سۆنه‌تكرنا زارۆی د حه‌فتیا ئێكێ دا تشته‌كێ شاشه
دهۆك، له‌زگین جۆقی:
نۆشداره‌كێ زارۆیان ل پارێزگه‌ها دهۆكێ دیاركركو د حه‌فتیا ئێكی دا ده‌مێ زارۆك دهێته سه‌ر دونیایێ باش نینه بهێته سۆنه‌تكرن، چونكو ئاریشه‌یێن ساخله‌میێ بۆ هنده‌ك ژوان زارۆیان دروست دبن یێن حه‌فتیا ئێكی دا ده‌مێ ژدایك بن دهێنه سۆنه‌تكرن.
د. سه‌ردار غازی پێداوی، تایبه‌تمه‌ندێ نه‌خۆشێن زارۆیان ل نه‌خۆشخانا هیڤی یا زارۆیان دهۆكێ ئاشكه‌را كر كو:” سۆنه‌تكرنا د حه‌فتیا ئێكێ دا ژ دایكبوونا زارۆی تشته‌كێ زۆر شاشه دهێته كرن و ئه‌م حه‌ز دكه‌ین خه‌لكێ مه زارۆیێن خوه حه‌فتیا ئێكێ دا سۆنه‌ت نه‌كه‌ن، هنده‌ك كه‌س هه‌نه هزر دكه‌ن هه‌كه د حه‌فتیا ئێكێ دا زارۆی سۆنه‌ت بكه‌ن زارۆك نا ئێشیت و سۆنه‌تكرنا وی زوو دێ ساخ بیت و زه‌ركا زارۆی ژی دێ به‌ت، و گۆت: چو په‌یوه‌ندیا سۆنه‌تكرنا زوو یا زارۆی ب زه‌ركێ ڤه نینه، ئه‌و زه‌ركا ب سۆنه‌تكرنێ بچیت ئه‌و ب خوه دێ چیت و نه گرێدای سۆنه‌تكرنێ یه و چو ئاریشه دناڤ خوینا زارۆی دا نینن، له‌ورا ئه‌و زه‌رك زوو چاره‌سه‌ردبیت و هه‌كه ئاریشه‌ك د خوینا زارۆی دا هه‌بیت ئه‌و زارۆ بهێته سۆنه‌تكرن و نه‌هێته سۆنه‌تكرن ئه‌و زه‌رك دێ هه‌ر مینیت، ژبه‌ر ڤێ چه‌ندێ ئه‌م دبێژین سۆنه‌تكرن دحه‌فتیا ئێكێ دا ژ دایكبوونا زارۆی چو په‌یوه‌ندی ب زه‌ركێ ڤه نینه.
گۆتژی:” سۆنه‌تكرن گه‌له‌ك یا خه‌له‌ته دهه‌یڤێن ئێكێ دا ژ دایكبوونا زارۆی بهێته‌كرن، چونكو ئه‌ڤه گه‌له‌ك حاله‌ت مه دیتن ب تایبه‌تی ژی من دیتینه زارۆ ژیێ وی چار سال و پێنج سال بووینه هه‌رده‌م گازنده ژ زكێ خوه كرینه دبێژن زكێ من دئێشیت پشتی ئه‌م پشكنینا وی زارۆی دكه‌ین دێ بینین كونكا وی یا به‌رته‌نگه و گه‌له‌ك یا بچووكه و ده‌مێ ئه‌و زارۆك دچیته ده‌ستئاڤا زراڤ وی ده‌می راست و راست ناچیت، به‌لكو یا ده‌رڤه یا بهێزه بۆ سه‌ری دچیت، ژبه‌ركو سه‌ركێ ئه‌ندامێ وی یێ نێرینه یێ ته‌نگه و ئه‌م دێ پسیار كه‌ین دێ دایك بێژن مه حه‌فتیا ئێكێ دا یێ سۆنه‌تكری .
د. سه‌ردار ئه‌وژی دیاركر كو به‌هرا پتر یا وان زارۆیان ژی ئه‌ون یێن حه‌فازه گه‌له‌ك به‌ردا دمینن ئه‌وژی كارتێكرنێ دكه‌ت، چونكو ده‌مێ زارۆ دهێنه سۆنه‌تكرن و حه‌فازه بۆ ده‌مه‌كێ درێژ ل به‌ر زارۆی دا بمینیت فشار ل سه‌ر سه‌رێ ئه‌ندامێ وی یێ نێرینه دروست دبیت وه‌كو هه‌ودانێ بیت وته‌نگ د بیت ، له‌ورا ئه‌م به‌رده‌وام دبێژینه نه‌ساخێن خوه پێدڤیه حه‌فازه گه‌له‌ك به‌ر زارۆی نه‌مینیت هه‌ر چه‌ند ده‌مژمێران بێ حه‌فازه بمینیت باشتره داكو فشار ل سه‌ر له‌شێ وی كێم ببیت و باشتره زارۆ زوو بهێته فێركرن بۆ ده‌ستئاڤێ، هنده‌ك زارۆ هه‌نه ژیێ وان سێ سال وچار سالن هیشتا دایكێن وان فێری ده‌ستئاڤێ نه‌كرینه ئه‌ڤه تشته‌كێ باش نینه.
ناڤهاتی ته‌كه‌ز كركو پشتی سێ هه‌یڤیێ باشتره زارۆك بهێته سۆنه‌تكرن داكو تووشی ئاریشه‌یێن ساخله‌میێ نه‌بیت ده‌مێ مه‌زن دبیت هه‌تا جل وبه‌رگێن ته‌نگ ژی بۆ زارۆی دباش نینن.
