ڤه‌كۆله‌ره‌كێ ناڤدار یێ توركیا: توركیا دڤێت ببیته بهێزترین هه‌ڤپه‌یمانا ئه‌مریكا ل ده‌ڤه‌رێ
ئه‌ڤرۆ:
نڤیسه‌ر و ڤه‌كۆله‌ره‌كێ ناڤدارێ توركیا راگه‌هاند كو په‌یوه‌ندیێن توركیا و رۆسیا ئالۆز بووینه و ده‌مه‌كه ب فه‌رمانا ئه‌ردۆگانی چه‌ندین به‌رپرسێن توركیا كار ل سه‌ر هندێ دكه‌ن كو جاره‌كا دی په‌یوه‌ندیێن توركیا و ئه‌مریكا باش ببن و هه‌تا نها ژی هه‌لوه‌ستێ ئه‌مریكا دیار نینه.
موراد یێتكین نڤیسه‌ر و ڤه‌كۆله‌رێ ناڤدارێ توركیا راگه‌هاند كو نها په‌یوه‌ندیێن توركیا و رۆسیا باش نینن و ده‌مه‌كه فرۆكێن رۆسیا ل سووریێ ئێرشی هێزێن توركیا دكه‌ن و به‌ری نها ژی چه‌ندین جاران به‌رپرسێن رۆسیا به‌حسێ هندێ كرینه كو توركیا خیانه‌ت ل رۆسیا كریه و توركیا پشته‌ڤانیێ ل تیرۆرستان ل سووریێ دكه‌ت، ئانكۆ رۆسیا ب هه‌موو ره‌نگه‌كێ كار دكه‌ت كو توركیا هێزێن خوه ژ ئاخا سووریێ ڤه‌كێشیت و گۆت: (د راستی دا نها رۆسیا گه‌هشتیه ڤێ باوه‌ریێ كو توركیا بۆ وێ بوویه مه‌ترسی و دڤێت سنۆره‌كێ بۆ توركیا دانێت، ژ به‌ر هندێ ژی توركیا هه‌ست ب پیلانێن رۆسیا كریه و ئه‌ردۆگانی دڤێت جاره‌كا دی به‌رێ خوه بده‌ته ئه‌مریكا، به‌ری نها ره‌جه‌ب ته‌یب ئه‌ردۆگان به‌حسێ هندێ كر كو توركیا دڤێت ببیته هه‌ڤپه‌یمانا بهێز یا ئه‌مریكا ل رۆژهه‌لاتا ناڤین و پێدڤیا ئه‌مریكا ژی ب توركیا هه‌یه).
ناڤهاتی ئه‌و یه‌ك ژی دیار كر كو پشتی داخۆیانیا ئه‌ردۆگانی وه‌زیرێ ده‌رڤه و وه‌زیرێ به‌رگیریێ یێن توركیا ژی د دو داخۆیانیێن جودا جودا دا دیار كرن كو توركیا وه‌لاته‌ك بهێزه و پێدڤیا ئه‌مریكا ل رۆژهه‌لاتا ناڤین ب توركیا هه‌یه، لێ دڤێت ئه‌مریكا وه‌كو هه‌ڤپه‌یمانه‌كا بهێز سه‌ره‌ده‌ریێ ل گه‌ل توركیا بكه‌ت، ب كورتی نها ئه‌ردۆگان و به‌رپرسێن دی یێن توركیا ل رێیه‌كێ دگه‌رن دا جاره‌كا دی خوه نێزیكی ئه‌مریكا بكه‌ن و په‌یوه‌ندیێن خوه ل گه‌ل ئه‌مریكا باشتر لێ بكه‌ن، لێ ژ به‌ر هه‌لوه‌ستێ خراب یێ توركیا ل سووریێ و لیبیا و ئه‌و ئاریشێن كو به‌ری نها توركیا بۆ به‌رژه‌وه‌ندیێن ئه‌مریكا ل رۆژهه‌لاتا ناڤین دروست كرینه وه‌سا كریه هه‌تا نها ئه‌مریكا ل هه‌مبه‌ر داخوازیێن توركیا چو هه‌لوه‌سته‌ك نیشا نه‌دایه و ئه‌و یه‌ك ژی بۆ توركیا بوویه جهێ پرسیارێ و گۆت: (د راستی دا توركیا د سیاسه‌تا خوه یا ده‌رڤه دا تووشی قه‌یرانه‌كا مه‌زن هاتیه، گه‌له‌ك ده‌رگه‌ه بۆ توركیا هاتینه داخستن و نها ئه‌ردۆگانی دڤێت ب رێیێن جودا جودا وان ده‌رگه‌هان ڤه‌كه‌ت كو بێگومان ده‌رگه‌هێ هه‌ری گرنگ ژی ئه‌مریكا یه، لێ دیاره ئه‌مریكا ژی گه‌له‌ك داخوازی ژ توركیا هه‌نه، به‌ری نها د كۆمبوونا ئه‌ردۆگانی ل گه‌ل بایدنی دا سه‌رۆكێ ئه‌مریكا داخواز ژ ئه‌ردۆگانی كربوو كو ده‌ست ب گوهۆرینێن دیموكراتی بكه‌ن و وی ده‌می ئه‌مریكا دێ پشته‌ڤانیێ ل توركیا كه‌ت، لێ هه‌تا نها ئه‌ردۆگانی ده‌ست ب چو گوهۆرینێن دلخوه‌شكه‌ر د ناڤ توركیا دا نه‌كریه).
نڤیسه‌ر و ڤه‌كۆله‌رێ ناڤدارێ توركیا د دووماهیا ئاخڤتنا خوه دا ئه‌و یه‌ك ژی دیار كر كو ئێك ژ ئاریشێن سه‌ره‌كی یێن كو وه‌سا كریه ئه‌مریكا ب ره‌نگه‌كێ سار نێزیكی توركیا ببیت بابه‌تێ مۆشه‌كێن رۆسیا یه، چونكو به‌ری نها چه‌ندین جاران به‌رپرسێن ئه‌مریكا دیار كرینه كو دڤێت توركیا ده‌ستان ژ كڕینا سیسته‌مێ مۆشه‌كی یێ روسیا به‌رده‌ت، لێ هه‌موو جاران به‌رپرسێن توركیا دیار كرینه كو ئه‌و دێ هه‌ر سیسته‌مێ مۆشه‌كی ژ رۆسیا كرن و هه‌لوه‌ستێ وان نه‌هاتیه گوهۆرین، ئه‌و یه‌ك ژی بوویه ئه‌گه‌رێ دلگرانیا ئه‌مریكا و ره‌نگه نها ژی ئێك ژ خالێن هه‌ری سه‌ره‌كی بیت كو وه‌سا كریه ئه‌مریكا ل هه‌مبه‌ر داخوازیێن ڤێ دووماهیێ یێن توركیا بێده‌نگ بیت.
