روسیا دڤێت په‌یوه‌ندیێن خوه ل گه‌ل تالیبانێ باش بكه‌ت
ئه‌ڤرۆ:
ڤیلاده‌میر پوتین سه‌رۆكێ رۆسیا د چارچۆڤێ كۆنفرانسێ تاجیكستانێ ل دۆر ره‌وشا ئه‌فغانستانێ ئاخڤی و دیار كر كو دڤێت به‌ری هه‌ر تشته‌كێ رێكخستنا تالیبانێ پێگیریێ ب وان سۆزان بكه‌ت یێن كو به‌ری نها داینه جڤاكێ نێڤده‌وله‌تی، دڤێت تالیبان رێزێ ل مافێن مرۆڤی بگریت و ره‌وشا ژیانا وه‌لاتیان ل ئه‌فغانستانێ ژی باش بكه‌ت وی ده‌می رۆسیا و چین دشێن په‌یوه‌ندیێن خوه ل گه‌ل تالیبانێ باش بكه‌ن.
سه‌رۆكێ رۆسیا ئه‌و یه‌ك ژ دیار كر كو نها ره‌وشا ئه‌فغانستانێ گه‌له‌ك خرابه، وه‌لاتی ژ به‌ر ره‌وشا خراب ژ ئه‌فغانستانێ دره‌ڤن و هه‌تا نها ژی تالیبانێ وه‌كو پێدڤی كار بۆ ئارامیێ و باشكرنا ره‌وشا ژیانا وه‌لاتیان نه‌كریه، خه‌لك نزانن كا دێ پاشه‌رۆژا وان چ لێ هێت، ژ به‌ر هندێ ژی گرنگه رێكخستنا تالیبانێ ده‌ست ب گوهۆرینان بكه‌ت و پێگیریێ ب وان سۆزان بكه‌ت یێن كو به‌ری نها داینه جڤاكێ نێڤده‌وله‌تی.
چاڤدێرێن سیاسی ژی دیار دكه‌ن كو سه‌رۆكێ رۆسیا دڤێت ب رێیا چینێ په‌یوه‌ندیێن وه‌لاتێ خوه ل گه‌ل تالیبانێ باش بكه‌ت، چونكو رۆسیا گه‌له‌ك ژ هندێ دترسیت كو جاره‌كا دی ئه‌فغانستان ببیته ناڤه‌ندا رێكخراوێن هشكباوه‌ر، ژ به‌ر هندێ ژی رۆسیا دڤێت ب رێیا دروستكرنا په‌یوه‌ندیان ل گه‌ل رێكخستنا تالیبانێ وه‌سا بكه‌ت كو تالیبان و ئه‌فغانستان نه‌بنه مه‌ترسی ل سه‌ر پاشه‌رۆژا رۆسیا، ژ به‌ر هندێ ژی هه‌لوه‌ست و په‌یاما پوتینی ل دۆر ئه‌فغانستانێ و ب تایبه‌تی ژی رێكخستنا تالیبانێ نه‌رم بوو.
به‌ری نها ژی وه‌زیرێ ده‌رڤه یێ رۆسیا دیار كربوو كو ئه‌و چاڤدێریا بزاڤێن تالیبانێ دكه‌ن و هه‌كه تالیبان نه‌بیته مه‌ترسی بۆ رۆسیا ئه‌و ژی به‌رهه‌ڤن په‌یوه‌ندیێن خوه ل گه‌ل تالیبانێ باش بكه‌ن.
