ئامیرێن نۆشداری بۆ ئیدارا سه‌ربخوه یا زاخۆ دهێنه دابینكرن
دهۆك، له‌زگین جوقی:
وه‌زێری ساخله‌میێ ل حوكمه‌تا هه‌رێما كوردستانێ دگه‌ل د. ئه‌فراسیاب موسا، رێڤه‌به‌رێ گشتی یێ ساخله‌میا پارێزگه‌ها دهۆكێ سه‌ره‌دانا ئیدارا سه‌ربخوه یا زاخۆ كر، بڕیاره ساخله‌میا زاخۆ ببیته رێڤه‌به‌ریا گشتی یا ساخله‌میا زاخۆ و ئامیرێن نۆشداری و پێدڤیێن ساخله‌میێ بۆ ئیدارا سه‌ربخوه یا زاخۆ دێ هێنه دابینكرن.
د. سامان به‌رزنجی، وه‌زێرێ ساخله‌میێ ل حوكمه‌تا هه‌رێما كوردستانێ د كۆنگره‌كێ رۆژنامه‌ڤانی دا گۆت: “ل سه‌ر راسپاردێن سه‌رۆكێ حوكمه‌تا هه‌رێما كوردستانێ و ب مه‌ره‌ما پێشكێشكرنا خزمه‌تێن باشاتر یێن ساخله‌میێ، مه سه‌ره‌دانا نه‌خۆشخانه و بنگه‌هێن ساخله‌میێ ل ئیدارا سه‌ربخوه یا زاخۆ كر و بڕیار هاته دان ساخله‌میا زاخۆ ژی ببیته رێڤه‌به‌ریا گشتی یا ساخله‌میێ ل زاخۆ و دێ هه‌موو پێدڤیێن نۆشداری بۆ ساخله‌میا زاخۆ هێنه دابینكرن پتر خزمه‌تا خه‌لكێ زاخۆ دێ هێته كرن”.
ناڤهاتی ئاشكرا ژی كر كو بڕیارا هاته دان چه‌ند پێدڤیێن گرنگ یێن ساخله‌میێ بۆ رێڤه‌به‌ریا گشتی یا ساخله‌میا زاخۆ بهێنه دابینكرن و یا ژ هه‌موویێ ژی گرنگتر ئه‌وه بۆ كێمكرنا رۆتینێ یه‌كه‌یه‌كا ژمێریاری و بودجه‌كا هه‌یڤانه هه‌بیت و ئامیرێن نۆشداری بۆ رێڤه‌به‌ریا گشتی یا ساخله‌میا زاخۆ بهێنه دابینكرن و هه‌ر تشته‌كێ د شیان دا بیت دێ بۆ ئیدارا سه‌ربخوه یا زاخۆ هێته دابینكرن.
وه‌زێرێ ساخله‌میێ ل حوكمه‌تا هه‌رێما كوردستانێ ئاماژه ب وێ چه‌ندێ ژی كر كو هاریكاریا نه‌خۆشخانا ژن و زارۆكبوونێ و هه‌وارهاتنێ ل زاخۆ دێ هێته كرن، كار دێ هێته كرن سه‌نته‌رێ 122ێ ژی ل زاخۆ بهێته ڤه‌كرن و بنگه‌هه‌كێ تالاسیما ژی بۆ نه‌خۆشان ل زاخۆ دێ هێته ڤه‌كرن و ئامیرێن نۆشداری ژی دێ هێنه دابینكرن.
