عادل سه‌دیق: یانێن پارێزگه‌هێ ڤۆلی بۆل پشتگۆه هاڤێتیه
ئه‌ڤرۆ،
د داخویانیه‌كێدا سه‌رۆكێ ئێكه‌تیا ڤۆلی بۆلا پارێزگه‌ها دهۆكێ گازنده ژ یانێن پارێزگه‌هێ كر ئه‌وێن یاریا ڤۆلی بۆلێ پشتگۆه هاڤێتنه سه‌رباری هه‌بوونا بنیاتێ ڤێ یاریێ و یاریزانێن خودان شیان ل پرانیا باژێران وهیڤیا مه ئه‌وه یانه پشته‌ڤان بیت ژبۆ پێشئیخستنا ڤێ وه‌رزشێ.
زێده‌تر عادل سه‌دیق بۆ رۆژناما ئه‌ڤرۆ گوت: گه‌له‌ك پێ نه‌خووش بووم ده‌مێ پارێزگه‌ها دهۆكێ مێڤانداریا قاره‌مانیا ئیراقێ بۆ یانێن پلا ئێك یا كۆما دویێ كری ب تنێ یانا ئاكرێ پشكداربووی ل گه‌ل دا یانا شنگالێ ژی كو ل هۆلا گرتیا یانا سه‌نحاریب د هاته كرن، سه‌رباری داخازیا راهێنه‌ر و یاریزانێن پارێزگه‌هێ ژ هنده‌ك یانا كو ب ناڤێ وان پشكداربن بێ چو داخازیێن دارایی بكه‌ن لێ مخابن چو یانه به‌رهه‌ڤ نه‌بوون، له‌ورا ئه‌ز دبینم گۆنه‌ها بێ خودانیا یاریا ڤۆلی بۆلێ یانێن پارێزگه‌هێ دكه‌مه ئه‌گه‌ر كو ئه‌وا پشتگۆه هاڤێتیه.
ژلایه‌كێ دووڤه ناڤهاتی گۆت: وه‌كو دیار ل پارێزگه‌ها دهۆكێ نێزیكی حه‌فت یانا هه‌نه و پرانیا وان گرنگی دایه یاریا ته‌پا پێی بیێ هزر بكه‌ن كو هنده‌ك یاریێن دی هه‌نه ب شه‌نگستێ خوه یێ دروست و یاریزانێن شاره‌زا كو د شیانێن وان دانه هه‌كه پشته‌ڤانیا دارایی بۆ بهێته كرن ناسناڤێن ئیراقێ و ده‌رڤه ژی بینن، نموونه د زوورن كو هه‌ر ده‌مێ قاره‌مانیه‌كا سه‌ر ئاستێ پارێزگه‌هێ بۆ تیمێن مللی هاتبا رێكخستن زێده‌تری 20 تیما به‌رهه‌ڤیا خوه دیاركر ئه‌ڤه به‌لگه‌یه كو مه یاریزانێن باش و خودان شیان یێن هه‌ین لێ نه‌بوونا پشته‌ڤانیێ ئارمانجێن وان دهێنه راوه‌ستاندن، هیڤییا مه ئه‌وه پارێزگارێ دهۆكێ و یانێن وه‌رزشی چاره‌سه‌ریا ڤێ ئاریشێ بكه‌ن ژبۆ خزمه‌تا گه‌نج و لاوێن پارێزگه‌هێ.
