێرێ دهۆك، زاخۆ و مووسل كرینه و ئه‌و مینحا ژ پارێزگه‌هێ بۆ پرانیا یانا دهێت ژوانا سێمێلێ دێ بزاڤێ كه‌ین بشێن كارێن خوه پێ رێڤه‌ببه‌ین بۆ مووچه و پێدڤیێن یاریزانا و تیمێ ژبه‌ركو كاورانێ خولێ درێژه و هه‌تا 23 یاریان دێ ئه‌نجامده‌ین ئه‌ڤچه‌نده ژی پێدڤی مه‌زاختیه‌كێ مه‌زنه بۆ هاتنوچوونێ و ئۆتێلا ده‌مێ دچنه سلێمانیێ، لێ هه‌رچه‌وابیت مه پلانێن رێكخستی هه‌نه بۆ برێڤه‌برنا كارێن خوه لدووڤ شیانان.
ژلایه‌كێ دووڤه ناڤهاتی ئه‌وچه‌نده ژی دیاركر كو به‌ری ده‌ستپێكرنا وه‌رزێ نوو دێ ده‌سته‌كا تایبه‌ت یا جه‌ماوه‌رێ سێمێلێ هێته پێكئینان ژبۆ رێكخستنا پشته‌ڤانیكرنێ و نیشاندانێن جوان یێن جه‌ماوه‌رێ سێمێلێ كو هه‌رده‌م حه‌ز ژێكرێن ته‌پا پێی نه و روویێ دروست یێ خه‌لكێ سێمێلێ دیاركه‌ین ئه‌وژی ڤیانه، رێزگرتن و پشته‌ڤانیه‌كا شارستانیه.
هه‌روه‌سا چێگرێ سه‌رۆكێ یانا سێمێلێ گوت: سۆپاس بۆ هه‌ر لایه‌نه‌كێ پشته‌ڤانیا مه كر ژبۆ ڤه‌گه‌ڕاندنا یانا سێمێل بۆ پلا ئێك كو پشتی غه‌در ل مه هاتیه كرن ژلایێ دادڤانان و دیسان سۆپاسیا پارێزگه‌رێ دهۆكێ دكه‌ین كو مینحه‌كا هه‌یڤانه بۆ هه‌موو یانا دانایی ژوانا سێمێلێ یه، هیڤیدارین ژ لایه‌نێن په‌یوه‌ندیدار و حكومه‌تێ ئه‌و ئاریشێن مه هه‌ین چاره‌سه‌ربكه‌ن ژبه‌ركو ئه‌و مینحا دهێت تێرا هندێ ناكه‌ت هه‌ڤڕكیێ بۆ پلا نایاب بكه‌ین.
