وه‌زیرێ كاره‌بێ: كار ل سه‌ر هه‌ژماره‌كا پرۆژێن ستراتیژیێن به‌رهه‌مئینانا كاره‌بێ دهێته كرن
ئه‌ڤرۆ:
ئه‌ندازیار كه‌مال محه‌مه‌د سالح، وه‌زیرێ كاره‌بێ یێ حوكمه‌تا هه‌رێما كوردستانێ سه‌را كوچكا پارێزگه‌ها دهۆكێ دا و ژلایێ ماجد سه‌ید سالح و شه‌معون شلیمون، جێگرێن پارێزگارێ دهۆكێ پێشوازی لێ هاته كرن.
د هه‌ڤدیته‌نه‌كێ دا ب ئاماده‌بوونا رێڤه‌به‌رێن په‌یوه‌ندیدار به‌حسێ ره‌وشا كاره‌بێ ل پارێزگه‌ها دهۆكێ و پلانێن وه‌زاره‌تێ بۆ زێده‌كرنا رێژا گشتی یا كاره‌بێ و ژێده‌رێن به‌رهه‌مئینانا وزا كاره‌بێ و به‌رنامێ دانانا پێڤه‌رێن زیره‌ك بۆ باشتر رێكخستنا كاره‌بێ هاته كرن.
ئه‌ندازیار كه‌مال محه‌مه‌د سالح، وه‌زیرێ كاره‌بێ دیار كر كو ل دووڤ به‌رنامێ كابینا نه‌هێ یا حوكمه‌تا هه‌رێمێ گرنگیه‌كا تایبه‌ت ب دابینكرنا وزا كاره‌بێ هاتیه دان و گۆت: “نوكه كار ل سه‌ر چه‌ندین پرۆژێن ستراتیژی یێن به‌رهه‌مئینانا كاره‌بێ دهێته كرن و هنده‌ك ل دووماهیا ئه‌ڤ ساله دێ ب دووماهی هێن و كه‌ڤنه د خزمه‌تا وه‌لاتیان دا، ب ڤێ چه‌ندێ ژی ره‌وشا كاره‌بێ دێ باشتر لێهێت و ده‌مژمێرێن دانا كاره‌با نیشتمانی بۆ وه‌لاتیان دێ هێنه زێده‌كرن”.
وه‌زیرێ كاره‌بێ گۆتژی: “نوكه مه شه‌ش ژێده‌رێن به‌رهه‌مئینانا كاره‌با نیشتمانی ل هه‌رێما كوردستانێ هه‌نه، لێ ئه‌م دخوازین وه‌لاتی ژی ئابووریێ د مه‌زاختنا كاره‌بێ دا بكه‌ن، داكو پتر مفا ژێ بهێته وه‌رگرتن”.
هه‌ردو جێگرێن پارێزگارێ دهۆكێ خوشحالیا خوه ب سه‌ره‌دانێ دیاركرن و ده‌ست خوشی ل وه‌زیرێ كاره‌بێ و ستافێ وه‌زارتێ كرن هه‌مبه‌ر بزاڤێن وان بۆ راكێشانا بووریه‌كا غازێ بۆ وێستگه‌ها به‌رهه‌مئینانا كاره‌بێ ل كواشێ و زێده‌كرنا ژێده‌رێن به‌رهه‌مئینانا كاره‌بێ، هه‌روه‌سا پشته‌ڤانیا پارێزگه‌هێ نیشا دا بۆ بجهئینانا به‌رنامه و پلانێن وه‌زاره‌تێ، نه‌خاسمه بۆ دانانا پیڤه‌رێن زیره‌ك ل پارێزگه‌هێ بۆ وێ یه‌كێ به‌رهه‌م و ده‌مژمێرێن كاره‌با نیشتمانی بهێنه زێده‌كرن.
