په‌یوه‌ندیێن ئیرانێ و ئازه‌ربه‌یجانێ ئالۆز بووینه
ئه‌ڤرۆ:
چه‌ند رۆژن ئیرانێ ل سه‌ر سنۆرێ خوه یێ ل گه‌ل ئازه‌ربایجانێ ده‌ست ب مانوره‌كا مه‌زن یا سه‌ربازی كریه و دو رۆژان به‌ری نها ئیلهام عه‌لیێڤ سه‌رۆك كۆمارێ ئازه‌ربایجانێ راگه‌هاند كو ئیران ده‌ستێوه‌ردانێ د كاروبارێن ناڤخوه‌یی یێ ئازه‌ربایجانێ دا دكه‌ت و چه‌ند رۆژن ئیران بارهه‌لگران ره‌وانه‌ی هه‌رێما قه‌ره‌باخێ دكه‌ت و ئه‌و یه‌ك ژی ب چو ره‌نگه‌كێ ناهێته قه‌بوولكرن و هه‌روه‌سا دڤێت ئیران مانورا سه‌ربازی یا ل سه‌ر سنورێ مه ژی بده‌ته راگرتن.
ل هه‌مبه‌ر ئاخڤتنا سه‌رۆك كۆمارێ ئازه‌ربایجانێ ژی دوهی سه‌عید خه‌تیب زاده په‌یڤدارێ وه‌زاره‌تا ده‌رڤه یا ئیرانێ راگه‌هاند كو ده‌مه‌كه ئسرائیل ب رێیا سنورێ ئازه‌ربایجانێ كارێن تێكده‌رانه ل ئیرانێ دكه‌ت و ده‌زگه‌هێ هه‌والگیریێ یێ ئیرانێ ژی زانیاریێن راست ل دۆر وی سنوری به‌لاڤ كربوون و ژ به‌ر هندێ ژی ئیرانێ دڤێت سنورێن خوه باش كۆنترۆل بكه‌ت و گۆت: (مافێ سه‌رۆك كۆمارێ ئازه‌ربایجانێ نینه كو بێژیته ئیرانێ نابیت هوون چو مانورێن سه‌ربازی بكه‌ن، ئیران دشێت ل هه‌موو ده‌ڤه‌رێن سنوری مانوران بكه‌ت و چو وه‌لاته‌كێ ژی ئه‌و مافه نینه ئاخڤتنێن دوور ژ راستیێ بكه‌ت).
ئه‌و یه‌ك د ده‌مه‌كێ دایه كو به‌ری چه‌ند حه‌فتیان هنده‌ك ژ رۆژنامێن ئیرانێ به‌لاڤكربوون كو ئسرائیل ب رێیا ئازه‌ربایجانێ سیخوران ره‌وانه‌ی ئاخا ئیرانێ دكه‌ت و سیخور ژی كارێن تێكده‌رانه دكه‌ن، ژ به‌ر هندێ ژی دڤێت ئیران هۆشداریێ بده‌ته ئازه‌ربایجانێ و رێ نه‌ده‌ت كو ئسرائیل ئاخا ئازه‌ربایجانێ بۆ مه‌ره‌مێن خوه یێن خراب بكار بینیت.
ل ئالیێ دی دوهی كیومه‌رس حه‌یده‌ری فه‌رماندارێ گشتی یێ له‌شكرێ ئیرانێ راگه‌هاند كو ب هزاران چه‌كدارێن تیرۆرست ژ سووریێ چووینه ئازه‌ربایجانێ و هه‌تا نها ژی ل وی وه‌لاتی ماینه و هه‌بوونا وان چه‌كدارێن تیرۆرستی بۆ ئیرانێ ژی مه‌ترسیه‌كا خوه یا مه‌زن هه‌یه، ژ به‌ر هندێ ژی ئیرانێ دڤێت سنورێ خوه یێ ل گه‌ل ئازه‌ربایجانێ باش بپارێزیت و دڤێت ئازه‌ربایجان ژی هه‌ر زوو وان تیرۆرستان ژ ئاخا خوه ده‌رخینیت و گۆت: (ئه‌و تیرۆرستێن كو نها ل ئازه‌ربایجانێ نه وان گه‌له‌ك كریارێن خراب ل دژی خه‌لكێ سووریێ ئه‌نجام داینه و نابیت ئازه‌ربایجان وان تیرۆرستان خوه‌دان بكه‌ت، به‌لكو دڤێت د زووترین ده‌م دا ئازه‌ربایجان وان ده‌رخینیت).
