مه‌حمود عه‌زیز: نابیت كارگێریێن یانا مووچه و ده‌رمالا وه‌ربگرن
ئه‌ڤرۆ،
د داخویانیه‌كێدا چێگرێ رێڤه‌به‌رێ گشتی یێ وه‌رزشی ل هه‌رێما كوردستانێ دیاركر كو ب نڤێسارا فه‌رمی بۆ هه‌موو یانێن وه‌رزشی ل پارێزگه‌هێن هه‌رێمێ هاتیه ئاگه‌هداركرن نابیت ده‌سته‌كا گشتی مووچه و ده‌رمالا وه‌ربگرن.
زێده‌تر مه‌حمود عه‌زیز بۆ رۆژناما ئه‌ڤرۆ گوت: لدووڤ رێنما و یاسا وه‌رزشی ب هیچ ره‌نگه‌كی نابیت ده‌سته‌كا گشتی یا هه‌ر یانه‌كێ مووچه‌یی و ده‌رمالا وه‌ربگریت د ماوێ كارێ خوه یێ چار سالان دا و هه‌كه ئه‌ڤ چه‌نده هاته كرن دێ هه‌مبه‌ری یاسایی بیت و سزا ژی دێ بۆ هه‌بیت كو لدووڤ یاسا وه‌رزشی به‌ندێ 18 یا 1986ێ نابیت ده‌سته‌كێن كارگێریێن هه‌ر یانه‌كێ مووچه یان ده‌رماله وه‌ربگریت ژبه‌ركو دهێنه هژمارتن كارگێریا خوه‌به‌خش و مافێ وه‌رگرتنا مووچه و ده‌رمالا نینه.
هه‌روه‌سا ناڤهاتی دیاركر كو ئه‌ڤ بڕیاره ژلایێ پرانیا یانا نه دهاته بجهئینان و ژبه‌ر گه‌له‌ك ئه‌گه‌ران و دیسان دۆڤچوون ژی بۆ نه دهاته كرن، لێ بۆ چار سالێن بهێت ئه‌ڤ بڕیاره دێ هێته بجهئینان ژبۆ رێكخستنا دروست یا كارێ وان و پێگیر ب هه‌موو رێنما و یاسایا وه‌رزشی.
دهێته زانین لدووڤ خشتێ هه‌لبژارتنێن یانێن وه‌رزشی ل پارێزگه‌ها دهۆكێ ئه‌ڤرۆ یانا پۆلیته‌كنیك و یانا میدیا یا خودان پێدڤیێن تایبه‌ت دێ هه‌لبژارتنێن خوه ئه‌نجامده‌ن، هه‌روه‌سا ل رۆژێن چارشه‌مبێ یانا ته‌ناهی و ئافره‌تێن دهۆكێ، پێنچ شه‌مبیێ یانێن شێخان و به‌رده‌ره‌ش، ئێكه‌شه‌مبیا بهێت گاره و زاخۆ، دووشه‌مبێ ئاكرێ و سه‌نحاریب، سێ شه‌مبیا بهێت یانا فرۆكه‌ڤانی و سێمێل و ل رۆژا 30/ 10/ 2021 هه‌لبژارتنێن یانا دهۆكێ دێ پرۆسێسا هه‌لبژارتنان ب دووماهی ئینیت.
