ئۆپۆزسیۆنا توركیا داخوازا گوهۆڕینا سیسته‌مێ سیاسی دكه‌ت
ئه‌ڤرۆ:
كه‌مال كلچدار ئوغلۆ سه‌رۆكێ گشتی یێ پارتا كۆماریا گه‌ل راگه‌هاند كو دڤێت سیسته‌مێ سیاسی یێ توركیا بهێته گوهۆرین، چونكو سیسته‌می سه‌رۆكاتیێ بۆ توركیا گونجای نینه و دڤێت سیسته‌مێ توركیا ببیته سیسته‌مێ په‌رله‌مانی و گۆت: (ئاكپارتی و ئه‌ردۆغانی توركیا تووشی قه‌یرانه‌كا گه‌له‌ك مه‌زن كرینه مه دڤێت سیسته‌مێ توركیا بهێته گوهۆرین، چونكو هه‌تا سیسته‌مێ توركیا نه‌بیته په‌رله‌مانی چو پرسێن توركیا چاره‌سه‌ر نابن).
پشتی داخۆیانیا سه‌رۆكێ گشتی یێ پارتیا كۆماریا گه‌ل، مه‌رال ئاكشه‌نه‌ر سه‌رۆكا گشتی یا پارتیا ئی یا توركیا ژی راگه‌هاند كو نابیت ب تنێ كه‌سه‌ك ل ژێر ناڤێ سیسته‌مێ سه‌رۆكاتیێ حوكمێ ل هه‌موو توركیا بكه‌ت، دڤێت سیسته‌مێ توركیا بهێته گوهۆرین، چونكو سیسته‌مێ نها ل دژی دیموكراسیێ یه و ئه‌ردۆغانی ل ژێر ناڤێ سیسته‌مێ سه‌رۆكاتیێ رێ ل ئازادیان گرتیه و ب هزاران رۆژنامه‌ڤان، ره‌وشه‌نبیر و سیاسه‌تمه‌دار ل زیندان دانه، دڤێت توركیا ڤه‌گه‌ریته ڤه سه‌ر سیسته‌مێ په‌رله‌مانی و مه دڤێت ب رێیا هه‌لبژارتنان سیسته‌مێ توركیا بهێته گوهۆرین.
ئه‌و یه‌ك د ده‌مه‌كێ دایه كو به‌ری نها عه‌لی باباجان و ئه‌حمه‌د داوود ئوغلۆ ژی دیار كربوون كو سیسته‌مێ سه‌رۆكاتیێ بۆ توركیا گونجای نینه و دڤێت سیسته‌مێ توركیا بهێته گوهۆرین، چونكو سیسته‌مێ سه‌رۆكاتیێ بۆ هندێ هاته دانان دا ئه‌ردۆغان ب تنێ حوكمێ ل توركیا بكه‌ت و سیسته‌مێ سه‌رۆكاتیێ ل دژی دیموكراسیێ یه.
چاڤدێرێن سیاسی یێن توركیا ژی دیار دكه‌ن كو باشترین سیسته‌م بۆ توركیا سیسته‌مێ په‌رله‌مانی یه، سیسته‌مێ سه‌رۆكاتیێ ل گه‌ل راستیا سیاسی و جڤاكی یا توركیا ناگونجیت، ژ به‌ر سیسته‌مێ سه‌رۆكاتیێ توركیا تووشی گه‌له‌ك قه‌یرانان هاتیه، چونكو ئه‌ردۆغان ب تنێ بریارێن گرنگ ل دۆر چاره‌نڤیسێ توركیا دده‌ت و ژ به‌ر هندێ ژی توركیا تووشی گه‌له‌ك قه‌یرانان هاتیه و ب تایبه‌تی ژی نها توركیا د سیاسه‌تا خوه یا ده‌رڤه دا تووشی قه‌یرانه‌كا مه‌زن هاتیه و په‌یوه‌ندیێن توركیا ل گه‌ل پرانیا وه‌لاتێن جیرانێن وێ خرابه، وه‌لاتێن عه‌ره‌بی ژ به‌ر ده‌ستێوه‌ردانێن توركیا دلگرانن و ژ به‌ر هندێ ژی هه‌كه پارتێن ئۆپۆزسیۆنێ یێن توركیا بشێن پێكڤه به‌ره‌یه‌كێ دروست بكه‌ن دێ شێن د هه‌لبژارتنێن داهاتی دا ئه‌ردۆغانی ژ ده‌ستهه‌لاتێ دوور بكه‌ن، چونكو هه‌تا ئه‌ردۆغان و ئاكپارتی ل سه‌ر ده‌ستهه‌لاتێ بن سیسته‌مێ توركیا ژی ناهێته گوهۆرین.
