ئاژانسه‌كا رۆسیا:رۆسیا ل دژی هه‌ر ئۆپه‌راسیۆنه‌كێ یه ل باكورێ سووریێ
ئه‌ڤرۆ:
ئاژانسه‌كا رۆسیا دیار دكه‌ت كو وه‌زیرێ ده‌رڤه یێ رۆسیا داخواز ژ توركیا كریه كو ده‌ست ب چو ئۆپه‌راسیۆنێن نوو ل باكورێ سووریێ نه‌كه‌ت چونكو ئه‌و یه‌ك دێ بیته ئه‌گه‌رێ هندێ ره‌وشا هه‌ی پتر ئالۆز بیت و ئه‌مریكا ژی داخواز كریه پێگیری ب ئاگربه‌ستێ بهێته كرن.
ئاژانسا سپوتینگ یا رۆسیا د راپۆرته‌كێ دا دیار كر كو وه‌زیرێ ده‌رڤه یێ رۆسیا سیرگێی لاڤرۆڤ داخواز ژ توركیا كریه كو ده‌ست ب چو ئۆپه‌راسیۆنان ل باكورێ سووریێ نه‌كه‌ن، چونكو وان دڤێت ب رێیێن سیاسی قه‌یرانا نها ل سووریێ بهێته چاره‌سه‌ركرن و ژ به‌ر هندێ ژی دڤێت توركیا نه‌بیته ئه‌گه‌رێ زێده‌بوونا ئالۆزیان ل سووریێ.
هه‌مان ئاژانسێ دیار كریه توركیا ژی داخواز ژ رۆسیا كریه كو هێزێن سووریێ خوه ژ ئدلبێ ڤه‌كێشن لێ ئه‌و یه‌ك ژ ئالیێ رۆسیا ڤه ب توندی هاتیه ره‌تكرن و وه‌زیرێ ده‌رڤه یێ رۆسیا بۆ وه‌زیرێ ده‌رڤه یێ توركیا دیار كریه كو ئدلب ئاخا سووریێ یه و شامێ ژی دڤێت هه‌موو ئاخا خوه كۆنترۆل بكه‌ت و دڤێت توركیا هه‌موو هێزێن خوه ژ ئدلبێ ڤه‌كێشیت، چونكو هه‌تا هێزێن بیانی ل سووریێ بمینن ره‌وشا وی وه‌لاتی ژی ئارام نابیت و توركیا ژی ره‌ت كریه كو هێزێن خوه ژ ئدلبێ ڤه‌كێشیت، ژ به‌ر هندێ ژی نها په‌یوه‌ندیێن رۆسیا و توركیا ل دۆر سووریێ گه‌له‌ك ئالۆزن و رۆسیا ب هه‌موو ره‌نگه‌كێ ل دژی هندێ یه كو توركیا ده‌ست ب ئۆپه‌راسیۆنه‌كا نوو ل باكورێ سووریێ بكه‌ت.
ل ئالیێ دی وه‌زاره‌تا ده‌رڤه یا ئه‌مریكا ژی دو رۆژان به‌ری نها راگه‌هاند كو دڤێت توركیا پێگیریێ ب ئاگربه‌ستێ بكه‌ت، به‌ری نها ئاگربه‌ست د ناڤبه‌را ئه‌مریكا و توركیا و هه‌روه‌سا رۆسیا و توركیا ل باكورێ سووریێ هاتیه ئیمزا كرن، دڤێت توركیا و هێزێن سووریا دیموكرات پێگیریێ ب ئاگربه‌ستێ بكه‌ن، چونكو نها ره‌وشا باكورێ سووریێ ئارامه و هه‌كه توركیا بڤێت ده‌ست ب ئۆپه‌راسیۆنه‌كا نوو ل باكورێ سووریێ بكه‌ت دێ ره‌وش پتر ئالۆز بیت.
چاڤدێرێن سیاسی ژی دیار دكه‌ن كو رۆسیا و ئه‌مریكا ب هه‌موو ره‌نگه‌كێ ل دژی هندێ نه كو توركیا ده‌ست ب ئۆپه‌راسیۆنه‌كا نوو ل باكورێ سووریێ بكه‌ت، چونكو ئه‌و باش دزانن ئارمانجا توركیا ئه‌وه دا پتر ئاخا سووریێ داگیر بكه‌ت، هه‌لوه‌ستێ نها یێ توركیا ل دۆر باكورێ سووریێ دێ وه‌سا كه‌ت كو چاره‌سه‌ریا سیاسی گه‌له‌ك ب زه‌حمه‌ت كه‌ڤیت، توركیا داخوازا مافێن خوه ل سووریێ دكه‌ت و ژ به‌ر هندێ ژی نها ئه‌مریكا و رۆسیا رێ ناده‌ن توركیا ده‌ست ب چو ئۆپه‌راسیۆنان ل باكورێ سووریێ بكه‌ت.
ل ئالیێ دی نڤیسه‌ر و ڤه‌كۆله‌ر محه‌مه‌د كۆبال راگه‌هاند كو توركیا ل سووریێ و رۆژئاڤایێ كوردستانێ تووشی شكه‌ستنێ هاتیه، چونكو توركیا دخواست ب رێیا گرۆپێن هشكباوه‌ر رژێما به‌شاری ژناڤ ببه‌ت و هه‌روه‌سا دخواست كورد ژی نه‌گه‌هنه مافێن خوه، لێ د ئه‌نجام دا به‌شار ل سه‌ر ده‌ستهه‌لاتێ ما و نها چو ده‌وله‌ته‌ك داخوازا دوورخستنا به‌شاری ژ ده‌ستهه‌لاتێ ناكه‌ت و ل ئالیێ دی ل باكورێ سووریێ ژی ده‌ستهه‌لاته‌كا كوردی هاتیه ئاڤاكرن و رۆژ ب رۆژێ ژی بهێز دكه‌ڤیت، توركیا ژی نه‌شیا ئه‌وا دخواست ل سووریێ بكه‌ت، ژ به‌ر هندێ ژی توركیا ل سووریێ و رۆژئاڤایێ كوردستانێ تووشی شكه‌ستنێ هاتیه و رۆسیا و ئه‌مریكا ژی ئێدی ناخوازن توركیا ل سووریێ بمینیت.
